Rwamagana: Hibutswe abana n’abagore bishwe urw’agashinyaguro
Imibereho

Rwamagana: Hibutswe abana n’abagore bishwe urw’agashinyaguro

NSHIMIYIMANA FAUSTIN

April 20, 2024

Kuri uyu wa Gatandatu, tariki ya 20 Mata 2024, i Sovu mu Karere ka Rwamagana hibutswe abana n’abagore bishwe muri Jenoside yakorewe Abatutsi mu 1994, bakicwa urw’agashinyaguro.

Abana bakubiswe ku nkuta, abagore barasambanywa, kubatwika na lisansi, baterwamo urusenda ngo rubarye kandi rubaheze umwuka n’ubundi bugome ndengakamere.

Mu buhamya bwatanzwe na Uwimana Angelique w’imyaka 47 yavuze ko Jenoside yakorewe Abatutsi mu 1994 yabaye afite imyaka 17 akaburiramo ababyeyi, abavandimwe, inshuti n’abaturanyi.

Yagarutse ku bugome bw’indengakamere n’akaga bahuye nako.

Yavuze ko mu myaka ya mbere ya Jenoside yakorewe Abatutsi mu 1994, Interahamwe n’ubuyobozi babatotezaga bababwira amagambo y’incyuro abasesereza ndetse bagahezwa no kuvoma amazi n’ibindi byaberekaga ko hari imigambi mibisha iri gutegurwa kugera ubwo we n’umuryango we bararaga ku musozi n’inka bamenenganishijwe.

Yakomeje asobanura ko ubwo indege ya Habyarima Juvenal yahanurwaga, guhiga Umututsi ngo yicwe byatangiye, imihanda yose hashyirwaho n’amabariyeri yabaga arinzwe n’interahamwe.

Uwimana Angelique yavuze ko Abatutsi bagerageje kwihisha no guhunga ariko bikanga, ari nako abenshi bicwa kugera ubwo bahungiye ku mashuri abanza ya Sovu ariko bahahurira n’akaga

gakomeye karimo gusambanywa n’interahamwe ku mugaragaro, gukubita abana ku nkuta z’amashuri, gutwikishwa lisansi n’ubundi bwicanyi bw’urubozo.

Yagize ati: “Twahungiye mu mashuri turi ingerere kuko abenshi bari barishwe ariko nabwo ntibanyura, interahamwe zadushyize mu mashuri zigasambanya ababyeyi bacu tureba, abana

bagakubitwa ku nkuta ndetse batumennyeho lisansi baratwika ibiti bitangira kutugwaho ariko ku bw’amahirwe twurwana n’urugi turaruca turasohoka.

Uwimana Angelique yavuze ko interahamwe zateye amashyiga ziteka ibishyimbo ariko ari nako batemagura Abatutsi, ibishyimbo bimaze gushya ntibanyuzwe kuko zakaranze urusenda

zirubasukamo kugira ngo rubarye kandi rubabuze umwuka ngo bapfe bababaye cyane.

Uwimana Angelique watanze ubuhamya

Yagize ati: “Bateye amashyiga barateka tugira ngo baratugaburira ariko bashyizemo urusenda

bakajya baruhungiza n’ibitenge bari bambuye ababyeyi bacu, abana b’interahamwe na bo bakinjira mu nzu twarimo bagatwara abakobwa n’abagore bakabasambanyiriza mu bindi byumba ubundi bakatugarura mu bandi.”

Uwimana Angelique yavuze ko Abatutsi bishwe, bagatwikwa ndetse bakajugunywa mu byobo bitandukanye.

Nubwo yanyuze muri byinshi ariko kubw’amahirwe Ingabo za RPA Inkotanyi zitabara bamwe bataricwa ngo bashire.

Ashimira uruhare rw’izi ngabo zahagaritse Jenoside yakorewe Abatutsi bari mu icuraburindi ariko umucyo ukongera ukagaruka.

Yishimira ko imiberehoy’abarokotse Jenoside mu 1994 irushaho kuba myiza kuko bataheranywe n’agahinda barakora biteza imbere ndetse baha imbabazi ababahekuye.

Umuyobozi wa Ibuka mu Karere ka Rwamagana, Musabyeyezu Dative yavuze ko mu gihe cyo kwibuka bazirikana ibibi byose byakorewe Abatutsi mu gihe cya Jenoside mu 1994, by’umwihariko abagore n’abana bishwe urw’agashinyaguro i Sovu

Yagize ati: “Habayeho gusambanywa ku gahato, kwicwa babanje gutukwa no gucunaguzwa, abagore n’abana bagiye bicwa babanje gusaba imbabazi ariko ntibazihabwe. Aba hano i Sovu

basutsweho urusenda ngo bitsamure rubice, gukubita abana ku nkuta, abagore bahuye n’akaga ko kubona urupfu rwabo bibarutse bicwa nabi, bataka inzara n’inyota; ako nako ni agahinda n’ibindi bibi byinshi turushaho kubizirikana kugira ngo twibuke amateka yacu turusheho kurwanya ikibi cyose.”

Umuhuzabikorwa w’Inama y’Igihugu y’Abagore, Nyirajyambere Berancille yavuze ko kwica umugore n’umwana ari ikimenyetso ntakuka kigaragaza umugambi wo kuzimya umuryango nyarwanda n’igihugu interahamwe na Leta bari bafite.

Yagize ati: “Ni ikimenyetso kigaragaza umugambi wo kuzimya no kuwubuza kuzongera gushibuka, ni ukuzimya igihugu kuko umuryango ni wo shingiro ry’imbaga y’Abanyarwanda.”

Yakomeje avuga ko abagore n’abana bishwe mu buryo ndengakamere hagamijwe kurimbura no kuzimya imiryango uhereye ku mugore kandi ari we soko y’ubuzima; utwita, akonsa kandi agatanga uburere bw’ibanze ku bana, kugeza ku mpinja n’abana bato b’ubuzima bw’ahazaza h’imiryango

y’igihugu cyacu. Ibyo ni byo byabereye i Sovu aho abagore n’abana basaga 550 bishwe umunsi umwe urupfu rw’agashinyaguro kandi bari babeshywe ubuhungiro ku mashuri.

Mu rwibutso rwa Sovu ruri mu Murenge wa Kigabiro mu Karere ka Rwamagana rushyinguyemo imibiri y’Abatutsi bishwe muri Jenoside yakorewe Abatutsi mu 1994 basaga 688 kongeraho n’indi 10 yashyinguwe none tariki ya 20 Mata 2024.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA