Umusifuzi mpuzamahanga w’Umunyarwanda, Uwikunda Samuel yatoranyijwe mu bazasifura imikino ya nyuma y’igikombe cya Afurika cy’abagabo, kizabera muri Maroc kuva tariki 21 Ukuboza 2025 kugera 18 Mutarama 2026.

Ku mugoroba wo kuri uyu wa Kabiri, tariki ya 25 Ugushyingo 2025, ni bwo Impuzamashyirahamwe y’Umupira w’Amaguru muri Afurika (CAF) yashyize ahagaragara urutonde rw’abasifuzi 28 bo hagati barimo Umunyarwanda Uwikunda Samuel ugiye gusifura iri rushanwa ku nshuro ya Kabiri yaherukagamo mu ntangiriro za 2024 ubwo ryari ryabereye muri Côte d’Ivoire.

Mu 2014 ni bwo yazamuwe gusifura mu Cyiciro cya Mbere cy’Umupira w’Amaguru mu Rwanda, yemezwa n’Ishyirahamwe ry’Umupira w’Amaguru ku Isi (FIFA) nk’umusifuzi mpuzamahanga mu 2017.

Uwikunda Samuel usanzwe asifura imikino Nyafurika irimo CAF Champions League na CAF Confederation Cup, yasifuye kandi Igikombe cya Afurika cy’Abatarengeje imyaka 20 cyabereye muri Mauritanie mu 2021 na CHAN 2022 yabereye muri Algeria.

Uwikunda w’imyaka 37 yakiniye Ikipe y’Abana y’Amagaju FC. Yakoze amahugurwa ajyanye n’imisifurire mu 2007 yari yateguwe n’Ishyirahamwe ry’Umupira w’Amaguru mu Rwanda (FERWAFA) mu gihe yatangiye gusifura mu 2008.

Mu bandi basifuzi batoranyijwe barimo Ghorbal Mustapha (Algeria)Gamou Youcef ( Algeria), Djindo Louis Houngnandande (Benin) Mdabihawenimana Pacifique ( U Burundi) , Nfere Aboub Abdoul ( Cameroon), Alhadji Allalou Mahamat ( Chad), Messie Jessie Oved N. Moutouo (Congo Brazaville) Kpan Clement Franklin ( Cote D’ivore) Ndala Ngambo Jean-Jacques ( RDC), Mohamed Mansour Maarouf (Misiri), Amin Mohamed Omar (Misiri).

Hari kandi Atcho Pierre Ghislain (Gabon), Mebiame Patrice Tanguy (Gabon), Daniel Nii Ayi Laryea (Ghana) Kamaku Peter Waweru (Kenya), Traore Boubou (Mali) , Abdel Aziz Bouh (Mauritania), Dahane Beida (Mauritania) Herallal Ahmed Imtehaz (Gambia), Jalal Jayed ( Maroc) ,Kach Grafe Mustapha (Maroc), Issa Sy (Senegal) Omar Abdulkadir Artan (Somalia) Abongile Tom (Afurika y’Epfo) Mahmood Ali Mahmood Ismail (Sudani) Mehrez Melki (Tunisia) Shamira Nabadda (Uganda).

Ba uwa mbere mu kumenya amakuru agezweho!!!