Shampiyona ya Volleyball yakomeje hakinwa umunsi wa Gatanu wasize amakipe amwe atanze ubutumwa cyane ko yari ahanganye n’ayo bahatanira igikombe.

Mu bagore, Police WVC yatsinze Kepler WVC amaseti 3-2, mu bagabo, APR VC itsinda Gisagara amaseti atatu 3-0, mu gihe na REG VC yatsinze  RP Ngoma VC 3-0.

Umukino wa Police WVC na Kepler WVC wari uhanzwe amaso cyane kuko iyi Kipe ya Polisi y’igihugu yifuzaga gukomeza urugendo rwo kudatsindwa ni mu gihe yashakaga intsinzi ya mbere muri Shampiyona.

Kepler VC yatangiye neza itsinda iseti ya mbere ku manota 32-30, mu iseti ya kabiri, Polisi yiminjiriyemo agafu iyitsinda bigoranye ku manota 25-17.

Ikipe ya Kepler WVC yongeye gutsinda iya gatatu ku manota 25-16, Police WVC nayo itsinda iya kane kuri 25-16. Amakipe yombi yanganyije amaseti abiri ku yandi bityo hashyirwaho iya kamarampaka.

Police WVC yitwaye neza iyitsinda ku manota 15 kuri 12 bityo itsinda umukino ku maseti 3-2. Iyi kipe yahise ishimanganira gukomeza kuba ku mwanya wa mbere.

Hakurikiyeho umukino wa nyuma wari witezwe cyane wahuje ikipe ya APR VC mu Bagabo na Gisagara VC.

Uyu mukino watangiye wegeranye cyane nta kipe ijya imbere amanota arenze abiri.

Mu minota ya nyuma, APR VC yongereye ikinyuranyo bituma yegukana iseti ya mbere ku manota 25-23.

Mu iseti ya kabiri, ikipe y’ingabo yakomeje kurusha cyane Gisagara VC yagorwaga no kugarira neza bitewe n’amakosa ya bamwe mu bakinnyi bahagararaga nabi. Iyi seti yayegukanye ku manota 25-17.

Iyi Kipe yakomerejeho mu iseti ya gatatu ikomeza kurusha iya Gisagara VC yagaragazaga imbaraga nke mu mikinire yayo iyitsinda ku manota 25- 19.

Umukino warangiye APR VC yatsinze Gisagara VC amaseti 3-0 yongera kubona intsinzi nyuma yo gutsindwa umukino uheruka na Kepler VC mu karere ka Gisagara.

Uyu mukino wabaye uwa mbere Gisagara VC itakaje muri Shampiyona ya 2025/26.

Iyi mikino irakomeza kuri uyu wa Gatandatu, Mu bagore guhera saa yine za mu gitondo irakina na Ruhango, East Africa University irahura na Rwanda Revenue Authority saa sita.

Mu bagabo, saa munani APR VC irahura na Kirehe VC, Gisagara VC irahura na KVC saa kumi mu gihe guhera saa kumi n’ebyiri Kepler icakirana na East Africa University. Imikino yose irabera muri Petit Stade i Remera.

Amafoto: TUYISENGE Olivier

Ba uwa mbere mu kumenya amakuru agezweho!!!