BAL 2022: REG BBC yatsinze  SLAC yiyongerera amahirwe yo gukomeza muri ¼

BAL 2022: REG BBC yatsinze  SLAC yiyongerera amahirwe yo gukomeza muri ¼

NTAWITONDA JEAN CLAUDE

March 10, 2022

REG BBC 83- 81 SLAC

AS Salé 95-84 CFV Beira

Taliki 11-03-2022

AS Salé-US Monastir (Dakar Arena-19h30)

DUC-REG BBC (Dakar Arena-23h00)

Ikipe ya REG BBC yitwaye neza itsinda umukino wa kabiri mu mikino y’amajonjora ya BAL 2022  yiyongerera amahirwe yo gukomeza muri ¼ cy’irangiza.

Muri iyi mikino irimo kubera i Dakar muri Senegal, kuri uyu wa Gatatu taliki 09 Werurwe 2022 yari igeze ku munsi wayo wa 4 aho ikipe ya REG BBC yitwaye neza itsinda SLAC  yo muri Guinea amanota 83 kuri 81.

Mu gace ka mbere ikipe ya REG BBC yatsinze amanota 22 kuri 15 naho agace ka kabiri SLAC itsinda amanota 27 kuri 20  aho utu duce twarangiye  amakipe anganya amanota 42 kuri 42. Mu gace ka gatatu, REG BBC yatsinze amanota 22 kuri 21  karangira ari amanota 64 ya REG BBC kuri 63 ya SLAC.

Mu gace ka kane amakipe yombi yakomeje kugendana mu manota, hasigaye amasegonda 2,  ubwo REG BBC yari ifite amanota 80, SLAC ifite  81, umukinnyi w’u Rwanda wanitwaye neza muri uyu mukino, Nshobozwabyosenumukiza Jean Jacques Wilson yatsinze amanota 3  bituma REG BBC yegukana aka gace  ka 4  ku manota 19 kuri 18 inegukana intsinzi muri rusange ku manota 83 kuri 81.

Muri uyu mukino, Nshobozwabyosenumukiza yatsinze amanota 15 atanga imipira 4 yavuyemo amanota anagarura imipira 3 itageze mu nkangara. Gusa ku ruhande rwa REG BBC, Cleveland Joseph Thomas ni we watsinze amanota menshi 24 na ho Ndayisaba Ndizeye Dieudonne atsinda amanota 13.

Mu wundi mukino wabaye, ikipe ya  AS Salé yo muri Maroc yatsinze CFV Beira yo muri Mozambique amanota 95 kuri 84. Uyu wari umukino  wa kabiri ku ikipe ya AS Salé aho uwa mbere yatsinzwe na REG BBC.

Ikipe ya CFV Beira wari umukino wa 3 ikaba ari uwa kabiri itsinzwe nyuma yo gutsindwa na US Monastir amanota 77 kuri 71 gusa iyi kipe yatsinze DUC yo muri Senegal amanota 98 kuri 92.

Imikino y’umunsi wa 5 izakomeza ku wa Gatanu taliki 11 Werurwe 2022 aho ikipe ya AS Salé izakina na US Monastir naho  ikipe ya DUC ikine na REG BBC, umukino uzabera muri Dakar Arena (23h00).

Iyi mikino y’amajonjora ni iyo mu itsinda rya mbere “Sahara Conference”  rigizwe na  US Monastir  (Tunisia), AS Salé (Maroc), SLAC (Guinea), DUC (Senegal), Ferroviário da Beira (Mozambique) na REG BBC (Rwanda). Nyuma yo gukina hagati yayo, amakipe 4 ya mbere azakomeza muri ¼.

Amafoto:

Foto: Shema Innocent

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA