Koga:  Abakinnyi babiri bagiye guserukira u Rwanda muri shampiyona y’Isi

Koga:  Abakinnyi babiri bagiye guserukira u Rwanda muri shampiyona y’Isi

NTAWITONDA JEAN CLAUDE

June 12, 2022

Kuva taliki  18 Kamena kugeza 03 Nyakanga 2022  i Budapest muri Hungary hazabera  shampiyona y’Isi mu mukino wo Koga ku nshuro ya 19  “FINA World Swimming Championships 2022” izitabirwa n’ibihugu bitandukanye birimo n’u Rwanda.

Nk’uko tubikesha ishyirahamwe ry’umukino wo Koga mu Rwanda “RSF”, abakinnyi 2 mu cyiciro cy’abagabo ni bo bazaserukira u Rwanda ari bo Maniraguha Eroi na Irankunda Isihaka “Bebeto”.

Biteganyijwe ko aba bakinnyi  bari kumwe n’umutoza, Rukundo Jean Baptiste ndetse na Uzabakiriho Innocent uzaba ayoboye iri tsinda  bazahagaruka mu Rwanda  ku mugoroba w’ejo ku wa Mbere taliki 13 Kamena 2022 berekeza i Budapest bakazagaruka taliki 25 Kamena 2022.

Umunyamabanga mukuru wa RSF, Bazatsinda James yatangaje ko  aba bakinnyi bamaze igihe bitegura ndetse bizeye ko bazitwara neza. Yakomeje avuga ko yerekeje mbri Hungary  taliki 13 Kamena 2022 mu gihe irushanwa nyirizina rizatangira taliki 18 Kamena 2022. Aha asobanura ko  bagiye kugenda mbere gato kugira ngo bazabone umwanya wo kwitoreza muri Pisine bazakiniramo  bityo bayimenyere.

Umunyamabanga mukuru wa RSF, Bazatsinda James

Mu mikino ya shampiyona y’Isi 2022, Maniraguha Eroi  azoga muri  “Freestyle” muri metero 50 aho asanzwe akoresha amasegonda 25 n’ibice18  na metero 100 aho akoresha amasegonda 56 n’ibice 70.

Irankunda Isihaka we azasiganwa muri “Butterfly” metero 50 aho akoresha amasegonda 26 n’ibice 37 ndetse na metero 100 aho akoresha amasegonda 58 n’ibice 63.

Aba bakinnyi bombi kuva taliki 18 Gicurasi 2022, batangiye umwiherero muri La Palisse Hotel i Nyamata aho bagiye bamaze igihe gisaga ukwezi bakora imyitozo bataha iwabo aho bakoreraga muri Nyarutarama Sports Centre.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA