Ambasaderi Maj.Gen.(Rtd) Emmanuel Bayingana , yashyikirije Perezida wa Israel, Isaac Herzog, impapuro zimwemerera guhagararira u Rwanda muri icyo Gihugu. Ni umuhango wabereye mu Ngoro y’Umukuru w’Igihugu iherereye mu Mujyi wa Yeruzalemu, kuri uyu wa Mbere tariki ya 26 Ukwakira 2026.

Mu biganiro bagiranye, Perezida Herzog yerekanye ko umubano mwiza n’ubucuti hagati y’u Rwanda na Israel bikomeje kwaguka mu nzego nyinshi zirimo guhanga ibishya, ubuhinzi, iterambere n’uburezi. Maj. Gen. (Rtd) Emmanuel Bayingana, yagizwe Ambasaderi w’u Rwanda muri Israel muri Kamena 2026, asimbuye James Gatera wari muri izo nshingano kuva mu Ukuboza 2022.

U Rwanda na Israel basanganywe umubano mwiza ndetse buri gihugu gifite ambasade mu kindi, bikanashimangirwa n’ingendo abakuru b’ibihugu byombi bagiye bakorera kuri buri ruhande mu bihe bitandukanye.

Muri Nyakanga uyu mwaka ibihugu byombi byagiranye amasezerano y’ubufatanye mu guteza imbere uburezi bw’ibanze, isakazabumenyi n’ikoranabuhanga, uburezi bw’amashuri makuru n’ubushakashatsi bushingiye kuri siyansi, bishima intambwe bimaze gutera mu bufatanye.

Kuva mu 2012, u Rwanda rwohereza abanyeshuri kujya kwihugura mu bijyanye n’ubuhinzi aho iki gihugu cyateye intambwe mu bijyanye no kuhira ndetse n’ubuhinzi bukorerwa mu nzu, gutunganya imyanda y’amatungo ikavanwamo ibindi bintu, ndetse n’ubuhinzi bubyara umusaruro kandi bwakorewe ahantu hato.

U Rwanda na Israël kandi bisangiye byinshi mu mateka yabyo bitewe n’ibihe byanyuzemo bya Jenoside yakorewe Abatutsi mu 1994 na Holocaust yibasiye Abayahudi mu Ntambara ya Kabiri y’Isi, bibiha imbaraga zo kurushaho gukorana.

Ba uwa mbere mu kumenya amakuru agezweho!!!