U Rwanda rwashyikirije u Burundi uwari yabutorotse ashaka kwiyahura

U Rwanda rwashyikirije u Burundi uwari yabutorotse ashaka kwiyahura

Imvaho Nshya

October 21, 2023

Ku ya 20 Ukwakira 2023 mu Karere ka Bugesera ku mupaka wa Nemba,Urwego rw’Igihugu rw’Ubugenzacyaha (RIB), rwagiye gushyikiriza  Polisi y’u Burundi, umuturage w’icyo gihugu witwa Jolis Bukeyeneza ukekwaho ubujura agatorokera mu Rwanda, ashaka kwiyahura.

Mu karere ka Bugesera ku mupaka wa Nemba aho byari biteganyijwe ko ashyikirizwa igihugu ni bwo RIB na Polisi zatunguwe no gusanga  Bukeyeneza, ubwo yari mu modoka ya RIB itwara abakurikiiranyweho ibyaha, yikomerekeje bikomeye ku maboko maze yigira nk’uwataye ubwenge.

Umuvugizi w’Urwego rw’Ubugenzacyaha RIB,Dr.Murangira B.Thierry yavuze ko iki gikorwa cyo kumushyikiriza Polisi y’igihugu cye kitari kigishobotse kuko bakimara kumenya ko yikomerekeje, yahise ajyanwa kwa muganga ku Bitaro bya Nyamata ngo avurwe kuri ubu akaba ameze neza.

Ati:’ “Amaze kubona ko asubijwe iwabo ndetse bishingiye ku byaha we ubwe avuga ko yakoze n’amafaranga yaba yaribye yagerageje kwikomeretsa, ku buryo ikihutirwaga kwari ukumugeza kwa muganga ubungubu ameze neza ariko  n’ubundi nanakira azasubizwa ubutabera i Burundi,  kuko ubungubu na bagenzi bacu b’Abarundi bamaze kumusura ariko agomba kubanza gukira ibikomere yikomerekeje akoresheje amapingu ku maboko’’.

Col de Polisi Minani Frederic, Umuyobozi wungirije wa Interpol Bujumbura yashimiye ubufatanye bw’u Rwanda n’u Burundi bwabayeho kugira ngo uyu musore atabwe muri yombi.

Ati: “Nkuko dusanzwe dufite ubufatanye bw’impande zombi  kandi  bwiza yari asanzwe ashakishwa, byari ngombwa ko abanza kujyanwa kwa muganga ngo abanze avurwe’’.

Umuvugizi wa RIB Dr.Murangira B Thierry  kandi yakomeje avuga  ko nta ho guhungira hahari mu gihugu cy’u Rwanda ku banyabyaha baturuka hirya no hino.

Ati:’ “Ntabwo u Rwanda ruzacumbikira uzakora ibyaha mu bihugu by’abaturanyi ntabwo u Rwanda rukoreshwa nk’inzira cyangwa ubwihisho bw’abakora ibyaha.’’

Bukeyeneza Jolis w’imyaka 30, akurikiranyweho kwiba Banki y’ubucuruzi mu Burundi, amafranga y’amarundi arenga miliyoni 29, RIB yamutaye muri yombi tariki ya 7 Ukwakira 2023 i Nemba mu Karere ka Bugesera nyuma yo gutoroka igihugu cye, ariko ibyaha akekwaho byabaye muri Kamena 2023.

ZIGAMA THEONESTE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA