Apotre Yongwe yakatiwe igihano cy’umwaka usubitse
Ubutabera

Apotre Yongwe yakatiwe igihano cy’umwaka usubitse

KAMALIZA AGNES

March 19, 2024

Urukiko rw’Ibanze rw’akarere ka Gasabo rwemeje ko Harelimana Joseph, uzwi ku izina rya Apôtre Yongwe, ahamwa n’icyaha cyo kwihesha ikintu cy’undi akoresheje uburiganya, rumuhanisha igifungo cy’umwaka umwe usubitse n’ihazabu y’ ibihumbi 750 RWF.

Ni umwanzuro wasomwe ku gicamunsi cy’uyu wa Kabiri tariki ya 19 Werurwe 2024, ku Rukiko rw’Ibanze rw’Akarere ka Gasabo.

Tariki ya 01 Ukwakira 2023, nibwo Urwego rw’Igihugu rw’Ubugenzacyaha (RIB) rwatangaje ko rwafunze Pasiteri Harerimana Joseph uzwi nka Apôtre Yongwe.

Apôtre Yongwe yari akurikiranyweho icyaha cyo kwihesha ikintu cy’undi hakoreshejwe uburiganya.

Ku wa 23 Ukwakira 2023, nibwo Ubushinjacyaha bwasabye Urukiko rw’Ibanze rwa Gasabo, gutegeka ko Harelimana Joseph uzwi nka Apotre Yongwe, afungwa iminsi 30 y’agateganyo mu gihe iperereza ryari rigikomeje.

Ubushinjacyaha bwavugaga ko telefoni ya Yongwe igaragaza amafaranga menshi yagiye acaho mu bihe bitandukanye, nyuma yo gukorera abantu amayeri y’ubwambuzi.

Bwagaragaje ko kumufunga ari bwo buryo bwo gutuma icyo cyaha kidakomeza gusubirwamo.

Ubushinjacyaha bwagaragaje ko amayeri y’ubwambuzi bwe bwari ukwizeza abantu icyiza cyangwa kubatinyisha ikibi, bigatuma bamuha amafaranga yabo.

Yavuze ko guhera mu 2013 akazi yakoze ari ukuba Umushumba w’itorero bityo ko yatangiye gutungwa n’amaturo, kandi ko atabigize ibanga.

Yavuze ko atari afite isoni zo kuvuga ko arya amaturo.

Yahakanye ko atigeze abizeza ko azabakorera ibitangaza ahubwo ko abasengera Imana ikabakorera ibitangaza.

Ati “Nabwiraga ababuze urubyaro, ko Imana yabaha urubyaro, nabwiraga abafite uburwayi bwanze gukira ko Imana ishobora kubasubiza.”

Yavuze ko nta giciro kibaho yishyuza abantu ngo abasengere.

Yabwiye urukiko ko abantu bari hanze y’igihugu bamusabaga kubasengera, icyo yabasabaga ari insimburamubyizi cyangwa ibizakenerwa muri icyo gihe yatangiye kubasengera.

Kuri uyu wa 19 Werurwe 2024, Urukiko rw’ibanze rw’akarere ka Gasabo rwategetse ko ahawe igihano gisubitse mu gihe cy’umwaka umwe, agatanga n’ihazabu y’amafaranga ibihumbi 750.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA