BAL 2022 : Ikipe ya US Monastir na Petro de Luanda zageze ku mukino wa nyuma

BAL 2022 : Ikipe ya US Monastir na Petro de Luanda zageze ku mukino wa nyuma

NTAWITONDA JEAN CLAUDE

May 26, 2022

Petro de Luanda 88-74 FAP

Zamalek 81-88 US Monastir

Umwanya wa gatatu

Taliki 27-05-2022

Zamalek -FAP (BK Arena-19h00)

Umukino wa nyuma

Taliki 28-05-2022

Petro de Luanda-US Monastir (BK Arena-18h00)

Ikipe ya US Monastir yo muri Tunisia ndetse na Petro de Luanda yo muri Angola zamaze gukatisha itike yo gukina  umukino wa nyuma mu irushanwa ry’Afurika ry’amakipe yatwaye ibikombe  iwayo muri Basketball mu bagabo  “Africa Basketball League 2022”

Mu mikino ya ½ cy’irangiza yabaye taliki 25 Gicurasi 2022, ikipe ya Petro de Luanda yo muri Angola  yari yegukanye umwanya wa gatatu muri BAL 2021  yasezereye ikipe ya FAP yo muri Cameroun ku manota 88 kuri 74.

Ubwo Petro de Luanda yakinaga na FAP

Ikipe ya Petro de Luanda yatsinze uduce 3 twa mbere ku manota 22-13, 24-22 na 23-12 mu gihe FAP yatsinze agace ka 4 ku manota 27 kuri 19.

 Umukinnyi wa Petro de Luanda, Childe Dundão ni we watsinze amanota menshi muri uyu mukino (18).

Ikipe ya US Monastir yo muri Tunisia yageze  ku mukino wa nyuma wa BAL   isezereye ikipe ya Zamalek  yo mu Misiri  ku manota 88 kuri 81.

Ikipe ya Zamalek yatangiye neza itsinda agace ka mbere ku manota 22 kuri 16 nyuma ikipe ya US Monastir yitwaye neza itsinda  uduce dutatu twa nyuma ku manota 19 kuri 18, 29-18 na 24-23.

Umukinnyi Mikhael McKinney wa Zamalek  ni we watsinze amanota menshi  muri uyu mukino (26).

Ikipe ya US Monastir yihimuye kuri Zamalek kuko muri BAL 2021 ubwo yakinwa ku nshuro ya mbere, Zamalek yatsinze US Monastir ku mukino wa nyuma iyitwara igikombe ku manota 76 kuri 63.

Gahunda y’imikino ya nyuma

Biteganyijwe ko ku wa Gatanu  taliki 27 Gicurasi 2022 hazaba umukino wo guhatanira umwanya wa 3 uzahuza ikipe ya Zamalek ifite igikombe giheruka   na FAP  yari yasoreje ku mwanya wa 7 muri BAL 2021. Uyu mukino uzabera muri BK Arena kuva saa kumi n’ebyiri z’umugoroba (18h00).

Umukino wo guhatanira igikombe uzahuza ikipe ya Petro de Luanda na US Monastir, ku wa Gatandatu taliki 28 Gicurasi 2022, kuva saa kumi n’ebyiri (18h00).

Iyi mikino ya BAL 2022 yatangiye gukinwa muri Werurwe 2022 ahabaye imikino y’amajonjora yabereye i Dakar na Cairo nyuma amakipe 8 muri 12  agakomereza i Kigali mu mikino ya  nyuma.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA