Guhera  ku Cyumweru taliki 28 Kanama 2022 ku kibuga mpuzamahanga cya Gahanga  hatangijwe irushanwa ry’amakipe y’icyiciro cya mbere mu bagabo mu mukino wa Cricket  “Dafabet RCA T20 League 2022”.

Iri rushanwa rizamara ukwezi ryateguwe n’ishyirahamwe ry’umukino wa Cricket mu Rwanda “RCA”  ku bufatanye n’abaterankunga barimo Dafabet, kompanyi yo mu Buhinde ikora ibijyanye no gutega ku mikino ndetse na  Simba Voyages Ltd ikora ibijyanye n’ingendo zo mu kirere. Aba baterankunga bakaba barasinye amasezerano y’ubufatanye na  RCA y’imyaka 3  akazajya avugururwa buri mwaka.

Umuyobozi ushinzwe ibikorwa muri RCA, Byiringiro Emmanuel  atangaza ko iri rushanwa ryitabiriwe n’amakipe 6 yo mu cyiciro cya mbere mu bagabo. Akomeza avuga ko  kubera aba  baterankunga  muri iri rushanwa bazahemba ikipe izatwara igikombe miliyoni  imwe y’amafaranga y’u Rwanda  ndetse n’abakinnyi bitwaye neza bakagenerwa ibihembo.

Amakipe yitabiriye iri rushanwa rizasozwa taliki 02 Ukwakira2022  ni Kutchi Tigers CC, Challengers CC, Spartans CC, KCC, Zonic Tigers CC na Telugu Royals CC.

Iri rushanwa rikaba rizajya ryerekanwa ku buryo bw’ikoranabuhanga kugira ngo n’abatabasha kugera ku kibuga babashe gukurikina imikino binyuze kuri “Youtube” ya  RCA https://www.youtube.com/channel/UCpiTPH_ZEiS35qQIfqnhtAg.

Umunsi wa mbere w’irushanwa

Ku munsi wa mbere w’iri rushanwa “Dafabet RCA T20 League 2022”, ikipe ya Telugu Royals CC yakinnye na Kutchi Tigers CC.

Ikipe ya Telugu Royals CC ni yo  yatangiye ikubita agapira ishaka amanota « Batting » maze mu dupira120  (Overs 20) ikora amanota 135 mu gihe abakinnyi 7 ari bo bari basohowe mu kibuga.

Mu gice cya kabiri, ikipe ya Kutchi Tigers CC yasabwaga amanota 136 kugira ngo  yegukane intsinzi . Uyu mukino nta bwo washoboye kurangira kubera imvura.  Mu dupira 90 (Overs15), ikipe ya Kutchi Tigers CC yari imaze gukora amanota 81 aho abakinnyi 4 ari bo bari basohowe mu kibuga. Nyuma yo kwifashisha uburyo bwo kureba uko ikipe yatsindaga amanota “DLS”,  ikipe ya Telugu Royals CC yegukanye intsinzi ku kinyuranyo cy’amanota 15.

Umukinnyi wa Telugu Royals CC, Simon Sessazi  ni we wabaye umukinnyi witwaye neza muri uyu mukino.

Umukino wakurikiyeho, ikipe Challengers CC yitwaye neza  itsinda  ikipe ya Spartans CC.

Ikipe ya Spartans CC  ni yo  yatangiye ikubita agapira ishaka amanota “Batting” maze mu dupira 120 (Overs 20) ikora amanota 105 mu gihe abakinnyi 6 ari bo basohowe mu kibuga.

Mu gice cya kabiri  ikipe ya Challengers CC yasabwaga  amanota 106 kugira ngo itsinde uyu mukino  yitwaye neza kuko mu dupira 112 (Overs 18.5) yari imaze gukora aya manota .

Ndikubwimana Didier ukinira ikipe ya Challengers CC ni we watowe nk’ umukinnyi witwaye neza muri uyu mukino aho yatsinze amanota 59 mu dupira 50 yakinnye.

Imikino y’umunsi wa kabiri, taliki 3 Kanama 2022, ikipe ya Spartans CC izakina na Zunic Tigers CC mu gihe  taliki 04 Nzeri 2022,  ikipe ya KCC izakina na Challengers CC  naho  Spartans CC  ikine na Kutchi Tigers CC. Iyi mikino yose ikaba izabera  kuri Sitade mpuzamahanga ya Gahanga.

Ba uwa mbere mu kumenya amakuru agezweho!!!