Amagare: Ikipe y’u Rwanda ntiyahiriwe n’umunsi wa mbere wa shampiyona y’Afurika 2022

Amagare: Ikipe y’u Rwanda ntiyahiriwe n’umunsi wa mbere wa shampiyona y’Afurika 2022

NTAWITONDA JEAN CLAUDE

March 23, 2022

Kuva kuri uyu wa Gatatu taliki 23 Werurwe 2022 i Sharm El-Sheikh  mu Misiri hatangiye shampiyona y’Afurika mu mukino wo gusiganwa ku magare mu muhanda “CAC Road African Championships 2022”. Ikipe y’u Rwanda ntabwo yahiriwe n’umunsi wa mbere kuko nta mudali yigeze yegukana.

Kuri uyu munsi wa mbere hakinwe icyiciro cyo gusiganwa nk’ikipe hakarebwa ibihe byakoreshejwe “Team Time Trial”. Mu ngimbi “Men Junior” n’abangavu “Women Junior” ntabwo u Rwanda rwakinnye kuko muri iki cyiciro hagiye umukinnyi umwe kandi haba hasabwa 3.

Mu cyiciro cy’abakobwa bakuru n’abatarengeje imyaka 23 “Women Elite & U-23”, ikipe yari igizwe na  Nzayisenga Valentine, Tuyishimire Jacqueline na Ingabire Diane yasoreje ku mwanya wa 4 aho muri kilometero 42.6   bakoresheje isaha 1, iminota 8 n’amasegonda 34.

Muri iki cyiciro, Eritrea (Araya Monalisa, Fafiet Milena, Dawit Adiam na Fitsum Danait yegukanye umudali wa Zahabu aho yasoreje ku mwanya wa mbere ikoresheje isaha 1, iminota 2 n’amasegonda 32.

Ku mwanya wa kabiri haje  ikipe ya Mauritius (Lamusse Raphaelle, De Marigny-Lagesse Llucie, Halbwachs Celia na Le Court Kimberley) yakoresheje isaha 1, iminota 3 n’amasegonda 41 naho ku mwanya wa 3 haza ikipe ya Misiri (Zayed Ahmed Ebtissam, Aboubalash Nada, Eliwa Hapepa na Elsherbini Rehab) yakoresheje  isaha 1, iminota 8 n’amasegonda 10.

Muri iki cyiciro hitabiriye ibihugu 8, inyuma y’u Rwanda haje Burkina Faso, Maroc na Ethiopia.

Mu bahungu bakuru n’abatarengeje imyaka 23 “Men Elite & U-23”,  ikipe y’u Rwanda yari igizwe na Mugisha Moise, Uhiriwe Byiza Renus, Mugisha Samuel na Nsengimana Jean Bosco yasoreje ku mwanya wa 4 aho muri kilometero 42,6  yakoresheje iminota  53 n’amasegonda 07.

Ikipe ya Eritrea (Mulubrhan Henok, Habtom Michael, Yemane Dawit na Gebrehiwet Aklilu) ni yo yegukanye umudali wa zahabu aho yasoreje ku mwanya wa mbere ikoresheje  iminota 52 n’amasegonda 10.

Ku mwanya wa kabiri haje ikipe ya Afurika y’Epfo (Main Kent, Janse Van Rensburg Reinardt, Basson Gustav na Ormiston Callum) yakoresheje iminota 52 n’amasegonda 12 naho ku mwanya wa 3 haza ikipe ya Algeria (Lagab Azzedine, Mansouri Hamza, Cherki Salah Eddine Ayoubi na Mansouri Islam) yakoresheje iminota 52 n’amasegonda 20

Muri iki cyiciro hari ibihugu 10, inyuma y’u Rwanda (4) haje Mauritius (5), Maroc (6), Misiri (7), Burkina Faso (8), Benin(9) na Ethiopia (10).

Ku munsi wa kabiri, taliki 24 Werurwe 2022 harakinwa icyiciro cyo gusiganwa umukinnyi ku giti cye hakabarwa ibihe yakoresheje “Individual Time Trial”.

Iyi shampiyona y’Afurika irimo kuba ku nshuro ya 18 ikaba izasozwa taliki 27 Werurwe 2022 yitabiriwe n’ibihugu 23 mu bagabo ari byo Misiri, Eritrea, Maroc, Afurika y’Epfo, u Rwanda, Mauritius, Burkina Faso, Algeria, Angola, Benin, Uganda, Ethiopia, Niger, Guinea Bissau, Eswatini, Tanzania, Cote d’Ivoire, Tunisia, Zimbabwe, Mali, Botswana, Nigeria n’u Burundi.

Mu bagore ni ibihugu 13 ari byo, Misiri,  Eritrea, Maroc, u Rwanda, Ethiopia, Afurika y’Epfo,  Benin,  Burkina Faso, Cameroun, Cote d’Ivoire, Zimbabwe , Uganda na Guinea.

U Rwanda rwaserukiwe n’abakinnyi 10

Ikipe y’u Rwanda yitabiriye iyi shampiyona y’Afurika igizwe n’abakinnyi 10 bari mu byiciro bitandukanye. Mu bahungu bakuru n’abatarengeje imyaka 23 “Men Elite &U-23”  hari Muhoza Eric, Mugisha Moise, Nsengimana Jean Bosco, Uhiriwe byiza Renus na Mugisha Samuel. Mu cyiciro cy’ingimbi “Men Junior” hari  Ndayisenga Bonheur .

Mu bakobwa bakuru n’abatarengeje imyaka 23 “ Elite Women & U-23” hari Ingabire Diane, Nzayisenga Valentine na Tuyishime Jacqueline naho mu cyiciro cy’abangavu “Women Junior” hari Uwera Aline.

Iyi kipe iri kumwe na Sempoma Felix nk’umutoza mukuru, Uwimana Jean de Dieu ushinzwe gukanika amagare na Uwayezu Sandrine  ushinzwe kunanura imitsi abakinnyi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA