The Ben agiye gutaramira muri Uganda, imyiteguro irarimbanyije
Ibyamamare

The Ben agiye gutaramira muri Uganda, imyiteguro irarimbanyije

Sedar Sagamba

February 6, 2022

Nyuma y’imyaka igera kuri 3, Mugisha Benjamin wamamaye mu muziki nka The Ben agiye gutaramira mu gihugu cya Uganda mu gitaramo cyo gushimangira umubano w’ibihuigu byombi nyuma y’iminsi mikeumupaka w’u Rwanda na Uganda ufunguwe.

Umupaka wa Gatuna uhuza u Rwanda na Uganda wari umaze imyaka ibarirwa muri ine ufunzwe, wongeye gufungurwa guhera tariki 31 Mutarama 2022. Iyi ni inkuru yashimishije abatuye ibi bihugu byombi kuko mu marangamutima menshi berekanaga akari ku mutima yaba mu butumwa banyuzaga ku mbuga nkoranyambaga, mu itangazamakuru n’ahandi.

Amakuru agera kuri Imvaho Nshya ni uko umuhanzi The Ben yaba agiye gutaramira mu gihugu cya Uganda mu gitaramo cyo kwishumira  umubano w’ibi bihugu byombi.

Amakuru ava mu bari gutegura iki gitaramo bitwa Spinny Entertainment bafatanyije n’Umuryango mugari w’Abanyarwanda muri Uganda bavuga ko imyiteguro yacyo irimbanyije ndetse ko ari iby’agaciro kuba The Ben agiye kubimburira abandi banyarwanda kuhataramira.

The Ben yanyujije ubutumwa kuri konti ye ya Facebook aca amarenga yo gutaramira abanya-Uganda ku munsi w’abakundana wizihizwa buri mwaka tariki 14 Gashyantare. Yanditse ko kuri uwo munsi ashobora kuzaba ari muri Uganda, ati “Uganda, Saint Valentin iraje, nshobora kuzaba ndi hafi y’inzu yawe,..”

The Ben ni umuhanzi ukunzwe mu karere k’Afurika y’iburasirazuba, wagera mu gihugu cya Uganda bikaba akarusho bitewe n’indirimbo yagiye ahakorera ndetse zigakundwa cyane.

Muri izo ndirimbo zazamuye igikundiro cye harimo nka ‘Binkolea’ yakoranye na Sheebah Karungi, ‘No you No Life’ yakoranye na B2C, rimwe mu matsinda akomeye ndetse na ‘This is Love’ aherutse gukorana na Rema Namakula.

Uyu muhanzi agiye kujya muri iki gihugu akunzwe cyane bitewe nanone n’indirimbo aherutse gukorana na Diamond igezweho yitwa ‘Why’. Biravugwa kandi ko The Ben ashobora gukorera igitaramo muri Uganda ku munsi w’abakundana ndetse hari n’ikindi gitaramo afite mu Rwanda.

Iki gitaramo kirashimangira umubano mwiza w’ibihumbi byombi nyuma y’uko umupaka ufunguwe, akaba atari cyo gusa gishimangira uyu mubano kuko na Jose Chameleone wo muri Uganda yamaze gutangaza ku mbuga ze ko vuba cyane ataramira mu Rwanda, icyakora nta tariki yatangaje.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA