Minisiteri y’Ibikorwa Remezo, MININFRA, itangaza ko kuva muri Gashyantare 2024, uruganda Shema Power Lake Kivu Limited (SPLK Ltd) rukura gaze Methane mu kiyaga cya Kivu rukora neza kandi ko amashanyarazi yatangiye kugezwa ku baturage.

Mu kiganiro Minisitiri w’Ibikorwa Remezo, Dr Jimmy Gasore, yahaye Imvaho Nshya yemeza ko Umushinga SPLK watangiye gukora.

Yagize ati: “Umushinga Shema Power Lake Kivu watangiye gukora by’igerageza muri Nzeri 2023, muri Gashyantare 2024 kuva icyo gihe uruganda rurakora neza kuko rutanga megawatt 56. Megawatt 6 zikoreshwa n’uruganda, izisigaye zigahabwa Ikigo gishinzwe gukwirakwiza Umuriro w’Amashanyarazi (EUCL).”

Gahunda ya Guverinoma y’imyaka itanu 2024-2029 (NST2), igaragaza iterambere mu nzego zitandukanye by’umwihariko kongerera ingufu z’amashanyarazi. Intego ni ukugeza umuriro w’amashanyarazi ahantu hose hari ibikorwa remezo by’iterambere no mu tugari twose, hanongerwa uruhare rw’ingufu zisubira.

Mu gukomeza gukwirakwiza amashanyarazi hiryo no hino mu gihugu, hazibandwa ku nganda, inzu z’ubucuruzi, amashuri, ibigo by’ubuvuzi n’ibindi bigira uruhare mu iterambere n’imibereho myiza y’abaturage.

umushinga Shema Power Lake Kivu (SPLK) washoye agera muri miliyoni 400$ mu bikorwa byo gucukura gaze méthane mu Kiyaga cya Kivu.

Ni umushinga washyizwe mu bikorwa ku bufatanye bwa Guverinoma y’u Rwanda n’iyi Sosiyete SPLK Ltd, ukaba waratangijwe ku wa 3 Ukwakira 2019.

Uzagira uruhare mu kugabanya ikoreshwa ry’ingufu zangiza ibidukikije, harimo gucana inkwi n’amakara, ibisigazwa by’imyaka n’ibindi.

Mu bilometero 6 uvuye ku mwaro aho uruganda nyirizina rwubatse werekeza mu mazi hagati, aho ni ho hari ibikorwa remezo bifasha gucukura gaze Methane iri muri metero ziri hagati ya 300 na 400 z’ubujyakuzimu y’amazi y’ikiyaga cya Kivu.

Mu mpera za 2023, uruganda rwa SPLK rwatunganyaga gaz Méthane mu Kivu rukayibyaza amashanyarazi Megawatt 37.5 mu zisaga 50 rwohereza mu muyoboro mugari w’amashanyarazi, aho rwubatse mu Murenge wa Nyamyumba mu Karere ka Rubavu.

Imvaho Nshya irabagezaho amafoto y’Umushinga Shema Power Lake Kivu (SPLK) ukura umuriro w’amashanyarazi muri gaze méthane iri mu Kiyaga cya Kivu.

Amafoto: MININFRA

Ba uwa mbere mu kumenya amakuru agezweho!!!