Umuhanzi uri mu bamaze kubaka izina mu muziki nyarwanda Muneza Christopher yakoze igitaramo cyasize amateka ku bakunzi n’ibihangano bye batuye muri Uganda, ashimirwa n’abatari bake.

Ni igitaramo yakoze mu ijoro ry’itariki ya 6 Ugushyingo 2026, cyitabirwa n’abakunzi b’umuziki by’umwihariko abihebeye ibihangano by’uwo muhanzi uzwiho kuririmba indirimbo ziganjemo iz’urukundo.

Christopher yaririmbye nyinshi mu ndirimbo ze ziganjemo izo yatangiriyeho zirimo ‘Habona’, ‘Ijuru Rito’, ‘Simusiga’, ‘Isezerano’, ‘Ko Wakonje’ na ‘Nibido’, n’izindi nyinshi aho yanyuzagamo akaririmba n’izo aherutse gushyira hanze bituma abitabiriye batabona agahenge ko kwicara.

Nyuma y’igitaramo abenshi bahise basangiza abakunzi babo amashusho magufi y’igitaramo bashimira Christopher wabafashije kuryoherwa n’uwo mugoroba.

Ukoresha amazina ya JaneKyleen yanditse ku mbuga nkoranyambaga ati: “Nguyu umuhanzi wihariye ibigwi by’umugoroba! Christopher Muneza wakoze. Mu byukuri Christopher yaduhaye byose yari afite.”

Uwiyita Annah Bella na we yanditse ati: “Twabyinnye, twaririmbye tunagira ibihe byo kugaragaza amarangamutima yacu nyayo. Mbega igitaramo!.”

Ni igitaramo cyahawe izina rya ‘Code 250’  aho cyabaye undi mwanya Christopher yabonye wo kumenyekanisha umuziki we ku bakunzi be bo muri Uganda, nyuma y’igihe bari bamaze bategereje ko ahataramira ariko bikagenda bisubikwa kubera icyorezo cya Ebola cyari kihamaze iminsi.

Mu ntangiriro za 2026, Christopher yashyize hanze Alubumu ‘H₂O’, igizwe n’indirimbo icyenda. 

Icyo gihe yasobanuye ko iryo zina risobanura ‘Harnessing Two Opposites’, akaba yarayikoze agamije kugerageza uburyo bushya bw’umuziki butandukanye n’ubwo yari asanzwe amenyerewemo kuko yagerageje kuyihurizaho abahanzi barimo Kivumbi King, Angell Mutoni, Massamba Intore na Spin Bose bakora mu njyana zitandukanye.

Ba uwa mbere mu kumenya amakuru agezweho!!!