Urwego rw’u Rwanda Rugenzura Isoko ry’Imari n’Imigabane (CMA) na Komisiyo ishinzwe Isoko ry’Imari muri Nigeria (SEC) bashyize umukono ku masezerano agamije guteza imbere isoko ry’imari n’imigabane mu bihugu byombi.

Amasezerano hagati ya CMA na SEC ne ashyiraho uburyo bw’ubufatanye bugamije guteza imbere isoko ry’imari n’imigabane mu bihugu byombi kandi mu buryo bwagutse, kongerera abakozi ubushobozi, kwereka amahirwe ahari ku bashoramari bose no guteza imbere ishoramari rirambye kandi ryambukiranya imipaka.

Umuyobozi Mukuru w’Urwego rw’u Rwanda Rugenzura Isoko ry’Imari n’Imigabane (CMA), Romeo Ngarambe yagize ati: “Aya Masezerano agaragaza neza intego yacu. U Rwanda rurimo kubaka isoko ry’imari n’imigabane rifasha abashoramari mu ngeri zose kandi rifatanya n’andi masoko, rishingiye ku guhanga ibishya.”

Ngarambe yongeyeho ati: “Iri terembere ryimbitse turigeraho ku bufatanye n’inzego zitandukanye. Ubufatanye na SEC Nigeria buzadufasha kwihutisha ihanahana ry’ubumenyi, kunoza imigenzurire y’isoko no gushyiraho amahirwe afatika ku bagana iri soko mu bihugu byombi.”

Umuyobozi Mukuru wa SEC Nigeria, Dr. Emomotimi Agama, yagize ati: “Nigeria yakiriye neza ubu bufatanye. Amasoko y’imari n’imigabane muri Afurika arushaho gutera imbere iyo inzego ziyagenzura zikoranye, zigahanahana ubumenyi, zigahuza amahame ngenderwaho kandi zikubaka icyizere gikurura ishoramari ryambukiranya imipaka. Dutegereje gukorana bya hafi na CMA Rwanda kugira ngo aya Masezerano atange umusaruro ufatika.”

Yakomeje agaragaza ko ibihugu bya Afurika bikeneyegushora imari ku mugabane no kubaka ubufatanye bukomeye mu masoko y’imari yabyo hagamijwe kwihutisha iterambere.

Akomeza agira ati: “Dukeneye gutwererane muri Afurika, tugashora mu masoko yacu yagati yacu tugateza umugabane wacu. Mu kubikora tuzubaka ubufatanye kugira ngo Abanyafurika dushobora kugira intego imwe yo kubaka imikoranire ihamye.” 

Aya masezerano ni intambwe ikomeye muri gahunda yo kuzamura isoko ry’imari n’imigabane mu Rwanda, ndetse ritanga amahirwe yo gukusanya imari ihendutse kandi y’igihe kirekire.

Binyuze muri ubu bufatanye, ibigo byombi bizarushaho gusangira ubumenyi n’ubunararibonye, guhanahana ubufasha mu bya tekiniki no kunoza imigenzurire y’isoko. Ibi bizanashimangira kurinda abashoramari, gukorera mu mucyo mu kubyaza umusaruro amahirwe ari mu Rwanda no muri Nigeria y’isoko ry’imari n’imigabane.

Ba uwa mbere mu kumenya amakuru agezweho!!!