Umunyamakuru uzwi cyane ku mbuga nkoranyambaga Niyigaba Clement uzwi nka DC Clement yasabye imbabazi mu rukiko, ku byaha aregwa birimo guteza imvururu cyangwa imidugararo muri rubanda, kurwanya ububasha bw’amategeko no gukubita cyangwa kugirira urugomo abayobozi mu nzego za Leta, atakambira Urukiko arusaba kurekurwa by’agateganyo.

Mu rubanza yaburanye ku ifungwa n’ifungurwa by’agateganyo rwabaye kuri uyu wa Mbere tariki 27 Mata 2026, rukabera ku Rukiko rw’ibanze rwa Gasabo nyuma y’uko rwari rwasubitswe tariki 20 Mata 2026 bitewe n’uko abunganira DC Clement bari bagaragaje ko batiteguye kuburana.

Urubanza rwatangiye, Ubushinjacyaha bugaragaza ko tariki ya 27 Werurwe 2026, itsinda ry’abakozi b’Umurenge wa Jabana basuye Uragiwenimana Anatole bareba uko ari gushyira mu bikorwa ibijyanye n’icyemezo yari yasabye cyo gusana inzu ye.

Iryo tsinda ngo ryasanze aho gusana nk’uko yari yabisabye, Uragiwenimana yari ari kubaka inyubako nshya igizwe n’ibyumba bine by’amashuri atigeze asabira uruhushya, bumugira inama yo kubahiriza ibyo yari yemerewe. Iryo tsinda ryasize rimusabye gukuraho inyubako yari yongeyeho ku neza, bitakorwa ibyo yubakaga bikaba byasenywa.

Bukomeza bugaragaza ko ubuyobozi bwasubiyeyo tariki 31 Werurwe 2026, kureba niba ibyo yasabwe yarabyubahirije busanga atarabikoze, buhita bushaka abantu bo kubisenya. Uragiwenimana yahamagaye umunyamakuru DC Clement, wahise atangira kugumura abaturage ababuza gusenya ayo mashuri.

Ubushinjacyaha buvuga ko ibyo yanabifatanyije no kwifashisha imbuga nkoranyambaga zitandukanye mu kwibasira ubuyobozi. Hari nk’aho yagize ati “Ibi si ugusenya Clement, ahubwo ni ugusenya umutima, ni ugusenya igihugu kandi amateka azahinduka.” Hari ahandi yandikiye Dr. Utumatwishima Abdallah, Minisitiri w’Urubyiruko n’Iterambere ry’Ubuhanzi, ko “Urubyiruko rwawe ruzabaho rute ko agahinda kagiye kutwica?”

Ubushinjacyaha kandi bwagaragaje ko DC Clement yanakoresheje amagambo agaragaza ko ibiri gukorwa bimeze nka Jenoside. Icyo gihe yagize ati: “Ubundi ubuyobozi bw’iki gihe bumaze iki? Jenoside yongeye kugaruka mu Rwanda, ibyabaye 1994 ntaho byigeze bijya? Abanyarwanda bari bamaze kunga ubumwe none ibyabaye biragarutse.”

Ibyo n’ibindi birimo gukubita Umuyobozi Ushinzwe Imyubakire mu Murenge wa Jabana, Mutangana Victor no gutera itafari rikamena ikirahure cy’imodoka Mutangana yari yahungishirijwemo.

Ubushinjacyaha bwagaragaje ko bushingiye kuri izo mpamvu, busaba ko DC Clement yakurikiranwa afunzwe mu gihe cy’iminsi 30 mu gihe hagikorwa iperereza kuri ibyo byaha akurikiranyweho.

Ubwo yari ahawe umwanya DC Clement yagaragaje ko aziranye na Uragiwenimana kuva kera kuko biganye mu mashuri yisumbuye ariko batangiye gukorana mu 2023.

Yemera ko bajya gusaba icyemezo cyo kubaka, basabye icyemezo icyo gusana aho kuvuga ko bagiye kubaka ibyumba bishya by’amashuri kuko aho ubutaka bwari buri hari mu buhinzi avuga ko ibyabaye byose byatewe n’umujinya.
Yagize ati: “Nagize uburakari butari ngombwa, kuko nabonye ko iminota ibiri ishobora kukwangiriza ubuzima bwawe. Nabisabiye imbabazi, Abanyarwanda na Perezida w’Igihugu. Natekerezaga ko baramutse baje bagasanga turi kubaka mu buryo bunyuranyije n’amategeko, baduhagarika.”

[…] Bakadusaba guhinduza imikoreshereze y’icyangombwa cy’ubutaka. Ayo ni amakosa twakoze akomeye cyane, tunicuza tunasabira imbabazi. Yemerera Urukiko kandi ko ashobora gutanga ingwate y’inzu afite mu Busanza ifite agaciro ka miliyoni 150 Frw kandi ko n’ibindi yategekwa yabyubahiriza, Clement n’abamwunganira basaba ko yakurikiranwa adafunze.

Ba uwa mbere mu kumenya amakuru agezweho!!!