Ikipe ya Ecole Ste Bernadette de Kamonyi “ESB-Kamonyi” mu bahungu n’abakobwa ni yo yegukanye irushanwa rya Basketball y’abakina ari batatu kuri batatu (3×3) “CMR Kabgayi 3×3 Tournament 2022” ryateguwe n’ishyirahamwe ry’umukino wa Basketball mu Rwanda “FERWABA” ku bufatanye n’Ubuyobozi bw’Ishuri rya College Marie-Reine Kabgayi.

Iri rushanwa ryabaye ku Cyumweru, taliki 23 Ukwakira 2022, ribera  muri College Marie Reine Kabgayi  mu Karere ka Muhanga. Irushanwa rya “CMR Kabgayi 3×3 Tournament 2022”  ryari ryahurije hamwe amakipe y’ibigo by’amashuri 8 mu bahungu n’abakobwa.

Ikipe ya ESB Kamonyi ni yo yegukanye iri  rushanwa mu bahungu itsinze College Marie-Reine Kabgayi B yakiniraga imbere y’abafana bayo ku mukino wa nyuma amanota 15 kuri 11.

Iyi ESB Kamonyi kandi ikaba yari yageze ku mukino wa nyuma isezereye muri ½ ikipe y’Igihozo S^t Peter SS iyitsinze amanota 8 kuri 7.

Ku rundi ruhande, College Marie Reine Kabgayi nayo yari ifite amakipe abiri (A na B), ikipe yayo ya  kabiri (B) yari yageze ku mukino wa nyuma isezereye muri ½ ikipe ya ECOSE Musambira amanota 11 kuri 6.

Mu bakobwa, ESB Kamonyi yari ifite amakipe abiri (A na B) muri iri rushanwa ari na yo yahuye ku mukino wa nyuma, maze ESB Kamonyi A itsinda ESB Kamonyi B amanota 10 kuri 03.

ESB Kamonyi A yari yasezereye ECOSE Musambira muri ½ iyitsinze amanota 8-6 naho ESB Kamonyi B isezerera ESSI Muhanga ku manota 9-2.

Ndaruhutse Pacifique, kapiteni wa ESB Kamonyi mu bahungu yatangaje ko bishimiye kwegukana iri rushanwa ndetse anagaragaza icyabafashije kubigeraho.

Ati : “Twabyakiriye neza kubera ko ntabwo twari tubyiteze, byari bikomeye cyane ariko twashyizemo imbaraga tubasha kubigeraho. Icyadufashije cyane ni ubwumvikane no gushyira hamwe dukina dufite intego dushaka kugeraho.”

Tumukunde Olivier kapiteni wa ESB Kamonyi mu bakobwa na we yahishuye icyatumye batwara iri rushanwa badatsinzwe.

Ati : “Icyadufashije gutwara iri rushanwa, twari dufite ubwumvikane, twese mu kibuga twayoboranaga buri wese akabwira mugenzi we ahantu biri gupfira.”

Umuyobozi wa College Marie Reine Kabgayi,  Padiri Muvunyi Innocent yavuze ko kwakira iri rushanwa ari iby’agaciro gakomeye ndetse ko bifite icyo byungura abana baharererwa.

Umuhuzabikorwa w’irushanwa rya Basketball y’abakina ari 3 kuri 3, Mutokambali Moïse akaba asanzwe ari Umuyobozi wa Tekinike muri FERWABA yashimiye amakipe yose yitabiriye.

Yasabye ndetse anakangurira abana gukunda no kugira ishyaka mu gukina uyu mukino wa batatu kuri batatu kuko bashobora kuzavamo abazakinira amakipe y’igihugu mu gihe kiri imbere.

Mu bihembo byatanzwe, ikipe ya mbere muri buri cyiciro yahembwe imidali ya zahabu ndetse n’imipira 2 yo gukina naho amakipe yabaye aya kabiri ahabwa imidali ya Feza  n’umupira umwe wo gukina. Ku rundi ruhande, buri kipe yitabiriye iri rushanwa uko ari 16 yahawe umupira umwe wo gukina.

Uretse  iri rushanwa ryabereye muri College Marie Reine Kabgayi, taliki 22 Ukwakira 2022 hari habaye irushanwa nk’iri “Igihozo S^t Peter 3×3 Tournament” ryabereye mu kigo cy’ishuri Igihozo St Peter SS mu Karere ka Nyanza. Biteganyijwe ko  iri rushanwa rizakomeza kubera  mu bigo bitandukanye mu gihugu cyose mu rwego rwo kumenyakinisha uyu mukino.

Ba uwa mbere mu kumenya amakuru agezweho!!!