Muri gahunda yo gukomeza gusaranganya abaturage amafaranga ava mu bukerarugendo, ubuyobozi bwa Pariki y’Igihugu y’Akagera bwatangaje ko bufite gahunda yo gusaranganya imishinga inyuranye amadolari ya Amerika 886 379, ni ukuvuga asaga miliyari 1,2 y’amafaranga y’u Rwanda, muri uyu mwaka wa 2026.

Ni mu gihe mu mwaka ushize wa 2025, imishinga itandukanye y’abaturiye Pariki y’Igihugu y’Akagera yasaranganyijwe amadolari y’Amerika 555 242 (miliyoni zisaga 810 z’amafaranga y’u Rwanda), yafashije abaturage barenga 1 200 bibumbiye muri koperative zinyuranye.

By’umwihariko imishinga yatewe inkunga irimo ubuvumvu bwabonye umusaruro wa toni zirenga 17 z’ubuki zinjije amadolari ya Amerika 84 000 (amafaranga y’u Rwanda asaga ibihumbi 122), mu gihe ubworozi bw’amafi na bwo bwinjirije koperative zibukora amadolari ya Amerika 122 356, ni ukuvuga miliyoni zisaga 178 z’amafaranga y’u Rwanda.

Ubuyobozi bwa Pariki y’Igihugu y’Akagera buhamya ko indi mishinga yinjije agatubutse ishingiye kuri serivisi zo kuyobora ba mukerarugendo zitangwa na Community Freelance Guides, Akagera Builders Cooperative hamwe n’ibikorwa bifite aho bihuriye no kwakira abantu n’amahoteli muri rusange.

Ku rundi ruhande imishinga y’abaturage n’ibyo Pariki yaguze mu bayituriye byagize uruhare rw’amadolari ya Amerika asaga 637 000, ni ukuvuga miliyoni zisaga 929 z’amafaranga y’u Rwanda.  

Gahunda yo gusaranganya amafaranga ava mu bukerarugendo (Tourism Revenue Sharing Program) yashyizweho kuva mu 2005, igamije gufasha abaturage baturiye Pariki z’Igihugu kugira uruhare mu kubungabunga urusobe rw’ibinyabuzima, binyuze mu kubaha inyungu ziva mu bukerarugendo.

Iyi gahunda yafashije abaturage baturiye Pariki kubona inyungu ziva mu bukerarugendo, kugabanya amakimbirane hagati y’abaturage n’ibikorwa byo kubungabunga Pariki, no guteza imbere imibereho myiza y’abaturage binyuze mu mishinga y’iterambere.

Mu myaka 20 ishize, abaturage baturiye Pariki z’Igihugu mu Rwanda bamaze gusaranganywa miliyari zikabakaba 20 z’amafaranga y’u Rwanda, bigira uruhare mu kubaka amashuri, amavuriro, imihanda n’ibindi bikorwa remezo, kandi bikaba byaragabanyije amakimbirane hagati y’abaturage n’ibikorwa byo kubungabunga Pariki.

Urwego rw’Iterambere mu Rwanda (RDB) ruvuga ko iyi gahunda imaze gushyigikira imishinga isaga 1 000 inoza imibereho myiza n’iterambere ry’abaturage irimo amashuri, ibigo nderabuzima, iyo kwimakaza kubungabunga ubuzima no kunoza imibereho y’abaturiye Pariki z’Igihugu.

Ba uwa mbere mu kumenya amakuru agezweho!!!