Amarangamutima yaganje bamwe mu bo muryango wa Cherissa Uwanjye Tona wari umuririmbyi wa muri Healing Ministries ubwo yasezerwagaho bwa nyuma.

Bimwe mu byagarutsweho na bamwe mu banyamuryango be mu muhango wo kumusezeraho bwa nyuma wabaye kuri uyu wa Gatandatu tariki 9 Ugushyingo 2024, byiganje ku rukundo rwaranze Cherissa n’urugwiro rwe bavuga ko atazibagirana mu mitima yabo.

Mubyara we yagize ati: “Kubura umuntu wari ufite urukundo nka Cherrisa wahoraga yishimye, imyaka muzi turangana twarakuranye kuva turi abana, sindamubona yababaye, yahoranaga ibyishimo n’intekerezo nziza, biragoye, turamukunda, tuzahora tumukumbura, igitaramo yabaga arimo ntabwo wifuzaga kukivamo.”

Undi muri babyara be yunzemo ati: “Cherissa yagiraga ubuntu cyane, guhera tukiri abana twajyaga tujya kwa masenge, Cherissa agahamagara abana b’abaturanyi tugasangira ifunguro rya mugitondo.”

Mu ijoro ry’itariki ya 8 Ugushyingo 2024, nyina umubyara yasangije abari bari ku kiriyo ubuhamya bw’imibanire ye na Tona, avuga ko yari umwana wihariye mu bihe bye byose no kuva mu bwana bwe, kuko ari we mwana waganiraga cyane ugereranyije n’abavandimwe be, ndetse wasangaga ari we ubasusurutsa bose, bituma yibaza uko bizagenda nyuma yo kumubura.

Mu bindi umubyeyi wa nyakwigendera yagarutseho ni uburyo yari umunyamwete, aho mu myigire ye atigeze amugora, kubera ko ari we wishakiye uko aziga Kaminuza n’amanota y’amashuri yisumbuye atarasohoka, hiyongeraho ko n’akazi yakoraga ari we wakishakiye.

Uyu mubyeyi avuga ko mu bana yahangayikiraga uko babaho aramutse atabari hafi Tona atari arimo.

Uwanjye Tona Cherissa yari umuririmbyi wa Healing Ministries mbere y’uko yitaba Imana tariki yizihije isabukuru y’amavuko tariki 1 Ugushyingo 2024, nyuma akomeza ibyo birori ariko noneho ayizihiza ari kumwe n’inshuti ze tariki 3 Ugushyingo 2024, ari nabwo yitabye Imana akagwa aho bari basohokeye.

Biteganyijwe ko kuri uyu wa Gatandatu tariki 9 Ugushyingo 2024, saa kumI z’umugoroba ari bwo ashyingurwa mu irimbi rya Rusororo.