Ikipe ya RSSB Tigers BBC yo mu Rwanda ihagarariye Umugabane wa Afurika mu irushanwa rihuza amakipe ahagarariye imigabane ku Isi rya ‘’FIBA Intercontinental Cup 2026’’, yatangiye nabi itsindwa na Rytas Vilnius yo muri Lithuania amanota 107-89. 

Uyu mukino wabaye mu gitondo cyo kuri uyu wa Kabiri, tariki ya 22 Nzeri 2026 muri Beijing National Indoor Stadium yo mu Bushinwa yakira abantu ibihumbi 20.

Witabirwa n’abarimo Ambasaderi w’u Rwanda mu Bushinwa Lt Gen (Rtd) Karake Karenzi n’Umuyobozi Mukuru w’Urwego rw’Ubwiteganyirize mu Rwanda, RSSB, Regis Rugemanshuro.

RSSB Tigers yanditse amateka yo kuba ikipe ya mbere yo mu Rwanda ikinnye iri rushanwa, nyuma yo kwegukana 2026 riheruka kubera i Kigali muri Kamena.

Ni umukino watangiye wegeranye amakipe yombi atsindana binyuze mu bakinnyi barimo Gytis Radzevicius na Teafale Lenard Jr. Agace ka mbere karangiye Rytas Vilnius iyoboye umukino n’amanota 22 kuri 19 ya RSSB Tigers.

Mu gace ka kabiri, umukino wakomeje kwegerana ariko Nisre Zouzoua afasha RSSB Tigers kugabanya ikinyuranyo ndetse iyobora umukino ku manota 30-34.

Mu minota ibiri ya nyuma, Rytas Vilnius yongereye ikinyuranyo cy’amanota ibifashijwemo na Gytis Masiulis na Ricky Lindo Jr ndetse isoza igice cya mbere ikomeje kuyobora umukino n’amanota 47 kuri 39 ya RSSB Tigers.

Mu gace ka gatatu, iyi kipe yo muri Lithuania yakomeje kuzamura ikinyuranyo kigera ku manota 19 (63-44) abarimo Kay Bruhnke na Augustas Marciulionis bayitsindira.

Ku rundi ruhande RSSB Tigers yagowe no kwibona muri aka gace itakaza imipira myinshi (turn overs) ndetse n’abarimo Craig Randall ll umenyereweho gutsinda amanota atatu ntiyahiriwe n’uburyo yageragezaga.

Aka gace karangiye Rytas Vilnius yageje ku manota 79 kuri 59 ya RSSB Tigers.

Mu gace ka nyuma, umukino wegeranye amakipe yombi atsindana amanota binyuze mu bakinnyi barimo Craig Randall II na Kay Bruhnke. Muri aka gace Rytas Vilnius yagatsinzemo amanota 30-28.

Umukino warangiye RSSB Tigers itsinzwe na Rytas Vilnius amanota 107-89, itangira nabi imikino mpuzamigabane ya FIBA.

Kay Bruhnke wa Rytas Vilnius yatsinze amanota 22 mu gihe Craig Randall ll wa RSSB Tigers yatsinze amanota 20.

RSSB Tigers izasubira mu kibuga ku wa gatatu, tariki ya 23 Nzeri 2026, ikina Shanghai Sharks yo mu Bushinwa.

Ba uwa mbere mu kumenya amakuru agezweho!!!