Rwanda 79-70 Nigeria

Taliki 06-09-2022

Rwanda-Malawi (Gaborone-14h00)

Kuva kuri uyu wa Gatandatu taliki  03 Nzeri 2022 i  Gaborone muri Botswana hatangiye imikino y’Afurika mu bakobwa batarengeje imyaka 19 mu mukino wa Cricket mu rwego rwo gushaka itike y’igikombe cy’Isi  kigiye kuba ku nshuro ya mbere “ ICC U-19 Women’s T20 World Cup 2023”.

Ikipe y’u Rwanda  yitwaye neza itsinda umukino wa mbere mu matsinda. Iyi kipe yatsinze Nigeria  ku kinyuranyo cy’amanota 9.

Muri uyu mukino, ikipe ya Nigeria ni yo  yatomboye maze ihitamo kubanza gutera agapira “Bowling” mu gihe ikipe y’u Rwanda yagombaga  gukubita agapira ishaka amanota “Batting”.

Mu dupira 105 (Overs 17.3),  ikipe y’u Rwanda yakoze amanota 79 maze abakinnyi 10 bavanwa mu kibuga (10 wickets).

Ikipe ya Nigeria mu gice cya kabiri yasabwaga gukora amanota 80 kugira ngo yegukane intsinzi.

Iyi kipe yatangiye gukubita agapira ishaka amanota “Batting”, mu dupira 101 (Overs 16.5), ikipe y’u Rwanda yari imaze gusohora mu kibuga abakinnyi 10 ba Nigeria (10 Wickets) mu gihe yari imaze gukora amanota 70.

Ibi byahise biha intsinzi ikipe y’u Rwanda ku kinyuranyo cy’amanota 9.

Muri uyu mukino, Kapiteni w’ikipe y’u Rwanda, Ishimwe Gisele ni we wahawe igihembo cy’umukinnyi witwaye neza muri uyu mukino.

Ikipe y’u Rwanda taliki 06 Nzeri 2022 ni bwo izakina umukino wa kabiri mu itsinda aho izakina na Malawi, saa munani (14h00) muri Botswana  cyo kimwe n’i Kigali mu Rwanda.

Indi mikino yabaye ku munsi wa mbere

Iyi mikino yo gushaka itike “ ICC U-19 Women’s T20 World Cup Africa Qualifiers 2022” yitabiriwe n’amakipe 9 aho yashyizwe mu matsinda abiri. Itsinda A rigizwe n’u Rwanda, Nigeria, Malawi, Mozambique na Tanzania naho itsinda B rigizwe na Botswana, Namibia, Sierra Leone na Uganda.

Mu mikino y’umunsi wa mbere yabaye, mu itsinda A uretse umukino w’u Rwanda na Nigeria, ikipe ya Tanzania yatsinze Mozambique.

Mu itsinda B, ikipe ya Botswana yatsinze Sierra Leone naho Uganda itsinda Namibia.

Ba uwa mbere mu kumenya amakuru agezweho!!!