Kuri uyu wa 3 Mata 2026, Urwego Ngenzuramikorere (RURA) rwatangaje ibiciro bishya ntarengwa by’ibikomoka kuri peteroli, kimwe n’ibiciro bishya by’ingendo mu Mujyi wa Kigali no mu Ntara. Lisansi yazamutseho 314 Frw kuko ibiciro byaherukaga gushyirwaho tariki ya 5 Werurwe lisansi yari ku 1,989 Frw naho mazutu yari ku 1,948Frw, yo yazamutseho 257 Frw.

Urwego Ngenzuramikorere (RURA) rwatangaje ko ku guhera ku wa 4 Mata 2026, saa kumi n’ebyiri za mu gitondo, ibiciro ntarengwa by’ibikomoka kuri peteroli, habariwemo n’umusoro ku nyongeragaciro (VAT), bivuruwe ku buryo lisansi itarenga amafaranga y’u Rwanda 2,303 kuri Litiro. Naho mazutu ntirenge amafaranga y’u Rwanda 2,205 kuri Litiro.

Ibiciro bishya byashyizweho hashingiwe ku mpinduka ziri ku isoko mpuzamahanga ry’ibikomoka kuri peteroli, ndetse n’ingamba Leta y’u Rwanda yafashe mu guhangana n’ingaruka z’impinduka zigenda ziyongera ku rwego rw’Isi.

RURA yakomeje itangaza ko hashingiwe ku mpinduka z’ibiciro by’ibikomoka kuri peteroli, n’ibindi bigenderwaho mu gushyiraho igiciro, ibiciro fatizo by’ingendo rusange na byo byavuguruwe, aho mu Mujyi wa Kigali ari 59.28 FRW ku mugenzi ku kilometero, naho mu Ntara akaba ari 41.58 FRW ku mugenzi ku kilometero. Ibi biciro bizatangira gushyirwa mu bikorwa guhera ku wa Mbere, tariki ya 06 Mata 2026.

RURA yagiriye inama abaturarwanda  guteganya neza ingendo zabo, gukoresha imodoka zitwara abagenzi mu buryo bwa rusange no kwirinda ingendo zitari ngombwa, hagamijwe kugabanya ikoreshwa ry’ibikomoka kuri peteroli. Yijeje ko izakomeza gukurikirana imigendekere y’isoko no kugenzura itangwa rya serivisi zinoze.

Abacuruzi basabwe kudatumbagiza ibiciro

Minisitiri w’Ubucuruzi n’Inganda, Prudence Sebahizi, yasabye abacuruzi kuturirira ku izamuka by’ibiciro by’ibikomoka kuri Peteroli  ngo batumbagize ibiciro by’ibicuruzwa.

Ati: “Icyo nabwira Abanyarwanda n’abacuruzi muri rusange niba aho tubona izamuka rya 60% ku isoko mpuzamahanga, mu gihugu tugerageza kurishyira hasi ya 15%, izamuka ry’ibiciro bya peteroli  naryo ntabwo ryagombye kuba urwitwazo kugira ngo n’ibindi bicuruzwa bizamuke cyane ku buryo bw’umurengera”

Yakomeje agira ati: “Hagomba kubaho gushyira mu gaciro, tukumva ko ari ibyacu, ntawuhima undi, Umunyarwanda ubushobozi bwe turabuzi, ubwo abacuruzi badufashe ntihabeho izamuka rikabije, ahubwo habeho kugerageza guhuza ibiciro biri ku isoko n’ubushobozi bwo kubigura ku isoko mpuzamahanga.”

Minisitiri w’Ubucuruzi n’Inganda kandi yasobanuye ko izamuka ritaturutse ku banyarwanda ubwabo. Ati: “Bibanze byumvikane neza ko izi mpinduka ntabwo ziduturutseho nk’Abanyarwanda, ni impinduka ziturutse ku izamuka ry’ibiciro n’ihungabana ry’ubukungu ku isoko mpuzamahanga.”

Yongeyeho ati: “Ibiciro bya peteroli ku isoko mpuzamahanga, mu kwezi gushize byazamutse hejuru ya 60%, ariko iyo urebye aya mavugurura yakozwe hararengaho nka 13%, bivuga ko hari ingamba ziri gufatwa ngo ingaruka zibe nke ku Gihugu cyacu, ariko ntaho twazihungira zigomba kubaho, ntaho twazihungira ahubwo tugomba kubyijiramo tukareba icyo twakora ngo zitaba nyinshi cyane.”

Ba uwa mbere mu kumenya amakuru agezweho!!!