Koperative y’abahinzi b’umuceri bakorera mu gishanga gihuriweho n’Imirenge ya Rugarama, Gitoki na Rwimbogo yo mu Karere ka Gatsibo mu Ntara y’Iburasirazuba, batangije iguriro rizwi nka ‘Isoko ry’umuhinzi’ ndetse bataha ku mugaragaro ibikorwa byaguwe bya Hoteli Ntende byuzuye bitwaye amafaranga arenga miliyari 1,5.

Ni ibikorwa byatashywe mu rwego rwo kwizihiza umunsi wo kwibohora wizihizwa tariki 04 Nyakanga buri mwaka. Ibirori byitabiriwe n’Ubuyobozi bw’Intara y’Iburasirazuba, ubuyobozi bw’Ikigo cy’Igihugu gishinzwe Amakoperative, RCA, Abayobozi b’Akarere, inzego z’umutekano n’abanyamuryango ba Koperative COPRORIZ Ntende.

‘Isoko ry’Umuhinzi’ rifite agaciro k’agera kuri miliyari, ririmo ibikoresho by’ubwubatsi, iby’ubuhinzi n’ubworozi, ibiribwa, matela, amagare ndetse na moto. Isoko rifite imikorere nk’iry’abo mu nzego z’umutekano. Rizajya rihahirwamo n’abanyamuryango ba Koperative ku giciro cyo hasi.

Munyaburanga Emmanuel, Perezida wa Koperative COPRORIZ Ntende, yabwiye Imvaho Nshya ko bamaze gukora ishoramari ry’arenga miliyari eshatu. Ashimangira ko iyo abanyamuryango bahuje imbaraga ari bwo bashobora gukora byinshi kandi byiza mu gihe gito.

Agira ati: “Ayo mafaranga yose uko mwayumvise ni amafaranga ari mu bikorwa byo kwiteza imbere. Ibikorwa twatashye bifite ishoramari rihambaye kuko iriya hoteli nshyashya igeretse irabarirwa muri miliyoni zirenga 300. Abanyamuryango bacu bahabwa akazi kandi bakagahemberwa noneho tugakurikirana umunsi ku munsi ko imirimo igenda neza.”

Yongeyeho ati: “Nkuko mwabonye ‘Iduka ry’umuhinzi’, twigiriye ku ruganda rwa sima tuzana sima, ntabwo bica mu bantu benshi. Uzi ko ubundi dushyiraho rwiyemezamirimo akazackungukamo arenze, mu by’ukuri agaciro kayo kari hafi kuri miliyari ariko iyo urebye usanga twebwe twarakoresheje makeya kubera inzira z’abantu benshi twirinze.”

Akomeza agira ati: “Twaribohoye kandi turacyakomeje, iyi koperative yatangiye nyuma y’urugamba rwo kwibohora, irerekana ibikorwa mwabonye, uyu munsi rero turavuga tuti: twaribohoye.”

Ubuyobozi bwa Koperative bugira inama Abanyarwanda kugana amakoperative kuko ari yo nzira yonyine ishobora gukura abantu mu bukene. Ati: “Amaboko y’abantu benshi afatanyije ashobora gukura umuntu uwo ari we wese mu bukene, muri koperative tuba tunganya, ufite menshi n’ufite make muba muringaniye kandi uburyo bwo gukora ku mafaranga buroroha cyane kubera ko muba musindagizanya.”

Kamuzinzi Ildephonse avuga ko yishimiye ‘Isoko ry’umuhinzi’ batangije ndetse n’inyubako igeretse biyujurije bityo agasanga ubwasisi bajyaga bahabwa buziyongera cyane biturutse ku bikorwa by’ishoramari rya Hoteli Ntende n’isoko ry’umuhinzi.

Ati: “Ni ibyishimo kuri twe, kandi ibi ni ukwihesha agaciro no gukorera hamwe, hakiyongeraho ubuyobozi bwiza dufite n’imicungire myiza ya Koperative. Iri shoramari rya Hoteli Ntende n’isoko ry’umuhinzi, bizagira uruhare mu kwiyongera k’ubwasisi duhabwa buri mwaka, ikindi nuko twishimiye ibyo tumaze kugeraho kandi duterwa ishema no kuba abanyamuryango ba COPRORIZ Ntende.”

Mukandori Vestine umunyamuryango wa COPRORIZ-Ntende avuga ko yatashye mu Rwanda mu 1994 afite umwana umwe, nyuma Imana yamuhaye umugisha abyara abandi ubu biga muri Kaminuza abandi ni abasirikare. Yashoboye kubishyurira amashuri biturutse ku kwishyira hamwe n’abandi, agahinga umuceri.

Agira ati: “Abana banjye barize, ubu niteje imbere. Ubushize bangurije miliyoni eshatu nubaka inzu, iruzura nyishyiramo sima ubu ndarara heza ndataha heza, nuje kunsura abona icyo koperative yamariye.”

Avuga ko afite moto yavanye muri koperative akaba yaramaze kuyishyura, akavuga ko yiteguye no kugura imodoka kuko yamenye aho amafaranga aturuka. Yongeraho ko yatangiye yeza imifuka itatu y’umuceri, ubu yeza imifuka 30.

Umunyamabanga Nshingwabikorwa w’Intara y’Iburasirazuba, Dr. Jeanne Nyirahabimana, yashimye ibikorwa by’indashyikirwa bya koperative COPRORIZ-Ntende avuga ko iyi koperative ari urugero rw’ibishoboka.

Yakomeje agira ati: “Ni koperative yaranzwe no kugira abayobozi bazima. Bubatse hotel n’ibindi bikorwa byinjiriza abanyamuryango. Ibikorwa byaguwe bya hoteli, ni igikorwa cyiza cyo kwigiraho kandi no ko kwibohora nyako.”

Francis Kamanzi, Umuyobozi Mukuru w’Ikigo cy’Igihugu gishinzwe Amakoperative, RCA, avuga ko nyuma y’urugamba rwo kwibohora, hakurikiyeho no kwibohora ubukene. Yagize ati: “Ubu turavuga imyaka 32 birasa nkaho ari bwo igihugu cyavutse. Leta ijya gushyiraho Koperative byari mu rugendo rwo kwibohora ingoyi y’ubukene.”

Mu kwizihiza umunsi wo kwibohora ku nshuro ya 32, ubuyobozi bwa Koperative bwashimiye indashyikirwa ndetse bunishyurira mituweli ya miliyoni eshatu abatishoboye batari abanyamuryango ba COPRORIZ-Ntende. Ibirori by’uyu munsi babifashijwemo n’abahanzi batandukanye barimo Intore Tuyisenge, Lauritha na Kellia.s

Amafoto: Olivier Tuyisenge

Ba uwa mbere mu kumenya amakuru agezweho!!!