Umwamikazi Gicanda ntiyigeze aha amata abaje kumwica-Dr Bizimana
Sobanukirwa

Umwamikazi Gicanda ntiyigeze aha amata abaje kumwica-Dr Bizimana

ZIGAMA THEONESTE

April 20, 2024

Minisitiri w’Ubumwe bw’Abanyarwanda n’Inshingano Mboneragihugu Dr Bizimana Jean Damascene yagaragaze uko umwamikazi Rosalie Gicanda yishwe muri Jenoside yakorewe Abatutsi mu 1994, ahakana ko atigeze abwira abagiye kumwica ngo ni bareke abanze abahe amata n’andi makuru avugwa ku rupfu rwe atari ukuri.

Yabigarutseho kuri uyu wa Gatandatu tariki ya 20 Mata 2024, mu gikorwa cyo kwibuka umwamikazi Rosalie Gicanda wishwe kuri iyi tariki mu 1994, muri Jenoside yakorewe Abatutsi.

Umwamikazi yari umugore w’Umwami Mutara III Rudahigwa Intwari y’u Rwanda mu cyiciro cy’Imena.

Umwamikazi Rosalie Gicanda yaratotejwe cyane kubera ubutegetsi bwari bwarimitse urwango ku Batutsi.

Minisitiri Dr Bizimana yagaragaje ko mu Kuboza kwa 1963, Umwamikazi Gicanda yirukanywe i Nyanza mu Ngoro y’umwami Mutara III Rudahigwa bari barashakanye, ajyanwa i Butare (Ubu ni mu Karere ka Huye).

Umwamikazi yishwe muri Jenoside i Butare

Dr Bizimana yavuze ko Jenoside ubwo yatangiraga mu Rwanda tariki ya 7 Mata 2024, i Butare ho itahise itangira ahubwo abayobozi ba Leta yiyise iy’abatabazi barimo Jean Kambana wari Minisitiri w’Intebe na Sindikwabo Theodore wari Perezida wayo, batangije ubu bwicanyi nyuma yo kubona ko ahandi bwatangiye.

Ati: “Mu 1994, Jenoside i Butare ntiyahise itangira byasabye ko Kambanda na Sindikubwabo bahavuka bajya gukora ubukangurambaga, Sindikubwabo yagiye muri Komini Nyakizu tariki ya 18 Mata 1994, kubashimira ko bitabiriye ikorwa rya Jenoside. Bari bishe i Cyahinda tariki ya 15 Mata, n’i Kibeho ku itariki 14 Mata 1994.”

Yakomeje agira ati: “Tariki ya 19 Mata Kambanda na Sindikubwabo bakuyeho Perefe rukumbi w’Umututsi  Jean Baptiste Habyarimana (wari Perefe wa Perefegitura ya  Butare) aricwa, bimika intagondwa Sylivin Nsabimana ahabwa amabwiriza yo  kwihutisha Jenoside.

Umunsi ukurikiyeho tariki ya 20 Mata 1994, ni bwo umwamikazi Rosalie Gicanda yishwe ku itegeko rya Cpt Ildephonse Nizeyimana wabaga mu kigo cya gisirikare cya ESO”.

Dr Bizimana yakomeje avuga ko bamwe mu bicanyi baje mu rugo rwa Rosalie Gicanda, nkuko urubanza rwabigaragaje, harimo Lt Bizimana bitaga Byatsi, Lt Gakwerere, Kaporali Aloys Mazimpaka na Dr Martin Kageruka. Yavuze ko icyo gihe mu rugo rw’Umwamikazi bahasanze abana babanaga na we barabicana.

Minisitiri Bizimana ati: “Ntabwo yari kumwe n’abagore b’inshuti ze nk’uko hari ababikwiza batyo”.

Abo bicanyi baje mu rugo rw’Umwamikazi Rosalie Gicanda bahasanze Nyina umubyara, Mukuru we, Uzamukunda Grace, Maria Gasibirege, Aurelia Mukaremera na Callixte Kayigamba hari n’umukozi wo mu rugo.

Dr Bizimana avuga ko abicanyi bafashe abantu 6 basiga umubyeyi wa Gicanda ndetse n’umukozi utarahigwaga.

Ati: “Bajya kwica abantu batandatu babanyujije muri ESO, nyuma babajyana Kadahokwa ahakoreraga Electrogaz, Umwamikazi Gicanda abasaba ko babareka bakabanza gusenga, barabyemera gato, baramurasa”.

Minisitiri Dr Bizimana avuga ko mu kurasa Umwamikazi yaguye hejuru ya Grace bari kumwe abicanyi bagira ngo na we yapfuye ariko atapfuye akaba ari na we watanze amakuru y’uko byagenze.

Dr Bizimana ati: “Ntabwo Umwamikazi yigeze abwira abicanyi ngo bana banjye mureke mbanze mbahe amata, nk’uko nanone hari amakuru Atari yo yagiye abivuga atyo”

Nyuma yo kwicwa imirambo yabo bayinaze mu mukingo bamanuriraho ibitaka.

Uko umurambo w’Umwamikazi Gicanda wabonetse

Nyuma ya Jenoside abicanyi ntibashatse kugaragagaza umurambo w’Umwamikazi, wabonetse nyuma yo gushakishwa bikozwe n’ingabo za RPA zakoreraga i Butare zari ziyobowe na Gen (Rtd) Ibingira Fred, aho umwe mu bari bahazi yaje kuherekana maze Umwamikazi arimurwa ashyingurwa mu cyubahiro i Mwima ku musezero w’Umwami ari naho aruhukiye kugeza ubu.

Minisitiri Dr Bizimana yagaragaje ko Umubyeyi w’Umwamikazi Gicanda batishe ubwo bazaga gutwara Umwamikazi yaje kwitaba Imana azize uburwayi, nyuma y’iminsi itatu Umwimikazi Gicanda yishwe.

Umwamikazi Rosalie Gicanda n’Umwami Mutara wa III Rudahigwa
Minisitiri w’Ubumwe bw’Abanyarwanda n’Inshingano Mboneragihugu Dr Bizimana Jean Damascene

TANGA IGITECYEREZO

  • fire fire
    May 8, 2024 at 6:31 pm Musubize

    nonex grace we ntago bamunaze mu mukingo?

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA