Kwibuka 30: Intimba y’uwasanze umubiri wa se bawukuyemo umutima n’umwijima bakabirya

Kwibuka 30: Intimba y’uwasanze umubiri wa se bawukuyemo umutima n’umwijima bakabirya

BAHUWIYONGERA SYLVESTRE

April 19, 2024

Jenoside yakorewe Abatutsi mu 1994, yakoranywe ubugome bukabije aho mu minsi 100 yashize hakozwe ubunyamaswa butazibagirana mu mitwe ya benshi, nka Pasiteri Nsabimana Manasseh wabonye umubiri wa se wakuwemo umutima n’umwijima byariwe.

Mu mwaka wa 1994 Pasiteri Nsabimana yari afite imyaka 11 ari na bwo yabonye ubugome bwakorewe se, ishusho ahamya ko itazamusibangana mu ntekerezo.

Icyo gihe se umubyara yari umucuruzi ukomeye w’ikawa mu yahoze ari Komini Gafunzo muri Perefegitura ya Cyangugu, ubu ni mu Karere ka Nyamasheke.

Mu buhamya yatanze, yagaragaje ko umubyeyi we yicishijwe n’umucuruzi mugenzi we, abicanyi bamukuramo umutima n’umwijima babirya babyokeje.

Pasiteri Nsabimana wigaga mu mwaka wa 5 w’amashuri abanza, yavuze ko mu gihe cya Jenoside yakorewe Abatutsi bari batuye muri Segiteri ya Mugera, ubu ni mu Murenge wa Nyabitekeri.

Avuga ko muri Jenoside, uwo mubyeyi we witwaga Habimana Enock bahimbaga Bahati, yari amaze iminsi itatu gusa avuye muri Uganda no muri Zaire aho yari afite abavandimwe bahunze mu mwaka wa 1959.

Ubwo amakuru yasakaraga mu gihugu ko uwari Perezida Habyarimana yishwe, uwo mubyeyi wari amaze igihe gito ageze mu Rwanda yahise ashakishwa hasi no hejuru mamushinja kugira amabanga y’inkotanyi.

Ati: “Yishwe ku ikubitiro kuko bavugaga ko yari amaze iminsi mu Nkotanyi, azanye amakuru yose yo kwica Abahutu, ngo ni yo mpamvu aje igitaraganya na Habayarimana agahita yicwa, bityo ko azanye imigambi mibisha muri Gafunzo.”

Se yabuze uburyo ahunga yegera umuturanyi wari inshuti ye. Iyi nshuti ye ikora ikosa ryo kubwira umucuruzi mugenzi wa nyakwigendera wakoreraga muri Santere y’ubucuruzi ya Gahuhezi ko ayamuhishe maze na we azana abo kumwiyicira.

Ati: “Bakimwica bahise bamubaga, bamukuramo umutima n’umwijima babyokoreza hafi ya Santere y’ubucuruzi ya Gahuhezi, haruguru y’urugo rwacu aho twari dutuye. Yishwe tariki ya 7 Mata, abicanyi baza babyigamba. Abo bariye inyama z’umubiri wa Papa uwo mucuruzi abahemba byeri baranywa barasinda.”

Tariki ya 8 Mata abana bagiye gufata umubiri wa se utarimo izo nyama zombi ngo bawushyingure. bawugejeje mu rugo bgo bawushyingure induru ziba ziravuze ngo bawujyanye kugira ngo bazawuregeshe benewabo nibaza.

Icyo gihe abari bagiye gushyingura baratatanye ndetse barashakishwa ku buryo banaraye mu gihuru.

Abana b’abahungu bahizwe bukware ariko ararokoka

Pasiteri Nsabimana yakomeje avuga ukuntu ibintu byarushijeho gukomera ku wa 11 Mata, we n’abandi bari bagihumeka berekeza kuri ADEPR Paruwasi ya Mukoma.

Ku wa 12 Mata, hakozwe ubugambanyi bwo gutumira abaturage bose mu nama y’umutekano, abagabo bose barayitabira ariko baza gutoranyamo ab’Abahutu barababwira ngo nibatahe Abatutsi bari basigaye bose barabica,

Ati: “Bigenze bityo, bavuga ko banashaka abahungu bose, umugore witwa Elina n’ubu nshimira cyane, anyereka akayira ko mu ishyamba nyura ngo batanyica, aramperekeza ndagenda ngera ku wari umuselile witwaga Kayumba Callixte, wari wamaze kwicirwa muri iyo nama, nsanga iwe ni ho hahungiye abagore n’abana.”

