Athletisme: Ikipe ya Police AC ni yo yitwaye neza muri shampiyona y’Igihugu

Athletisme: Ikipe ya Police AC ni yo yitwaye neza muri shampiyona y’Igihugu

Imvaho Nshya

April 25, 2022

Taliki 24 Mata 2022 kuri Sitade ya Bugesera habereye shampiyona y’imikino ngororamubiri mu bagabo n’abagore yateguwe n’ishyirahamwe ry’imikino ngororamubiri mu Rwanda “RAF”.

Abakinnyi basiganwa mu byiciro bitandukanye harimo metero 100, 200, 400, 800, 1500, 5000, 10000 ndetse no kwiruka bahererekanya agati “ Relay” muri metero 100 (4×100) na 400 ( 4×400).

Mu makipe 17 yitabiriye, ikipe ya Police AC muri rusange ni yo yitwaye neza yegukana umwanya wa mbere mu byiciro byombi, aho yegukanye imidali 19 harimo 8 ya zahabu, 6 ya Feza n’indi 5 y’Umuringa “Bronze”. 

Ikipe ya Police AC ubwo yakirizwaga igikombe

Ku mwanya wa kabiri haje ikipe ya Sina Gerard AC yegukanye imidali 11 irimo imidali 6 ya zahabu, 4 ya Feza n’umwe wa Broze naho ku mwanya wa 3 haza ikipe ya APR AC yegukanye imidali 10 irimo  4 ya zahabu, 2 ya Feza n’indi 4 y’Umuringa.

Mu cyiciro cy’abagabo, ikipe ya APR AC ni yo yitwaye neza aho yegukanye imidali 9 harimo 4 ya zahabu, 2 ya Feza n’indi 3 y’Umuringa. Yakurikiwe na Police AC yegukanye imidali 8 irimo 4 ya zahabu, 2 ya Feza n’indi 2 y’Umuringa naho ku mwanya wa 3 haza ikipe ya Sina Gerard yegukanye imidali 3 harimo umwe wa zahabu, umwe wa Feza n’undi umwe w’Umuringa.

Mu bagore, ikipe ya Sina Gerard AC ni yo yegukanye umwanya wa mbere aho yegukanye  imidali 8  harimo 5 ya zahabu  n’indi 3 ya Feza, Police AC yabaye iya kabiri aho yegukanye imidali 11 irimo 4 ya Zahabu, 4 ya Feza n’indi 3 y’Umuringa aho ku mwanya wa 3 haza ikipe ya Rutsiro AC  yegukanye imidali 4 harimo 1 wa Feza n’indi 3 y’Umuringa.

Abakinnyi muri rusange bafashije Police AC kwitwara neza barimo Nsengiyumva Justin wabaye uwa mbere muri metero 200 aho yakoresheje amasegonda 22 n’ibice 45 ndetse no muri metero 100 aba uwa mbere akoresheje amasegonda 11 n’ibice 21. Hari Abayisenga Elyse wegukanye umudali wa zahabu muri metero 400 akoresheje amasegonda 51 n’ibice 45. 

Iyi kipe kandi yegukanye umudali wa zahabu mu gusiganwa bahererekanya agati “Relay” muri metero 100 mu bagore n’abagabo naho Niyonkuru Martha yegukana umudali wa zahabu muri metero 200 akoresheje amasegonda 27 n’ibice 89 ndetse no muri metero 100 akoresheje amasegonda 13 n’ibice 50.

Abakinnyi ba Police AC begukanye umudali wa zahabu mu kwiruka bahererekanya agati “ Relay” muri metero 100 (4×100)

Mu cyiciro cy’abagabo, abakinnyi bafashije APR AC kwegukana umwanya wa mbere barimo Nkundumuremyi Celestin wabaye uwa mbere muri metero 5000 akoresheje iminota 14, amasegonda 22 n’ibice 72 na Dushimana Gilbert yegukanye umwanya wa 3 akoresheje iminota 14, amasegonda 28 n’ibice 44. Muri metero 800, Ntigirinzigo Paul yegukanye umudali wa zahabu akoresheje umunota 1, amasegonda 51 n’ibice 76 na Ngurinzira Jean Baptiste wabaye uwa kabiri akoresheje umunota 1, amasegonda 52 n’ibice 65.

