Mu mpera z’icyumweru gishize taliki 19 Ugushyingo 2022 hatangiye umwaka w’imikino muri Rugby “Rwanda Rugby League Season 2022-2023” mu cyiciro cy’abakina  ari 15 “15 Aside” mu bagabo. Iyi shampiyona ikaba yaherukaga gukinwa muri 2018-2019 mbere ya COVID-19.

Ku munsi wa mbere w’iyi shampiyona hakinwe imikino 3. Ikipe ya Lion de Fer RFC ifite igikombe giheruka yatsinze 1000 Hills RFC amanota 17 ku 10. Uyu mukino wabereye ku kibuga cya Croix Rouge Kacyiru.

Aya makipe akaba ari yo yaherukaga guhura ku munsi wa nyuma wa shampiyona ya 2018-2019 aho Lion de Fer  RFC yegukanye igikombe itsinze 1000 Hills RFC.

Umwe mu bakinnyi b’ikipe ya Lion de Fer  RFC, Kamanzi Didier yatangaje ko bishimiye gutsinda ikipe ya  1000 Hills RFC kuko basanzwe bahangana ndetse inabarusha kuko ifite abakinnyi bakiri bato bafite imbaraga ariko bo bakabarusha ubunararibonye kuko bakuze.

Yakomeje avuga ko bishimiye kandi gutangira shampiyona batsinda ndetse bakanatsinda ikipe bahangana buri gihe.

Kuba imyaka 3 yari ishize iyi shampiyona idakinwa, Kamanzi avuga ko urwego rusa n’urwasubiye hasi. Ati : “Turacyafite byinshi byo gukosora, twicaye igihe kinini, dukeneye kongera gukorera hamwe kugira ngo urwego rwongere ruzamuke.”

Kapiteni w’ikipe ya Lion de Fer  RFC, Korukwishaka Patrick yatangaje ko iyi ntsinzi bayishimiye cyane ndetse iberetse urwego bariho. Ati: “Iyi kipe isanzwe itugora gusa ubwo twaherukaga guhura muri shampiyona twari twayitsinze none n’ubu turayitsinze.”

Yakomeje avuga ko nubwo batsinze ariko batakinnye neza kubera igihe bari bamaze badakina ariko mu mukino utaha bazitwara neza kurushaho kuko intego bafite ni ukongera kwegukana iki gikombe.

 Kapiteni wa 1000 Hills RFC, Rukundo Jackson yatangaje ko batsinzwe  ariko uyu ari umukino wa mbere ko  bagiye gushyiramo  imbaraga ku buryo mu mikino ikurikiraho bagomba kwitwara neza.

Umutoza w’ikipe ya 1000 Hills RFC, Nsengimana Jean D’Amour  yatangaje ko  gutsindwa uyu mukino ari isomo rikomeye. Ati : “Iyi kipe ya Lion de Fer  RFC  irakomeye  gusa natwe ntitworoshye. Uyu wari umukino wa mbere nta bwo birangiye tugiye gushyiramo imbaraga kugira ngo tuzitware neza mu mikino itaha.

Yakomeje avuga ko gutsindwa hari igihe biba byiza kuko iyo batsinda bari kwirara ariko ubu babonye aho bagiye kongera imbaraga kugira ngo bazitwara neza mu mikino isigaye.

Umutoza w’ikipe ya Lion de Fer  RFC, Kamali Vincent yatangaje ko bishimiye intsinzi. Ati : « Iyi ni ikipe buri  gihe tuba duhanganye, iyo tuyitsinze biba bishimishije. »

Yakomeje avuga ko iyi ari intangiriro nziza ko bagomba gukomeza gushyiramo imbaraga kugira ngo bazongere begukane igikombe.

Umutoza Kamali avuga ko kubera igihe cyari gishize  shampiyona itaba urwego rwasubiye hasi ariko mu mikino nk’itatu iri imbere bizaba bimeze neza.

Mu yindi mikino yabaye, ikipe ya Muhanga Thunders RFC yitwaye neza itsinda Kamonyi Puma RFC  amanota 34 kuri 3. Umukino wabereye mu Karere ka Kamonyi.

Ikipe ya Resilience RFC yatsinze Kigali Sharks RFC ku manota 17 kuri 15. Uyu mukino wabereye muri TTC Mururu mu Karere ka Rusizi aho ikipe ya Resilience RFC ibarizwa.

Nyuma y’imikino y’umunsi wa mbere, Visi Perezida w’ishyirahamwe ry’umukino wa Rugby mu Rwanda « RRF »,  Gakirage Philippe yatangaje ko bishimishije kuba imikino yongeye gukinwa  nyuma y’imyaka 3.

Yakomeje avuga ko kubera igihe cyari gishize hari ibyo gukosora ngo umukino wongere usubire ku rwego rwiza.

Imikino y’umunsi wa kabiri biteganyijwe ko izaba taliki 26 Ugushyingo 2022 aho ikipe ya  1000 Hills RFC izakina na Resilience (11h00),  Kigali Sharks yakire  Kamonyi Puma (13h00) naho  ikipe ya  Lion de Fer RFC  ikine na Muhanga Thunders RFC (15h30). Iyi mikino  yose  izabera ku Kibuga cya Croix Rouge Kacyiru.

Shampiyona y’uyu mwaka wa 2022-2023  yitabiriwe n’amakipe 6 ari yo Lion de Fer RFC, 1000 Hills RFC, Resilience RFC, Kamonyi Puma RFC, Muhanga Thunders RFC na Kigali Sharks RFC. Amakipe azahura hagati yayo mu mukino ubanza n’uwo kwishyura, ikipe izasoza ifite amanota menshi ni yo izegukana igikombe. Iyi shampiyona nta gihindutse ikaba izasozwa muri Werurwe 2023.

Ba uwa mbere mu kumenya amakuru agezweho!!!