Avuga ko abagore bamenye ko abahungu bose bari bwicwe, batangira kwambika bamwe udukanzu, babahisha mu byumba. Abasore bakuru babahishe ukwabo, n’abana babyirutse ukwabo.

Hahise haza abagabo batatu b’abaturanyi babo, basaba abo bagore amafaranga, babizeza kutavuga ko bahari. Barayabaha, aho guceceka ahubwo baragenda, babashumuriza igitero cyari hafi aho, kiraza kibicira kubatsemba.

Ati: “Icyumba nari ndimo twari abasore hagati ya 15 na 20, abakurubari mu kindi sinamenye umubare wabo. Icyo gihe abasore 3 bavuze ko batizeye abo bagabo, basohoka biruka uw’inyuma akubitana n’igitero asohoka kiramwica naho 2 barabacika. Umwe muri abo yaje no kugenda agera mu Nkotayi, aba n’umusirikare.”

Akomeza avuga ko abicanyi baciye idirishya ry’icyumba yari arimo, umusore bari kumwe abona umwe mu gitero ni mugenzi we wakundaga kubakorera imirimo, ahagurutse ngo amusuhuze undi afata ibuye rinini arimukubita mu gahanga arakamena, ahita anamukubita icumu.

Abicanyi binjiye muri icyo cyumba babica bose, babakoraho bose basanga bapfuye, na we babonye yuzuye amaraso y’abishwe bagira ngo bamwishe baragenda.

Agisambagurika nimugoroba haje umugabo amwitiranya n’umusore yari azi w’Umuhutu, amukuramo avuga ko bari bagiye kwihekura kuko bari banamukomerekeje mu mutwe, ajya kwa sekuru ubyara nyina yihishayo.

Ashimira cyane umugabo witwaga Gatumwa Jean upfuye vuba, wamenye aho yihishe akamukurayo, akamwambutsa akamugeza muri Congo, agira amahirwe asangayo  se wabo, anasanga imyaka se yahinze mu mirima myinshi yari yarahaguze ireze, iramutunga kugeza atahutse.

Avuga ko yaje asanga amatongo gusa, imiryango y’iwabo wa se hafi ya yose yarishwe, ariko abo bavukana bose bariho.

Nubwo ubuzima bwamushaririye Leta y’Ubumwe yamusubije mu ishuri, arangije abona akazi, ubu ni umupasiteri muri ADEPR.

Ati: “Naje kubona ari ngombwa ko nshaka umugore ngo nagure umuryango. Nkimushaka twabyaye abana 5 bose bapfa, tujya mu bitaro byitiriwe umwami Fayisali umugore atwite inda ya 6, batugira inama yo kuyikuramo ku mezi 6, akana kakarererwa mu mashini.”

Barabyemeye baranabisinyira kuko nta mahitamo yandi bari bafite. Ku bwa’amahirwe kabaho, ubu ni umusore wiga mu wa 3 w’ayisumbuye.

Nyuma babyaye abandi 3, ubu atuye mu Mudugudu wa Ngoboka, Akagari ka Shangi, Umurenge wa Shangi n’umuryango we.

Ashimira Ingabo za RPA Inkotanyi zahagaritse Jenoside, Abanyarwanda bakongera kubana mu mahoro, abagizweho ingaruka na yo bagahozwa bakanahumurizwa.

Umuyobozi w’Akarere ka Nyamasheke wungirije ushinzwe imibereho myiza y’abaturage Mukankusi Athanasie, agaya abakoze Jenoside yakorewe Abatutsi, agashimira abagize abo barokora.

Ashimira kandi abarokotse uburyo biyubaka bakanaharanira ubumwe n’ubudaheranwa bwabo, akabasaba gukomereza aho.

TANGA IGITECYEREZO

  • Marie Chantal
    April 19, 2024 at 6:31 pm Musubize

    Ibi byarabaye gusa Imana ikomeze yomore ibikomere ,ubuyobozi bwiza dufite bwatumye abapfuye bazuka mu mitima nabwo ni ubwo gushimwa

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA