Nyuma y’akaruhuko k’imikino y’amakipe y’ibihugu mu bihugu bitandukanye imikino ya Shampiyona yarakomeje mu mpera z’icyumweru gishize, bamwe mu bakinnyi b’Abanyarwanda bakomeje gufasha amakipe yabo kwitwara neza, n’ubwo hari abo umusaruro ukomeje kubura.

Mu Misiri Al Masry ikinamo Mugisha Bonheur ntiyahiriwe n’impera z’icyumweru kuko yatsinzwe na Zamalek ibitego 3-0 mu mukino w’umunsi wa Gatandatu wa Shampiyona, uba uwa mbere itakaje muri Shampiyona ya 2025/26.

Uyu Munyarwanda ukina hagati yugarira yinjiye mu kibuga asimbuye ku munota wa 63.

Ishimwe Anicet ukina nka rutahizamu unyuze mu mpande, ntibakinnye umukino Olympique Beja akinira yo muri Tunisia yatsinzwemo na AS Soliman igitego 1-0 mu mukino w’umunsi wa gatanu. Uba umukino wa Gatanu wikurikiranya nta ntsinzi muri shampiyona.

Muri iyi Shampiyona y’icyiciro cya mbere muri Tunisia ni ho rutahizamu Nshuti Innocent akina, muri Espérance Sportive de Zarzis. Ku cyumweru uyu mukinnyi yinjiye mu Kibuga asimbuye ku munota wa 57, ubwo iyi kipe yatsindaga Avenir Sportif De Gabes igitego 1-0, yuzuza umukino wa gatanu idatsindwa muri Shampiyona.

Zire FK ikinamo Mutsinzi Ange muri Azerbaijan yanganyije na Qarabag igitego 1-1 mu mukino wa kane wa shampiyona, ifata umwanya wa gatatu n’amanota umunani irushwa n’iya mbere amanota abiri

Uyu myugariro w’u Rwanda yinjiye mu kibuga asimbuye ku munota 79.

Al Ahli Tripoli Manzi Thierry na Bizimana Djihad ikomeje imyitozo yitegura umukino wa mbere w’ijonjora rya mbere muri CAF Champions League izasuramo Dadje FC yo muri Benin ku wa Gatanu, tariki ya 19 Nzeri 2025.

Muri Algeria, rutahizamu Biramahire Abeddy yinjiye mu kibuga asimbuye ku munota 73 mu mukino w’umunsi wa kabiri wa Shampiyona ikipe ya ES Setif itsinda Constantine ibitego 2-1.

Rutahizamu Gitego Arthur ukinira FUS Rabat yo muri Morocco ntiyari mu bakinnyi iyi kipe yakoresheje mu mukino wa mbere Shampiyona ya 2025/26 batsinzwemo na Raja Club Athletic Cansabalaca ibitego 2-0.

Hakim Sahabo ukina muri Standard de Liège iri mu cyiciro cya mbere mu Bubiligi, yinjiye mu kibuga asimbuye ku munota wa 90+2, ubwo iyi kipe yanganya na KV Mechelen igitego 1-1 mu mukino w’umunsi wa Karindwi, yuzuza umukino wa kane wikurikiranya nta ntsinzi muri Shampiyona.

Samuel Gueulette ukinira RAAL La Louvière na yo ikina muri iyi Shampiyona na we yinjiye mu kibuga asimbuye ku munota 84 batsinda Club Brugge igitego 1-0, yongera kubona amanota atatu nyuma y’imikino itatu yikurikiranya nta ntsinzi.

Muri Sudani y’Epfo Jamus SC ikinamo Muhire Kevin, ikomeje gukora imyitozo yitegura umukino w’ijonjora rya mbere CAF Champions League bazahuramo na Al Hilal yo muri Sudani ku Cyumweru, tariki ya 21 Nzeri 2025.

Rhode Island ikinamo Kwizera Jojea yatsinze Indy Eleven igitego 1-0.

Muri uyu mukino Kwizera Jojea yasimbuwe ku munota wa 66.

Birmingham Legion ikinamo mugenzi we Phanuel Kavita, na yo iri kwitegura guhura na Tampa Bay mu mukino uteganyijwe ku wa Gatatu, tariki ya 17 Nzeri 2025.

Umunyezamu w’Amavubi, Ntwari Fiacre, akomeje kurwana no kubona umwanya wo gukina muri Kaizer Chiefs yo muri Afurika y’Epfo, we na bagenzi be ntibakinnye mu mpera z’icyumweru ahubwo bakomeje kwitegura umukino wa shampiyona bazakina na Sekhukhune United ku wa Kabiri, tariki ya 16 Nzeri 2025.

Abakinnyi bazakomeza kwitwara neza muri iyi mikino itandukanye bazaba bafite amahirwe yo kuzahamagarwa mu Ikipe y’Igihugu ’Amavubi’, yitegura imikino ya nyuma yo mu Itsinda C mu gushaka itike y’Igikombe cy’Isi cya 2026, aho u Rwanda ruzakira Benin tariki ya 6 Ukwakira mbere yo kwakirwa na Afurika y’Epfo tariki ya 10 Ukwakira 2025.