Ikipe ya Zonic Tigers CC mu cyiciro cya mbere na IPRC-Kigali CC   mu cyiciro cya kabiri mu bagabo zegukanye igikombe cya shampiyona “RCA T20 Cup Men Division  1 & 2” .

Iyi mikino yasojwe ku Cyumweru taliki 15 Gicurasi 2022 kuri Sitade Mpuzamahanga y’umukino wa Cricket i Gahanga.

Mu cyiciro cya mbere, ikipe ya Zonic Tigers CC  yakinnye  na Kigali CC ku mukino wa nyuma. Ikipe ya Zonic Tigers CC ni yo  yatangiye ikubita agapira ishaka amanota “Batting” maze ikora amanota  212 mu dupira 120 (20 Overs)  havuyemo abakinnyi 4 “4 wickets”.

Ikipe ya Kigali CC ntiyabashije gukuraho agahigo kari kashyizweho na Zonic Tigers CC   kuko bamaze gutsinda amanota 112 mu dupira 94 (15.4 Overs),   ikipe ya Zonic Tigers CC  yakuyemo abakinnyi bose ba Kigali CC “10 Wickets” umukino uhita urangira.

Umukinnyi w’ikipe ya Zonic Tigers CC,  Asaba Bryan ni we wabaye umukinnyi witwaye neza mu mukino aho yatsinze amanota 120 mu dupira 60 yakinnye.

Muri iki cyiciro hari hitabiriye amakipe 6 aho yakinnye hagati yayo kuva muri Werurwe 2022 hanyuma amakipe 2 ya mbere akina umukino wa nyuma.  

Uko amakipe yakurikiranye

Nyuma y’imikino yahuje aya amakipe hagati yayo, ikipe ya Zonic Tigers CC yasoje iyoboye urutonde n’amanota 8 inganya na Kigali CC. Yakurikiwe na Challengers CC (6), Telugu Royals CC (4), Kutchi Tigers CC (3) na Spartans CC (1).

Mu cyiciro cya kabiri, ikipe ya IPRC-Kigali CC yakinnye  na Right Guards CC. Muri uyu mukino, IPRC-Kigali CC yatangiye  ikubita agapira ishaka amanota “Batting” aho mu dupira 120 yakoze amanota 153 abakinnyi 3 bava mu kibuga “3 Wickets”.

Ikipe ya  Right Guards CC yasabwaga amanota 154  kugira ngo itsinde  nayo yatangiye igice cya kabiri ikubita agapira ishaka amanota “Batting” ariko mu dupira 120 ikora amanota 134, abakinnyi 6 bava mu kibuga “6 Wickets”.

Ikipe ya IPRC-Kigali CC ikaba  ari yo  yahise yegukana intsinzi ku kinyuranyo cy’amanota 19.

Muri uyu mukino, Manishimwe Oscar wa IPRC Kigali CC ni we wabaye umukinnyi mwiza w’umukino akaba yaratsinze amanota 55 mu dupira 62 yakinnye.

Muri iki cyiciro, amakipe 6 ni yo yitabiriye aho yakinnye hagati yayo, IPRC Kigali CC yasoreje ku mwanya wa  mbere n’amanota 10, ikurikiwe na Right Guards CC (7), Indorwa CC (5), Sorwathe CC (4), Vikings CC (4) na Tamil Lions CC (0).

Ba uwa mbere mu kumenya amakuru agezweho!!!