Al Hilal SC yatsinzwe na RS Berkane igitego 1-0 mu mukino wo kwishyura wa ¼ cya CAF Champions League, isezererwa ku giteranyo cy’ibitego 2-1 mu mikino yombi. 

Uyu mukino w’ishiraniro wabereye kuri Stade Amahoro, ku mugoroba wo kuri iki Cyumweru, tariki ya 22 Werurwe 2026.

Umukino ubanza amakipe yombi yari yanganyije igitego 1-1.

Al-Hilal yagiye gukina uyu mukino isabwa gutsinda cyangwa kunganya ubusa ku busa kugira ngo igere muri 1/2 cy’iri rushanwa nyafurika ku nshuro ya kabiri yikurikiranya.

Ku rundi ruhande RS Berkane FC yo yasabwaga gutsinda cyangwa kunganya hejuru y’ibitego bibiri. 

Ni umukino watangiye ugenda gake, amakipe yombi akinira cyane mu kibuga hagati, nta n’imwe irema uburyo bw’igitego. 

Ku munota wa 11, RS Berkane yashoboraga gufungura amazamu ku mupira wavuye ku ruhande rw’iburyo, usanga, Youness El Kaabi awuteye ukurwaho neza n’umunyezamu Soufiane. 

Mu minota 20, Al Hilal SC yinjiye mu mukino itangira gusatira izamu rya RS Berkane binyuze ku ruhande rw’ibumuso rwacagaho Jean Claude Girumugisha. 

Mu minota 35, umukino wagabanyije umuvuduko, umupira ukinirwa cyane mu kibuga, bituma n’uburyo bwo kurema igitego buba buke ku mpande zombi.

Igice cya mbere cyarangiye amakipe yombi anganyije ubusa ku busa.

Al Hilal SC yagarukanye imbaraga nyinshi mu igice cya kabiri isatira cyane izamu rya RS Berkane. 

Ku munota wa 54’ Al Hilal SC yafunguye amazamu ku gitego cyatsinzwe na Adama Coulibali ku ishoti rikomeye yatereye mu rubuga rw’amahina ariko umusifuzi  yifashishije VAR asanga 

Rutahizamu wa RS Berkane yari yakorewe ikosa mu rubuga rw’amahina mbere y’uko iyi kipe izamukana umupira igatsinda igitego, ahita yemeza ko ari Penaliti.

Iyi Penaliti yatewe na Mounir Chouiar umupira ukurwamo neza n’umunyezamu Soufiane Ouedraogo. 

Iyi kipe yo muri Sudani yakomeje gusatira ishaka igitego ariko umunyezamu Anas Zniti n’ubwugarizi bwe bakomeza guhagarara neza.

Mu minota 70, Amakipe yombi yakomeje gusatirana ashaka igitego ariko abakinnyi bayo basatira bakogorwa no kubyaza umusaruro uburyo babonaga. 

Iminota 10 nyuma yaranzwe na gusatira kwa RS Berkane harimo umupira watewe na Paul Bassene, ukurwamo neza n’umunyezamu Sofiane Farid Ouedraogo wagize umukino mwiza. 

Mbere y’uko umukino urangira, Umusifuzi wa Kane yatangaje iminota irindwi y’inyongera

Ku munota wa 90+3, Mounir Chouiar yatsindiye RS Berkane igitego cya mbere ku mupira yacomekewe na Zidane Machach ahita aroba umunyezamu uruhukira mu rushundura. 

Umukino warangiye Al Hilal SC itsinzwe na RS Berkane igitego 1-0, isezererwa ku giteranyo cy’ibitego 2-1 mu mikino yombi. 

Iyi kipe yo muri Sudani yifuzaga kugera muri ½ cy’iri rushanwa ku nshuro ya kabiri yikurikiranya, ariko biranga.

Muri ½, RS Berkane izahura na AS FAR Rabat y’iwabo muri Maroc yasezereye Pyramids FC ifite igikombe giheruka.

Undi mukino wabaye kuri iki Cyumweru, ni uwa Stade Malien yatsinze Mamelodi Sundowns ibitego 2-0 ariko isezererwa n’iyi kipe yo muri Afurika y’Epfo kuko umukino ubanza yawutsinzwemo ibitego 3-0.

Muri ½, Mamelodi Sundowns izahura na Esperance du Tunis yasezereye Al Ahly.

Ba uwa mbere mu kumenya amakuru agezweho!!!