Ikipe ya Gambia mu bagabo na Ghana mu bagore ni zo zizaserukira Afurika mu mikino ihuza  ibihugu bikoresha ururimi rw’Icyongereza  “Commonwealth Games 2022”  izabera  mu Mujyi wa Birmingham mu Bwongereza taliki 28 Nyakanga kugeza 08 Kanama 2022.

Izi kipe zitwaye neza  mu mukino y’Afurika yo gushaka itike yabereye  i Accra  muri Ghana kuva taliki 25 kugeza 28 Werurwe 2022. Ikipe ya Gambia mu bagabo yabonye itike nyuma yo gutsinda ikipe ya Afurika y’Epfo amaseti 2-0 naho ikipe ya Ghana mu bagore itsinda Mauritius  amaseti 2-1 (21-17,18-21 na 15-11).

Iyi mikino yari yitabiriwe n’ikipe y’u Rwanda mu bagabo yari igizwe na Habanzintwali Fils ufatanya na  Gatsinzi Venuste naho mu bagore, ikipe igizwe na Munezero Valentine ufatanya na Mukandayisenga Benitha.

Ikipe y’u Rwanda mu bagabo yaviriyemo muri ¼ itsinzwe na Gambia amaseti 2-0 (21-13 na 21-14) naho ikipe y’u Rwanda  mu bagore iviramo muri ½  isezerewe na  Mauritius  ku maseti 2-1 (21-16, 19-21 na 16-14).

Ikipe y’u Rwanda mu bagore, Sierra Leone na Mozambique  mu bagabo ni zo zitabiriye imikino ya Commonwealth Games 2018 iheruka yabereye Gold Coast muri Australia. Gusa mu bagabo Sierra Leone yabonye itike mu gihe Mozambique yatumiwe.

Mu mikino y’uyu mwaka “Commonwealth Games 2022”   nubwo ikipe y’u Rwanda itabonye itike hari amahirwe yo kwitabira ku butumire aho bizamenyekana muri Gicurasi 2022.

Ba uwa mbere mu kumenya amakuru agezweho!!!