Gusoza Icyumweru cy’icyunamo bizabera ku rwibutso rwa Rebero gusa-MINUBUMWE
Imibereho

Gusoza Icyumweru cy’icyunamo bizabera ku rwibutso rwa Rebero gusa-MINUBUMWE

ZIGAMA THEONESTE

April 12, 2024

Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) yatangaje ko nta bikorwa bindi bisoza Icyumweru cy’icyunamo biteganyijwe mu Turere, ku rwego rw’Igihugu, bizabera ku Rwibutso rwa Rebero ku wa Gatandatu tariki 13 Mata 2024.

Iyo Minisiteri itangaza ko ku Rwibutso rwa Jenoside rwa Rebero, hazanabera igikorwa cyo kunamira abanyapolitiki bishwe bazizwa kurwanya umugambi wa Jenoside. Hazamurikwa igikorwa cyo gushyira ku Rwibutso rwa Rebero amazina y’abandi banyapolitiki icyenda (9) bazize kurwanya Jenoside.

Amazina y’abanyapolitiki azashyirwa ku rwibutso rwa Rebero harimo Ngulinzira Boniface, wari Minisitiri w’Ububanyi n’Amahanga, akaba yaraharaniye ko Abanyarwanda bakunga ubumwe aza kubizizwa na Leta yariho.

Godefroid Ruzindana, wari Perefe w’iyahoze ari Perefegitura ya Kibungo, ubu ni mu Turere twa Ngoma, Kirehe, Rwamagana na Kayonza. Yaranzwe no kwamagana yivuye inyuma politiki yashyiraga imbere Jenoside, ibintu byatumye yicanwa n’umuryango we.

Rumiya Jean-Groubert wari umwarimu mu yahoze ari Kaminuza Nkuru y’u Rwanda, yavuye mu ishyaka MRND rya Perezida Juvenal Habyarimana arwanya yivuye inyuma ibikorwa byo guhohotera Abatutsi.

Vincent Rwabukwisi yari umunyamakuru akaba n’umunyapolitiki wakoresheje urubuga rwe, ikinyamakuru Kanguka, mu kwimakaza amahoro n’ubwiyunge mu gihe ibindi binyamakuru wasangaga byarimitse ivangura ndetse no gushishikariza abantu guhohotera abandi.

Rwabukwisi yashinze ikinyamakuru Kanguka agambirira kurwanya inkuru z’intagondwa n’uburozi bw’ivanguramoko bwakwirakwizwaga n’ibinyamakuru.

Habyarimana Jean-Baptiste, wahoze ari Perefe w’iyahoze ari Prefegitura ya Butare (kuri ubu ni mu Turere twa Huye, Nyanza na Gisagara), yakoresheje imbaraga yari afite za Politiki mu gukumira ihohoterwa mu gihe cya Jenoside yakorewe Abatutsi.

Ndagijimana Callixte yari Burugumesitiri wa Komini ya Mugina mu cyahoze ari Perefegitura ya Gitarama.

Umwe mu bari mu ishyaka rya MDR, yari umwe mu ba Burugumesitiri batatu barwanyije ubwicanyi bwa Jenoside bwakorewe muri Komini zabo bakicwa bazira ibyo. Yishwe ku ya 21 Mata 1994.

Nyagasaza Narcisse wari Burugumesitiri wa Komini Ntyazo mu cyahoze ari Perefegitura ya Butare. Yari mu ishyaka rya PL. Kimwe na Ndagijimana, Nyagasaza na we yarwanyije ubwicanyi muri Komini yayoboraga aza kubizira. Yishwe ku ya 23 Mata 1994.

Gisagara Jean-Marie Vianney yari Burugumesitiri wa Komini Nyabisindu, mucyahoze ari Perefegitura ya Butare, akaba yari umuyoboke w’ishyaka rya PSD. Kimwe na Ndagijimana na Nyagasaza, Gisagara na we yarwanyije Jenoside yakorewe Abatutsi. Yishwe ku ya 5 Gicurasi 1994.

Dr. Gafaranga Theoneste wari umuganga wigenga ari no mu ishyaka rya PSD. Yabaye Visi Perezida wa kabiri wa PSD, akaba na we yararwanyije Jenoside yakorewe Abatutsi. Yishwe ku ya 16 Mata 1994.

MINUBUMWE kandi yatangaje ko ibikorwa byo kwibuka ku nshuro ya 30 Jenoside yakorewe Abatutsi mu 1994, mu minsi 100 bizakomeza mu Turere twose, ariko ntibirenze tariki ya 19 Kamena 2024.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA