Abakinnyi b’Abanyarwanda bakomeje gushyira imbaraga nyinshi mu gufasha amakipe yabo by’umwihariko abakina hanze, mbere yo guhamagarwa mu ikipe y’igihugu “Amavubi” yitegura imikino ya FIFA Series izabera i Kigali muri Werurwe 2026.

Imvaho Nshya igiye kubagezaho uko bamwe muri bo bitwaye mu mpera z’icyumweru, baba abakina muri Afurika cyangwa hanze yayo.

Zire FK yo muri Azerbaijan ikinamo Mutsinzi Ange yatsinzwe na Bohemains Praha yo Czech Republic ibitego 3-1 mu mukino wa gishuti, uyu myugariro w’Umunyarwanda yakinnye umukino wose.

Hakim Sahabo ukina muri Standard de Liège iri mu cyiciro cya mbere mu Bubiligi, ntiyari mu bakinnyi bitabajwe mu mukino w’umunsi wa 21 wa Shampiyona batsinzwemo na Charleroi ibitego 2-0.

RAAL La Louvière na yo ikina muri iyi Shampiyona yaturutse inyuma itsinda Club Brugge ibitego 3-2, mu mukino Umunyarwanda Samuel Gueulette yabanje mu kibuga asimburwa ku munota wa 65.

Myugariro Emmanuel Imanishimwe ukinira AEL Limassol yo mu cyiciro cya mbere muri Cyrus yakinnye umukino wose, ikipe ye itsinda Akritas ibitego 2-0, iguma ku mwanya wa karindwi n’amanota 27.

Nairobi United yo muri Kenya ikinamo myugariro Buregeya Prince na Muhadjri Hakizimana iri kwitegura umukino wa Shampiyona ihuramo na Kenya Police FC kuri uyu wa Mbere.

Al Ahly Tripoli yo muri Libya ikinamo Manzi Thierry na Bizimana Djihad yitwaye neza itsinda Al Watan ibitego 2-0 mu mukino w’Umunsi wa gatanu wa Shampiyona.

Muri uwo mukino, Djihad Bizimana yinjiye mu kibuga asimbuye ku munota wa 78 mu gihe Manzi Thierry wavunitse atari mu bakinnyi bakoreshejwe.

Al Masry yo mu cyiciro cya mbere mu Misiri ikinamo Mugisha Bonheur we na bagenzi be bari kwitegura umukino wa 1/8 w’igikombe cy’igihugu izakinamo ZED FC ku wa 21 Mutarama 2026.

ES Setif yo mu cyiciro cya mbere muri Algeria ikinamo rutahizamu Biramahire Abeddy iri kwitegura umukino wa Shampiyona izakinamo USM Khenchela ku wa 23 Mutarama 2026.

Olympique Beja yo mu cyiciro cya mbere muri Tunisia ikinamo Ishimwe Annicet yanganyije na US Ben Guerdane ibitego 2-2 mu mukino wa 16 wa Shampiyona, uyu Munyarwanda hagati asatira ntiyari mu bakinnyi bakoreshejwe.

Rutahizamu w’Amavubi, Nshuti Innocent ukinira Espérance Sportive de Zarzis muri iyi Shampiyona yinjiye mu kibuga asimbuye ku munota 70 mu mukino ikipe ye yatsinzwemo na CS Sfaxien ibitego 2-0.

El Merriekh Bentiu ikinamo myugariro Ishimwe Saleh na Muhire Kevin wa Jamus SC bombi zo mu cyiciro cya mbere muri Sudani y’Epfo zikomeje kwitegura imikino yo kwishyura ya Shampiyona.

Ba uwa mbere mu kumenya amakuru agezweho!!!