Ubuyobozi bw’Ikigo cy’Igihugu cy’Ibarurishamibare mu Rwanda (NISR), muri raporo yayo ngarukakwezi, bwatangaje ko umusaruro w’inganda mu Rwanda wazamutseho 6,8% muri Kanama 2026 ugereranyije n’ukwezi kwa Kanama mu mwaka wabanje wa 2025.

Ku birebana nuwo musaruro mu by’inganda, iyo raporo yitwa IIP cyangwa [Index of industrial production] NISR yashyize ahagaragara igaragaza ko ubwiyongere bw’uwo musaruro w’ibikomoka ku nganda, bwagizwemo uruhare n’ibijyanye no gutunganya ibiribwa wiyongereyeho 7,0%, gutunganya ibikoresho birimo iby’ubwubatsi bidakozwe mu byuma birimo nk’ibirahuri, sima, amakaro n’ibindi wiyongeraho 10,4% naho ibikozwe mu byuma birimo nk’imashini n’ibindi bikoresho byiyongera ku kigero cya 10,8%.

Kuri iyo raporo NISR yashyize ahagaragara ku wa 5 Ukwakira 2026, yerekana ko umusaruro w’urwego rw’ubucukuzi bw’amabuye y’agaciro wiyongereyeho 26%, mu gihe umusaruro w‘urwego rwo gutunganya ibintu mu nganda umusaruro wabyo wazamutseho 4,8%,  amashanyarazi yazamutseho 17,6% na ho umusaruro waturutse ku bijyanye n’amazi no gutunganya imyanda uzamuka ku kigero cya 10,5% ugereranyije n’umwaka ushize wa 2025.

Umusaruro w’ibikomoka ku mbaho n’amacapiro warazamutse

NISR yagaragaje ko umusaruro w’ibinyobwa n’itabi wagabanyutse ku kigero cya 3,2%, ni mu gihe umusaruro w’ibikomoka ku mbaho, impapuro n’icapiro wo wazamutseho 7,3%.

U Rwanda rwakomeje guteza imbere inganda, ndetse mu 2006 rwatangije gahunda y’ibyanya by’inganda hagamijwe kwihaza mu bikorerwa mu gihugu, habanje icya Kigali mu gihe icya Rwamagana ari cyo cyashyizweho nyuma mu 2017.

Mu mpera z’umwaka ushize wa 2025, Minisiteri y’Ubucuruzi n’Inganda (MINICOM) yatangaje ko urwego rw’inganda rwazamutse rugatanga akazi ku byiciro  by’abantu batandukanye ndetse zigira uruhare mu gushyira ikinyuranyo ku biciro by’ibyoherezwa n’ibitumizwa mu mahanga.

Yves Kagame, Umuyobozi ushinzwe ihuzabikorwa ya Politiki y’u Rwanda yo guteza imbere Ibigo bito n’ibiciriritse n’ihanga ry’Imirimo muri MINICOM, na we yemeza ko urwego rw’inganda rurimo kugenda ruzamuka mu Rwanda.

Ni nyuma y’aho Leta ishyiriyeho ingamba zo guteza imbere ibikorerwa mu Gihugu. Akomeza avuga ko inganda zagiye zizamuka ku rwego rushimishije, ari naho Leta isabwa gushyira imbaraga.

Mu gikorwa cyo gutaha uruganda A- ZF Global Trading, rwagenewe gukora ibikombe bikozwe mu mpapuro byitwa  ISHEMA PAPER CUP tariki 6 Ukwakira 2026, MINICOM yasobanuye ko urwego abantu bagezeho ari rwiza. 

MINICOM ivuga ko urwego n’umuvuduko u Rwanda rugezeho ari rwiza, ariko hakiri urugendo rurerure, ni yo mpamvu muri Gahunda ya Guverinoma y’imyaka itanu yo kwihutisha iterambere hari icyizere cyo kwesa imihigo. 

Ba uwa mbere mu kumenya amakuru agezweho!!!