Abategura irushanwa rya Nyampinga ku Isi (Miss World 2026) bamaze kwemeza ko igihugu cya Vietnam ari cyo kizakira iryo rushanwa ku nshuro ya mbere mu mateka yacyo, igikorwa cyitezweho kuzamura ubukerarugendo no kugaragaza umuco n’ubwiza bw’iki gihugu ku rwego mpuzamahanga.

Ni irushanwa rigiye kuba ku nshuro ya 75 kuko ryatangiye mu 1951, rikazahuza abakobwa bari hagati ya 100 na 130 baturutse mu bihugu bitandukanye byo hirya no hino ku Isi. 

Biteganyijwe ko rizarangwa n’ibikorwa bitandukanye birimo kwerekana imideli, imikino, impano zitandukanye ndetse n’imishinga igamije gufasha abaturage aho bizakorwa n’abakobwa beza bahatanye mu bihugu byabo.

Mu itangazo ryashyizwe ku mbuga nkoranyambaga za Miss World mu ijoro ryo ku wa Kane tariki 26 Werurwe 2026, hemejwe aho iryo rushanwa rizabera. 

Ubuyobozi bwa Miss World bwagize buti: “Dushimishijwe cyane no gutangaza vuba aha, ko Isi yose izahurira muri Vietnam mu birori bidasanzwe byizihiza imyaka 75 y’ubwiza bufite intego n’ubumwe bwayo.”

Abategura Miss World bavuga ko ari amahirwe akomeye kuri Vietnam yo kumenyekanisha umuco w’iki gihugu, amateka yacyo n’ubukerarugendo bwayo, bikayifasha kwiyubaka nk’igihugu gifite ubwiza, umuco n’inzozi bigana ku iterambere.

Ku ruhande rwa Vietnam, hazitabira Le Nguyen Bao Ngoc, umukobwa w’imyaka 25 ukomoka mu Mujyi wa Can Tho mu gace ka Mekong Delta, ufite uburebure bwa metero 1na santimetero 86, aho yigeze kuba igisonga cya mbere muri Miss Vietnam 2022, nyuma aza no kwegukana ikamba rya Miss Intercontinental 2022.

Miss World yashinzwe mu 1951 mu Bwongereza, rikaba ari ryo rushanwa rimaze igihe kirekire kurusha andi marushanwa y’ubwiza ku Isi. Mu myaka yashize, Miss World yashyize imbaraga cyane ku butumwa bwayo ku bwiza bufite intego “Beauty with Purpose”, rishishikariza abakobwa baryitabira guhuza ubwiza n’ubwenge, no kugira uruhare mu bikorwa bifasha sosiyete.

Vietnam yagiye igira abakobwa bitwaye neza muri iri rushanwa, barimo Tran Ngoc Lan Khue wageze mu bakobwa 11 ba mbere mu 2015, Luong Thuy Linh wageze muri 12 ba mbere mu 2019, na Do Thi Ha wageze muri 13 ba mbere mu 2021.

Uko Abanyarwandakazi bitabiriye Miss World

U Rwanda rwagiye ruhagararirwa mu irushanwa rya Miss World mu bihe bitandukanye aho ku ikubitiro rwaserukiwe na Miss Bahati Grace, mu mwaka wa 2009.

Nyuma yaho hakurikiyeho abandi barimo Mutesi Kayibanda Aurore wiryitabiriye mu 2012, aho yanitwaye neza akagera mu bakobwa 30 ba mbere (Top 30).

Kundwa Doriane mu 2015, Elsa Iradukunda mu 2017 ndetse na Naomie Nishimwe mu 2021 (kubera ko irushanwa ryari ryarasubitswe mu gihe cya COVID-19). Icyakora nubwo u Rwanda rumaze kwitabira kenshi ntawe uragira amahirwe yo kwegukana ikamba.

Kugeza ubu, ntiharamenyekana neza niba hari uzahagararira u Rwanda muri Miss World 2026, dore ko amarushanwa ya Miss Rwanda yahagaritswe mu 2022.

Ba uwa mbere mu kumenya amakuru agezweho!!!