Ku nshuro ya mbere, ikipe ya APR Volleyball Club ifite igikombe cya Shampiyona giheruka ntizagaragara mu makipe ane ya mbere azakina imikino ya Kamarampaka yo guhatanira igikombe cya Shampiyona ya Volleyball 2025/26.

Amahirwe y’iyi kipe yayoyotse nyuma yo gutsindwa na REG VC amaseti 3-1 mu mukino wabereye kuri Petit Stade mu ijoro ryo ku wa Gatandatu, tariki ya 28 Gashyantare 2026.

Wari umukino w’ishiraniro hagati y’impande zombi, aho APR VC yasabwaga gutsinda amaseti abiri gusa igakomeza. 

Ku rundi ruhande REG VC yasabwaga gutsinda nibura amaseti 3-0 cyangwa amaseti 3-1 ku buryo yegukana amanota atatu. 

Muri uyu mukino, APR VC yatangiye neza ndetse yegukana iseti ya mbere ku manota 25-19.

Ikipe ya Sosiyete y’Igihugu Ishinzwe Ingufu (REG) yasubiranye imbaraga mu iseti ya kabiri ibifashijwemo n’abakinnyi barimo Merci Gisubizo yegukana iyi seti ku manota 25-18.

Iyi kipe itozwa na Mugisha Bavuga Benon yakomerejeho no mu iseti ya gatatu, iyitsinda bigoranye ku manota 25-23.

Iseti ya kane y’umukino yari nk’iseti ya kamarampaka kuko amakipe yombi yasabwaga kuyegukana akabona itike ya kamarampaka bidasubirwaho. 

REG VC ni yo yitwaye neza muri iyi seti iyegukana ku manota 25-20, ihita ikatisha itike yo gukina imikino ya kamarampaka yo guhatanira igikombe cya Shampiyona ya Volleyball 2025/26.

Gutsindwa uyu mukino kuri APR VC  ifite ibikombe byinshi bya shampiyona mu Rwanda byatumye ibura mu makipe ane ya mbere azakina imikino ya kamarampaka bwa mbere mu mateka kuva yashingwa.

APR VC yari yasoje imikino ya Shampiyona iyoboye ariko umusaruro mubi yagize mu mikino yo kwishyura ni yo ntandaro yo kudakina imikino ya kamarampaka.  

REG VC yasanze andi makipe azakina iyi mikino ari yo Gisagara VC, Kepler VC na Police VC.

Ba uwa mbere mu kumenya amakuru agezweho!!!