Kirehe: Inzozi z’umukobwa wahinze ibiti by’avoka kuri hegitari 15
Ubukungu

Kirehe: Inzozi z’umukobwa wahinze ibiti by’avoka kuri hegitari 15

NYIRANEZA JUDITH

March 12, 2024

Ishimwe Bonnette amaze kwiga Kaminuza mu bijyanye n’icungamutungo n’ibirebana n’amasoko, yihebeye gukora ubuhinzi by’umwihariko ubw’avoka.

Yahereye ku buhinzi yakoreye kuri hegitari ebyiri, none ubu ageze kuri hegitari 15 ndetse amaze gufasha abaturage gukunda ubwo buhinzi ku buryo na bo bamaze guhinga avoka kuri hegitari zirenga 200.

Ni ubuhinzi akorera mu Karere ka Kirehe, akaba aboneraho gushishikariza abagore n’abakobwa gushora imari muri ubwo buhinzi abonamo amahirwe menshi.

Yasobanuye ko yagize icyo gitekerezo arebeye ku babyeyi be, ati: “Nahereye ku kubona ukuntu mu rugo papa yari yarateye ibiti 3 by’avoka za kizungu, zikera tukazirya. Nkuze ndangije kwiga kaminuza, mbona ntategereza gushaka akazi, byongeye mbonye ukuntu avoka zihenda ngira igitekerezo cyo kuzihinga.”

Yongeyeho ati: “Mbitekereza bwa mbere natekerezaga ku kugabanya ibiciro, ariko menye ko avoka ari zahabu y’icyatsi nahise ntekereza amafaranga.”

Ishimwe asobanura ko atize ubuhinzi, kuko afite impamyabumenyi z’icyiciro cya 2 cya kaminuza muri ‘Accounting’ na ‘Procurement’, ariko kubona ko mu buhinzi hari amahirwe yasabye se ko yamufasha akaba yahinga avoka.

Yakomeje avuga ko se yamushakiye hegitari 2 ku ikubitiro nyuma ziriyongera none ubu ageze kuri Hegitari 15, hiyongeraho iz’abaturage babonye akamaro ko guhinga avoka, nabo baratera mu 2021 zigera kuri Hegitari 85 ndetse ubu avoka zihinze kuri hegitari 262.

Ati: “Igishoro cyaturutse ku babyeyi, ariko ubu mpingamo imyaka itabangamira avoka. Izanjye ni 15, abo twafashe twabahaga ingemwe, imbuto, ifumbire n’imiti abaturage bati natwe muduterere, mu 2021 ziba 85, nyuma y’umwaka abandi na bo bati natwe twabiteye ababisabye bahise bazana 177, Hegitari zose hamwe ziteyeho avoka ziba 262.

Ubumenyi muri ubwo buhinzi, asobanura ko umubyeyi we (se) yagiye mu rugendoshuri nawe akabwunguka atyo. Akomeza asobanura ko avoka zerera imyaka itatu, akaba yaratangiye gushakisha uko yazabona amasoko, yagiye muri Qatar no muri Kenya.

Ishimwe avuga ko nubwo zitarera ariko afite icyizere agashishikariza abari n’abategarugori kwitabira ubuhinzi kuko burimo amahirwe.

Ati: “Umusaruro nturaboneka, ubusanzwe avoka yerera imyaka 3, ntiturasarura nshishikariza umwari kwihangira imirimo, hari n’ubwo ukora ari nko kwanga kwicara iwanyu, ubu nabonye akazi kandi ngaha n’abandi.”

Icyizere cy’isoko kirahari kandi Minisiteri y’Ubuhinzi n’Ubworozi/ RAB yabahaye abakozi bajyaa guhugura abahinzi ku buntu, bakagira ubumenyi bw’ibanze. NAEB ibaha amakuru n’ubujyanama.

Yavuze ko zizinjiza kuri ubu bitanga akazi ku bahinzi, ku bazitaho birimo kuzitera, kuhira kuko haba izina ryinshi, kugabanya amashami, kuzitera imiti, gushyiramo ifumbire n’ibindi bigaha abaturage amafaranga, zikenerwa mu mirire, mu gukoramo amavuta, ikirere cyaho kuko haba izuba avoka zibasha guhangana n’izuba kandi hari icyo bizafasha ku miterere y’ikirere, kongera ibyoherezwa hanze.

Mu gihe kiri imbere Ishimwe avuga ko ubwo umusaruro uzaba ubaye mwinshi hazubakwa uruganda ruzazikoramo amavuta, amasabune kandi ko intego ari ukuzazihinga ku buso bugera kuri Hegitari 1000.

Inama yagira abari n’abategarugori by’umwihariko urubyiruko ni ukurangwa n’indangagaciro, kirazira n’uburere kandi urubyiruko rugaca bugufi, rugahera ku bushobozi umubyeyi afite narwo rukabwagura.

Imbogamizi bagifite muri rusange ni ubushobozi bukiri buke kuko hakenewe kwagurwa ibikorwa, kugura imiti, amafumbire, nta ngwate ngo begere ibigo by’imari.

Ishimwe Bonnette ahamya ko umugore ashoboye ko ntawukwiye kumuca intege mu bintu byose. Ni ubuhamya yatanze mu kiganiro cya MINAGRI cyatambutse kuri Radiyo Rwanda kuri uyu wa Kabiri.

TANGA IGITECYEREZO

  • Irakiza foib
    March 12, 2024 at 6:53 pm Musubize

    Mbanje gushimira Ishimwe Bonnete kubwo gukora umushinga ufitiye kamaro cyane Abanyarwanda twese ndetse nIgihugu muri rusange. ikigaragara nuko akwiye ubufasha muburyo bwa finance kugirango abashe guhangana Nimbogamizi zavuzwe nko kugura Imiti, amafumbire, nibindi byose bizakenerwa kugirango ubuhinzi bwe butere imbere byihuse , buzahaze amasohoko yo murwanda asagurire namasoko yo Mumahanga. Murakoze

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA