Tennis:  Ikipe y’u Rwanda U-16 yegukanye intsinzi ya  gatatu  yikurikiranya

Tennis:  Ikipe y’u Rwanda U-16 yegukanye intsinzi ya  gatatu  yikurikiranya

Imvaho Nshya

May 7, 2022

Mu mikino  y’irushanwa ry’Akarere ka 4 “ITF/ CAT East African Junior Team’s Championships for 14 & 16 & Under (AJTC)”  ikomeje kubera mu Rwanda ,  ku munsi wa gatatu, taliki 06 Gicurasi 2022, ikipe y’u Rwanda mu bahungu n’abakobwa batarengeje imyaka 16 yitwaye neza yegukana intsinzi ku nshuro ya gatatu yikurikiranya.

Mu bahungu, ikipe y’u Rwanda yatsinze Uganda imikino 3-0, Ishimwe Claude yatsinze Francis Agonzebwa amaseti 2-0 (6-2 na 6-3) naho Hakizumwami  Junior atsinda Troy Zziwa amaseti 2-0 (6-1 na 6-0).

Bakina ari babiri, ikipe y’Abanyarwanda igizwe na Ishimwe Claude na Hakuzumwami Junior batsinze Allan Otto na Francis Agonzebwa amaseti 2-0 (6-2 na 6-1). Ikipe y’u Rwanda yabonye intsinzi ku mikino 3-0.

Mu wundi mukino wabaye muri iki cyiciro cy’abahungu batarengeje imyaka 16, ikipe y’u Burundi yatsinze Tanzania imikino 3-0.

Mu bakobwa, ikipe y’u Rwanda yitwaye neza itsinda Uganda imikino 2-1. Tuyishime Rona yatangiye atsinda Eseza Muwanguzi amaseti 2-0 (6-1 na 6-0).

Mu mukino wa kabiri, Niyoshima Carine yatsinzwe na Maggie Namaganda (Uganda), amaseti 2-1 (6-3, 6-3 na 4-6).

Mu mukino w’abakina ari babiri, Abanyarwanda; Tuyishime Rona afatanyije na Nishimwe Carine batsinze Eseza Muwanguzi na Maggie Namaganda (Uganda), amaseti 2-1 (6-1 na 6-3). Aha ikipe y’u Rwanda yegukanye intsinzi ku mikino 2-1.

Ikipe y’u Rwanda mu batarengeje imyaka 16 mu bakobwa

Mu yindi mikino yabaye, ikipe ya Kenya yatsinze Tanzania imikino 2-1, u Burundi butsinda Comoros imikino 3-0.

Mu batarengeje imyaka 14 mu bahungu, ikipe y’u Rwanda yongeye gutsindwa n’u Burundi imikino 2-1. Mu mukino wa mbere, Ishimirwe Fabrice yatsinzwe na Igiraneza Nobel (Burundi), amaseti 2-0 (6-0 na 6-1) naho mugenzi we, Habiyambere Calvin yatsinzwe na Gateka Jordi amaseti 2-0 (7-5 na 6-3).

Mu mukino bakina ari babiri, Habiyambere Calvin na Murinzi batsinzwe na Igiraneza Nobel na Gateka Jordi, amaseti 2-1 (4-6, 6-2 na 7-10). Aha kandi, ikipe ya Kenya yatsinze Tanzania imikino 3-0.

Mu bakobwa, habaye imikino ibiri gusa, ikipe ya Kenya yatsinze Tanzania imikino 3-0 naho u Burundi butsinda Uganda imikino 2-1. Ikipe y’u Rwanda yo ikaba yari yaruhutse.

Kuri uyu wa Gatandatu, taliki 7 Gicurasi 2022, imikino y’iri rushanwa irakomeza aho igeze ku munsi wayo wa 4. Mu bakobwa batarengeje imyaka 16, ikipe y’u Rwanda irahura na Comoros, Tanzania ikine n’u Burundi naho Kenya ikine na Uganda.

Mu bahungu, ikipe y’u Burundi irakina na Uganda, Tanzania ikine na Kenya ni mu gihe ikipe y’u Rwanda yo yaruhutse.

Mu batarengeje imyaka 14, mu bakobwa, ikipe y’u Rwanda irakina Kenya naho u Burundi bukine na Tanzania. Aha Kenya  yaruhutse.

Mu bahungu, Kenya irakina n’u Burundi naho Tanzania ikine na Uganda. Ikipe y’u Rwanda  yaruhutse.

Uko amakipe akurikiranye nyuma y’umunsi wa gatatu

Mu bahungu batarengeje imyaka 14, Kenya ni iya mbere n’amanota 2, iyanganya n’u Burundi, hakaza Tanzania na Uganda zinganya inota rimwe, hagasoza u Rwanda nta nota.

Mu bakobwa batarengeje imyaka 14, Kenya ni ya mbere n’amanota 2, inganya n’u Burundi na Tanzania, hakaza u Rwanda na Uganda nta nota zifite.

Mu bahungu batarengeje imyaka 16, ikipe y’u Rwanda irayoboye n’amanota 3 kuri 3, ikurikirwa n’u Burundi n’amanota 2, Uganda ni ya 3 n’inota rimwe naho Tanzania na Kenya nta nota zifite.

Mu bakobwa batarengeje imyaka 16, Kenya irayoboye n’amanota 3, iyanyanga n’u Rwanda (zigatandukanira ku mikino zatsinze), hakaza Tanzania, Uganda n’u Burundi zinganya inota 1 naho Comoros nta nota ifite.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA