RSSB Tigers yo mu Rwanda iri i Beijing mu Bushinwa, aho iri guhatanira igikombe cya FIBA Intercontinental Cup 2026, gihuza amakipe yabaye aya mbere ku Migabane itandukanye.

Ni irushanwa ritangira kuva ku wa 22 kugeza ku wa 27 Nzeri 2026, rihuza amakipe atandatu, RSSB Tigers ikaba ihagarariye Afurika nyuma yo kwegukana Basketball Africa League (BAL) ya 2026.

FIBA Intercontinental Cup ni irushanwa rimaze imyaka isaga 60 rihuza amakipe yitwaye neza mu marushanwa akomeye y’amakipe ku Migabane itandukanye.

Mu 2026, ryimukiye i Beijing mu Bushinwa nyuma y’imyaka itatu ribera muri Singapore.

 Beijing ni ho hateganyijwe gukinirwa iri rushanwa mu myaka itatu iri imbere, aho iyi ari yo nshuro ya mbere rihabereye.

Amakipe atandatu yitabiriye uyu mwaka agabanyijemo amatsinda abiri

Itsinda A ni ryo RSSB Tigers yo mu Rwanda iherereyemo iri kumwe na Rytas Vilnius yo muri Lithuania, yatwaye Basketball Champions League Europe;

Shanghai Sharks yo mu Bushinwa, yatwaye Chinese Basketball Association, RSSB Tigers yo mu Rwanda, yatwaye BAL 2026.

Itsinda B ririmo; Boca Juniors yo muri Argentina, yatwaye Basketball Champions League Americas; Beijing Royal Fighters yo mu Bushinwa, nk’ikipe yakiriye irushanwa; NBA G League United yo muri Leta Zunze Ubumwe za Amerika.

Uko amarushanwa ateye

Amakipe atatu ari muri buri tsinda akina hagati yayo, aho abiri ya mbere muri buri tsinda ahita ajya muri kimwe cya kabiri cy’irushanwa.

Ikipe isoje ku mwanya wa gatatu mu itsinda A ihura n’isoje ku mwanya wa gatatu mu itsinda B mu mukino wo guhatanira umwanya wa gatanu.

Ku wa 25 Nzeri hazaba umunsi w’ikiruhuko, hanyuma ku wa 26 Nzeri hakinwe imikino ibiri ya ½ cy’irangiza n’umukino wo guhatanira umwanya wa gatanu.

Umukino wa nyuma n’uwo guhatanira umwanya wa gatatu bizakinwa ku cyumweru, tariki ya 27 Nzeri.

RSSB Tigers iratangira ihura na Rytas Vilnius

RSSB Tigers iri mu itsinda A, umukino wayo wa mbere urayihuza na  na Rytas Vilnius kuri uyu wa 22 Nzeri.

Nyuma yaho, Tigers izakina na Shanghai Sharks, uzaba ku wa 23 Nzeri. Rytas na Shanghai na zo zizahura hagati yazo kugira ngo hamenyekane amakipe abiri azava mu itsinda ajya muri kimwe cya kabiri.

Afurika yatangiye kugera muri iri rushanwa mu 2022

Amakipe yo muri Afurika yatangiye gukina iri rushanwa mu 2022. Zamalek yo mu Misiri, US Monastir yo muri Tunisia na Al Ahly yo mu Misiri zose zigeze kugera muri ¼ ariko ntizigeze zirenga ku mwanya wa kane.

Mu 2025, Al Ahly SC yo muri Libya yabaye ikipe ya mbere yo muri Afurika ibonye umudali muri iri rushanwa, ubwo yasozaga ku mwanya wa gatatu, itsinze  Flamengo yo muri Brazil amanota 91-82 mu mukino wo guhatanira umwanya wa gatatu.

RSSB Tigers igeze i Beijing ifite intego yo gukomeza kuzamura umwanya amakipe ya Afurika amaze kugeraho muri iri rushanwa.

Amateka agaragaza ubuhangange bw’u Burayi n’Amerika muri iri rushanwa

Kuva iri rushanwa ryatangira mu 1966, amakipe yo mu Burayi ni yo amaze kwegukana ibikombe byinshi, aho afite 24 n’imyanya 16 ya kabiri.

Amakipe yo muri Espagne yo afite ibikombe 12, mu gihe Real Madrid ari yo kipe ifite ibikombe byinshi, aho yegukanye iri rushanwa inshuro eshanu.

Amerika y’Amajyepfo n’iy’Amajyaruguru zombi ziri ku mwanya wa kabiri mu gutwara ibikombe byinshi mu mateka y’iri rushanwa.

Mu gihe mu makipe n’ibihugu bihagarariwe mu 2026, Leta Zunze Ubumwe za Amerika, Lithuania na Argentina ari byo byigeze kugira amakipe atwara iki gikombe.

RSSB Tigers yabonye itike yo guhagararira Afurika nyuma yo gutwara BAL 2026, itsinze Petro de Luanda yo muri Angola ku mukino wa nyuma, iyitsinze Petro de Luanda amanota 90-88 ku mukino wa nyuma, yegukana igikombe cya mbere cya BAL mu mateka yayo. 

Mu mikino ya Kamarampaka (Playoffs), iyi kipe yagize impuzandengo y’amanota 97,3 kuri buri mukino.

Ni uwo musaruro wayihesheje umwanya wo kujya guhagararira Afurika mu irushanwa rihuza aba mbere ku Migabane yabo.

Abakinnyi b’inkingi za mwamba RSSB Tigers igenderaho 

Umutoza wa Henry Mwinuka wa RSSB Tigers, afite abakinnyi b’Abanyarwanda bafite ubunararibonye mpuzamahanga, ndetse n’abakinnyi b’abanyamahanga bongewe mu ikipe, barimo Ntore Habimana, umwe mu bakinnyi b’Abanyarwanda bazaba barebwa cyane. 

Ni umukinnyi muri AfroBasket ya 2025 watsindaga impuzandengo y’amanota 13.3, gutanga imipira ivamo amanota (assists 6.0) no kubuza imipira ivamo amanota (rebounds 5.3) kuri buri mukino.

Hari kandi Alex Mpoyo, wagize impuzandengo y’amanota 16,7 na rebounds 5.7 mu mikino yo gushaka itike ya AfroBasket 2025.

Ndizeye Dieudonné na we ari mu bakinnyi bagize uruhare mu mikino yo gushaka itike y’Igikombe cy’Isi, umwe mu bakinnyi bakomeye bo mu Rwanda bari muri iyi kipe.

Ku banyamahanga, Craig Randall II ni umwe mu bazaba bagenderwaho cyane, akaba yarabaye Umukinnyi mwiza w’Irushanwa (MVP) wa BAL 2026, aho yagiraga impuzandengo idasanzwe y’amanota 36,1 ku mukino, harimo umukino yatsinzemo amanota 54 muri Mata.

Teafale Lenard na we yagize uruhare rukomeye mu gutwara BAL, aho yagiraga impuzandengo y’amanota 19,2, rebounds 5,0 na assists 2,8 ku mukino.

Abakinnyi bashya bongereye RSSB Tigers imbaraga

RSSB Tigers yongeyemo abakinnyi bafite ubunararibonye bwo gukina ku rwego mpuzamahanga, barimo Johnny Hamilton, ukomoka muri Trinidad na Tobago, afite uburebure bwa metero 2,13 kandi azwiho ubushobozi bwo kurinda ko ikipe ye itsinda.

Tyler Bey na we ari muri iyi kipe nyuma yo gukina muri Israel, aho yakiniye Ness Ziona na Hapoel Haifa.

Hari kandi Jonathan Galloway, ufite uburebure buri hafi ya metero 2,08, akaba yarakiniye amakipe yo mu bihugu bitandukanye birimo Denmark, Croatia, Switzerland, Türkiye, Finland, Czechia, Cyprus, Kosovo na Venezuela mbere yo kuza mu Rwanda.

Abakinnyi RSSB Tigers yitabaje muri iri rushanwa harimo Tyler Bey, Bizimana Paul, Jonathan Galloway, Ntore Habimana, Steven Hagumintwari, Johnny Hamilton, Lars Ishimwe, Antino Jackson Jr, Teafale Lenard Jr, Alex Mpoyo, David Mutabazi, Dieudonné Ndizeye, Craig Randall II, Osborn Shema na Nisre Zouzoua. Umutoza mukuru ni Henry Mwinuka, yungirijwe na James Maye na Kenny Gasana.

Ba uwa mbere mu kumenya amakuru agezweho!!!