Perezida wa Repubulika y’u Rwanda, Paul Kagame yakiriye Umuyobozi Mukuru wa MTN Group, Ralph Mupita bagirana ibiganiro byibanze ku iterambere ry’ikoranabuhanga mu bukungu bw’u Rwanda, amahirwe ari mu bwenge buhangano (AI) no guteza imbere impano z’abanyarwanda bakora porogaramu za mudasobwa.
Nk’uko Ibiro by’Umukuru w’Igihugu, Village Urugwiro, byabitangaje, aba bayobozi bahuye kuri uyu wa Gatanu tariki ya 20 Ugushyingo 2026.
Nk’uko bishimangirwa mu butumwa Village Urugwiro yashyize ku mbuga nkoranyambaga, ibiganiro byabo byibanze ku bikorwa bya MTN Rwanda, uruhare rw’ikoranabuhanga mu bukungu bw’u Rwanda, amahirwe ari mu bwenge buhangano ndetse na gahunda zo gushyigikira no gukorana n’abahanga mu gukora porogaramu za mudasobwa bo mu gihugu.
Ibi biganiro bije mu gihe u Rwanda rukomeje gushyira imbaraga mu ikoranabuhanga nk’imwe mu nkingi za mwamba zitezweho kwihutisha iterambere ry’ubukungu, guteza imbere serivisi z’imari no guhanga imirimo mishya, by’umwihariko ku rubyiruko.
MTN Rwanda ni kimwe mu bigo by’itumanaho bifite uruhare mu kugeza serivisi z’ikoranabuhanga ku baturage, binyuze mu itumanaho, interineti na serivisi z’imari zikoreshwa kuri telefoni zizwi nka Mobile Money (MoMo).
Raporo y’imari ya MTN Rwanda y’igihembwe cya mbere n’icya kabiri cya 2026 igaragaza ko kugeza muri Kamena uwo mwaka, yari ifite abakiliya miliyoni 8,7, abakoreshaga serivisi za interineti bakaba bari miliyoni 2,7, mu gihe abakoresha Mobile Money bari miliyoni 6,4.
Muri icyo gihe kandi, amafaranga MTN Rwanda yinjije ava muri serivisi zitandukanye yiyongereyeho 21,9%, agera kuri miliyari 167,5 z’amafaranga y’u Rwanda. Ibi bigaragaza uko serivisi z’itumanaho n’iz’imari zishingiye ku ikoranabuhanga zikomeje kugira uruhare mu bikorwa by’ubukungu bw’Igihugu.
Ku rundi ruhande, u Rwanda rukomeje gushyiraho inzego n’ingamba bigamije kwihutisha ikoreshwa ry’ubwenge buhangano mu nzego zitandukanye z’ubuzima bw’Igihugu.
Muri Kamena 2026, hashyizweho Ikigo cy’Igihugu gishinzwe Ubwenge Buhangano (Rwanda Artificial Intelligence Agency), gifite inshingano zo guhuza no kwihutisha iterambere n’ikoreshwa ry’ubu bwenge mu gihugu.
Iki kigo kigamije guteza imbere ubushakashatsi, kongera ubumenyi mu by’ubwenge buhangano, gufasha ibigo n’abikorera kubukoresha no gushyigikira ishoramari n’ibigo by’ikoranabuhanga bikorera mu Rwanda.
Ubwenge buhangano ni ikoranabuhanga rifasha mudasobwa n’izindi mashini gukora imirimo isanzwe isaba ubushobozi bwo gutekereza, gusesengura amakuru, kwiga no gufata ibyemezo bimwe na bimwe. Bushobora gukoreshwa mu buvuzi, uburezi, ubuhinzi, imari n’izindi serivisi.
MTN Group ikorera mu bihugu bitandukanye bya Afurika, ikaba ifite ibikorwa byibanda ku itumanaho, serivisi z’imari z’ikoranabuhanga n’ibindi bisubizo bifasha abantu n’ibigo kwitabira ubukungu bushingiye ku ikoranabuhanga.
