Abagore bari muri Siporo y’u Rwanda basabwe kwigirira icyizere

Abagore bari muri Siporo y’u Rwanda basabwe kwigirira icyizere

Imvaho Nshya

May 23, 2022

Nyuma y’amahugurwa y’iminsi ibiri “Smart Women-Smart Sport” yari   agamije  kurebera hamwe ibibazo byugarije umugore muri siporo, Rwemalika Félicité, Umunyamuryango wa Komite mpuzamahanga Olempike “IOC Member” yasabye abagore bari muri siporo y’u Rwanda kwigirira icyizere.

Aya amahugurwa y’iminsi ibiri yabaye taliki 19 na 20 Gicurasi 2022 akaba yari yateguwe na Komite Olempike y’u Rwanda binyuze muri Komisiyo y’abagore ku nkunga ya Olympic Solidarity.

Rwemalika Félicité yavuze ko amahugurwa nk’aya aba akenewe kuko bituma  abantu bongera guhura bakarebera hamwe ibyagenze neza n’ibitaragenze neza kugira ngo bashake ibisubizo.

Yasabye  aba bagore bari muri siporo kwigirira icyizere, kumenya  siporo barimo icyo bayimariye ndetse n’icyo bashaka kugeraho ndetse no kumenya uko bakwitwara mu gihe runaka.

Rwemalika Félicité, Umunyamuryango wa Komite mpuzamahanga Olempike

Agaruka ku ihohoterwa rikorerwa umugore muri siporo, Rwemalika yabasabye ko uwahohotewe akwiye kujya abivuga.  Ati : “ Turashyigikiwe ntihazagire ugira ubwoba bwo kuvuga ko yahohotewe.”

Yavuze ko kandi  abagore badakwiye kugirirwa impuhwe ngo bahabwe gukora ibyo badashoboye ahubwo  bagomba kubihabwa kuko bagaragaje ubushobozi.

Umwe mu bahuguwe, Igihozo Cyuzuzo Yvette  akaba asanzwe ari umukinnyi wa Volleyball mu ikipe y’Igihugu  yavuze ko aya mahugurwa bungukiyemo byinshi birimo ibijyanye no kwirinda ihohoterwa, kumenya imirire ikwiye umukinnyi n’ibindi.

Igihozo Cyuzuzo Yvette  

Yagarutse ku mbogamizi zigaragara muri iyi minsi harimo kuba abakinnyi b’abagore usanga imibereho itandukanye n’abo mu cyiciro cy’abahungu ahanini bitewe n’ibyo bagenerwa nk’imishahara n’ibindi kuko harimo ikinyuranyo.

Igihozo  avuga ko  hari kandi ikibazo cy’ibikorwa remezo n’ibikoresho bidahagije, abatoza ndetse n’uburyo bwafasha uwahohotewe gutanga amakuru ariko ntibimugireho ingaruka.

Rwemalika Félicité aha akaba yaravuze ko  ibyasabwe byose bizagera ku nzego bireba kugira ngo harebwe icyakorwa.

Kubwimana Gerturde, Umuyobozi wa Tekinike mu ishyirahamwe ry’umukino wa Volleyball mu Rwanda “FRVB” akaba yaranabaye umukinnyi w’ikipe y’Igihugu avuga ko abitabiriye aya mahugurwa  bagaragaje inyota yo kumenya byinshi mu byo bigishijwe.

Nk’umwe mu batanze amahugurwa aho yatanze ikiganiro ku bijyanye no gushaka impano  avuga ko umwanya wabaye muto ndetse hifuzwa ko ibi biganiro byajya biba  buri gihembwe bakabona umwanya  uhagije.

Kubwimana Gerturde, Umuyobozi wa Tekinike muri FRVB

Kubwimana wabaye umukinnyi wa Volleyball ubu akaba akiri mu bikorwa by’uyu mukino ashishikariza abagore  baba muri siporo kuyigumamo. Aha agira ati : “Twabifashe nk’umukoro wa buri wese, bagomba kuguma muri siporo kuko isigaye itanga akazi, ababirimo babikomeze ntibabicikirize bazagera aho bifuza n’abandi bazaza bazajya  babafatiraho urugero bati turashaka kumera nka kanama.”

Aya mahugurwa yabereye muri  Centre d’Acceuil Bonne Espérance -Kicukiro yitabiriwe n’abantu 38 barimo abagore 33 bava mu mashyirahamwe y’imikino, abakinnye imikino Olempike ndetse n’ibigo biri muri gahunda  ISONGA “Sports Centers of Excellence in Schools”.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA