U Rwanda na Djibouti byasinyanye amasezerano, 9 arimo 5 y’ubufatanye hagamijwe kurushaho gushimangira ubutwererane no gutsura umubano.

Ni amasezerano yasinywe kuri uyu wa 13 Ugushyingo, ubwo Amb Nduhungirehe yitabiriye inama ya 2 ya Komisiyo ihuriweho na Minisiteri z’Ububanyi n’Amahanga z’u Rwanda na Djibouti.

Ni amasezerano yashyizweho umukono na Minisitiri w’Ububanyi n’Amahanga w’u Rwanda, Amb Nduhungirehe Olivier na Minisititri w’Ububanyi n’Amahanga wa Djibouti, Abdoulkader Houssein Omar.

Impande zombi zasinyanye amasezerano icyenda y’imikoranire mu nzego zirimo Siporo, ubuzima no guteza imbere umuryango.

Inama ihuza kKomisiyo ihuriweho n’ibihugu byombi iba igamije gushyiraho urubuga rwo gusuzuma ishyirwa mu bikorwa ry’amasezerano asanzwe ariho no kongera imbaraga mu gushimangira ubutwererane hagati y’ibihugu byombi.

U Rwanda na Djibouti ni ibihugu bifitanye umubano mwiza ndetse muri Gicurasi umwaka ushize, Abakuru b’Ibihugu byombi baganiriye ku bufatanye buri hagati y’u Rwanda na Djibouti.

Umubano w’u Rwanda na Djibouti ushingiye ku bufatanye mu nzego zirimo ubuhinzi, ubukerarugendo, amahugurwa mu byerekeye dipolomasi, ubwikorezi bwo mu kirere, ishoramari, ikoranabuhanga n’urw’abinjira n’abasohoka.

Ibihugu byombi byahanye ubutaka bwo gukoreraho ibikorwa by’ubucuruzi n’ishoramari.

Mu 2013, Djibouti yahaye u Rwanda ubutaka bwa hegitari 20 n’izindi hegitari 20 mu 2017, bwose bukaba ari ubwo gukoreraho ibikorwa by’ubucuruzi n’ishoramari, ndetse muri Werurwe 2016, u Rwanda na rwo rwahaye Djibouti ubutaka bungana na hegitari 10 mu cyanya cyahariwe inganda i Masoro mu Karere ka Gasabo.

Guverinoma ya Djibouti mu mwaka wa 2021 ibinyujije mu cyambu cyayo gifite mu nshingano gukurikirana iby’inganda kizwi nka DPFZA (Djibouti Ports and Free Zones Authority) bashyize umukono ku masezerano y’ubufatanye hamwe na Sosiyete ‘Prime Economic Zone’ (PEZ) yerekeranye no kubyaza umusaruro ubutaka u Rwanda rwahaye iki gihugu.

Icyo gihe Umuyobozi wa DPFZA, Omar Hadi Aboubaker, yatangaje ko ubwo butaka ari bimwe mu bizafasha kwagura ibikorwa by’ishoramari.

Ba uwa mbere mu kumenya amakuru agezweho!!!