Ishyirahamwe ry’Umukino w’Amagare ku Isi (UCI) ryahaye Umujyi wa Kigali ikirango cya “UCI Bike City” nk’ishimwe ry’uko wakiriye neza Shampiyona y’Isi y’Amagare (UCI) ya 2025, kuva tariki ya 21 kugeza 28 Nzeri 2025, yari ibereye bwa mbere ku Mugabane wa Afurika.

Iki kirango gihabwa imijyi yakoze ibikorwa by’indashyikirwa mu mitegurire y’iri rushanwa ndetse n’imigenderanire inoze.
Ryagaragaje intambwe ikomeye imaze guterwa mu iterambere ry’umukino wo gusiganwa ku magare ku rwego rw’lsi n’ubushobozi bw’Umujyi wa Kigali mu kwakira amarushanwa ya siporo yo ku rwego mpuzamahanga.

UCI Bike City ni igihembo gihabwa imijyi n’ibindi bice by’Isi byakoze ibikorwa by’indashyikirwa mu gutegura no kwakira amarushanwa mpuzamahanga ategurwa na UCI.

Perezida w’Ishyirahamwe ry’Umukino w’Amagare ku Isi, David Lappartient yavuze ko mu kwakira UCI 2025, yari ibereye muri Afurika bwa mbere, Umujyi wa Kigali wateye intambwe izahora mu mateka y’umukino w’amagare.

Ati: ”Mu kwakira iri rushanwa, ryari ribereye bwa mbere muri Afurika, Umujyi wa Kigali wateye intambwe izahora mu mateka y’umukino w’amagare. Byunze mu gushyiraho ingamba ziboneye na gahunda zitandukanye, Umujyi wa Kigali washoboye kwandika izina ryawo mu mateka no kugira uruhare mu kugena ishusho y’ahazaza h’umukino wo gusiganwa ku magare muri Afurika.”

Umuyobozi w’Umujyi wa Kigali, Samuel Dusenginyumva yavuze ko iki kirango ari igisobanuro cyiza ku migendere ikwiye mu mijyi.

Yagize ati: “Twishimiye kwakira igihembo cya “UCI Bike Cty Label” iki kirango ni igisobanurO cyiza cy’ubushake Umujyi ukomeje kugaragaza mu gushyiraho uburyo bw’imigendere ikwiye mu mijyi ndetse no kwita ku mibereho myiza y’abawutuye.

Turakomera guteza imbere ibikorwa remezo bifasha mu migendekere myiza y’imlkino yo gusiganwa ku magare ndetse no guha amahirwe bose babyifuza muri uyu mujyi wacu.”

Minisitiri wa Siporo mu Rwanda Nelly Mukazayire yavuze ko iki gihembo kigaragaza imtumbero y’u Rwanda yo kuba igicumbi cy’ubukungu bushingiye ku mikino n’imyidagaduro.

Ati: “igihembo cya “ICU Bike City ni kimenyetso cyiza kigaragaza intumbero y’u Rwanda yo kuba igicumbi cy’ubukungu bushingiye ku mikino n’imyidagaduro, harimo n’amasigamwa y’amagare.
Mu gukomeza kubaka ibikorwa remezo, guteza imbere uyu mukino duhereye mu bato tukageza ku marushanwa akomeye nka Tour du Rwanda, tuzakomeza gushyira imbaraga mu guha amahirwe abawukina ndetse no kwakira amarushanwa mpuzamahanga yawo.”

Umujyi wa Kigali wabaye uwa gatatu mu guhabwa iki gihembo, ukaba uwa mbere muri Afrika mu gihe u Rwanda ari gihugu cya karindwi ku Isi.

Ba uwa mbere mu kumenya amakuru agezweho!!!