Muri metero 1000, Nimubona Yves wa APR AC yegukanye umwanya wa mbere akoresheje iminota 28, amasegonda 47 n’ibice 6 naho Sebahire Eric nawe wa APR AC yegukana umwanya wa 3 akoresheje iminota 30, amasegonda 54 n’ibice 27. Iyi kipe  yegukanye umwanya wa mbere mu gusiganwa bahererekanya agati “Relay” muri metero 400.

Abakinnyi ba APR AC begukanye umudali wa zahabu mu gusiganwa bahererekanya agati “Relay” muri metero 400.

Mu cyiciro cy’abagore, ikipe ya Sina Gerard AC ni yo yitwaye neza ibikesha abakinnyi batandukanye bitwaye neza barimo Tuyambaze Triphine wabaye uwa mbere muri metero 400 akoresheje umunota 1 n’ibice 78. Hari Iribagiza Honorine wabaye uwa mbere muri metero 800 akoresheje iminota 2 n’amasegonda 5 no muri metero 1500 aba uwa mbere akoresheje iminota 4, amasegonda 32 n’ibice 36. 

Muri metero 10000, Iranzi Celine yabaye uwa mbere akoresheje iminota 33, amasegonda 32 n’ibice 75. Iyi kipe kandi yabaye iya mbere mu gusiganwa abakinnyi bahana agati “Relay” muri metero 400 aho yakoresheje iminota 4, amasegonda 5 n’ibice 23.

Iri rushanwa ryabaye muri gahunda gufasha abakinnyi kwitegura amarushanwa mpuzamahanga azaba mu minsi iri imbere harimo Marato mpuzamahanga ya Kigali yitiriwe Amahoro “Kigali International Peace Marathon 2022” izaba taliki 29 Gicurasi 2022. Hari kandi shampiyona y’Afurika “22nd African Championships 2022” izabera muri Mauritius taliki 8 kugeza 12 Kamena 2022.

Hari kandi shampiyona y’Isi izabera mu mujyi wa Eugene muri Leta ya Oregon muri USA “IAFF World Athletics Championships” kuva taliki  15 kugera 24 Nyakanga 2022. Abakinnyi b’u Rwanda kandi bazitabira imikino ihuza ibihugu bikoresha ururimi rw’Icyongereza “Commonwealth Games 2022” izabera mu mujyi wa Birmingham mu Bwongereza kuva taliki 28 Nyakanga kugeza 08 Kanama 2022.

Perezida wa RAF, Rdt Lt. Col Kayumba Lemuel yatangaje ko iri rushanwa  ryagenze neza anasobanura ko ari byo bazifashisha mu gutoranya abakinnyi bazaserukira igihugu mu marushanwa atandukanye bitewe n’uko bitwaye.

Perezida wa RAF, Rdt Lt. Col Kayumba Lemuel

Ubusanzwe muri shampiyona y’imikino ngororamubiri hakinwa n’ibindi byiciro birimo gusimbuka, gutera umuhunda, ingasire n’ibindi. Gusa kuri iyi nshuro nta bwo byakinwe kuko kuri Sitade ya Bugesera  ntahateganyirijwe iyi mikino.

Rdt Lt. Col Kayumba yasobanuye ko Sitade Amahoro bajyaga bifashisha ubu yatangiye kuvugururwa ahandi rero aho imikino ikinirwa hakaga hadahari. Gusa avuga ko barimo kuvugana n’ababishinzwe ku buryo byakorwa bityo mu minsi iri imbere izo Sitade yaba iya Bugesera, Ngoma na Nyagatare ahakinirwa iyi mikino hazaba hahari.

Perezida wa RAF agaruka ku myiteguro ya Marato mpuzamahanga ya Kigali yitiriwe Amahoro yatangaje ko ibijyanye n’amikoro akenewe ngo rizagende neza yegeranyijwe, ndetse ko n’abakinnyi mu minsi ya vuba  bazajya mu mwiherero  i Musanze nyuma bakazagaruka i Kigali  kugira ngo bimenyereze inzira iyi Marato izanyuramo

Shampiyona y’igihugu y’uyu mwaka yitabiriwe n’abakinnyi 335 baturutse mu makipe atandukanye mu gihugu hose ari yo APR AC, NAS, Police AC, Mountain Classic, Rutsiro AC, Huye AC, Nyamasheke AC, Vision JN AC, Rwamagana AC, Kavumu  AC, Kamonyi AC, Sina Gerard AC,  UR-Huye, Gicumbi AC, UR-Physical Education Campus, SEC na Nyaruguru AC.

Amafoto:

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA