Karate: Abana 44 bo muri  RCCS Champions Academy i Ntarama bazamuwe mu ntera

Karate: Abana 44 bo muri  RCCS Champions Academy i Ntarama bazamuwe mu ntera

Imvaho Nshya

May 29, 2022

Abana 44 bakina umukino wa Karate babarizwa muri “The Champions Sports Academy”, ishami riri i Ntarama mu ishuri   “Rwanda Christian Children School” bazamuwe mu ntera.

Iki gikorwa cyabaye ku wa Gatanu taliki 27 Gicurasi 2022  kiyobowe n’umutoza mukuru w’ikipe y’igihugu akaba ari we muyobozi wa  “The Champions Sports Academy”  ari na we wayishinze,Nkuranyabahizi Noel.

Iri shuri “Rwanda Christian Children School” ribarizwa muri “Gasore Serge Foundation”.  Muri iki gikorwa cyo kuzamura abana mu ntera  hari abayobozi batandukanye b’iri shuri, abarimu ndetse n’abanyeshuri.

Umutoza Nkuranyabahizi agaragaza ko iri shami rya RCCS Champions Academy riri mu mashami ya  “The Champions Sports Academy”  akora cyane babifashijwemo n’ubuyobozi bw’iki kigo .

Umutoza mukuru w’ikipe y’igihugu akaba ari we muyobozi wa  “The Champions Sports Academy”, Nkuranyabahizi Noel

Akomeza avuga  ko ari ahantu heza ho gukorera siporo kandi hakaba hari impano nyinshi ku buryo bizeye ko mu bihe biri imbere hazaba hari abakinnyi bakina umukino wa Karate bakomeye ku buryo banavamo abaserukira igihugu mu byiciro bitandukanye.

Umuyobozi w’iri shuri yashimiye “The Champions Sports Academy” kuba iri gufasha iki kigo kuzamura impano  ndetse no gutoza abana indangagaciro zirimo, imyitwarire myiza “Discipline”, ubucuti “Friendship”, gukorera hamwe “Teamwork” no kuba indashyikirwa “Excellence” binyuze muri Karate kandi abizeza inkunga yose bazakenera kugira ngo iri shami rirusheho kuzamuka.

Abana bazamuwe mu ntera mu mikandara y’umuhondo na Oranje bishimiye iki gikorwa n’intera bagezeho .

Kuva muri 2017, Nkuranyabahizi Noel usanzwe ari umutoza mukuru   w’ikipe y’igihugu ya Karate ni bwo  yatangije ishuri ryigisha umukino wa Karate “The Champions Karate Academy” aho mu  biruhuko bahurizaga hamwe  abana bafite hagati y’imyaka 4 na 17  bakigishwa uyu mukino. Iri shuri ryatangiriye ahahoze ari Sports View Hotel i Remera.

Ubu rero rimaze kugira amashami 3 harimo Club House La Palisse i Nyandungu, i Nyanza ndetse n’i Ntaramara muri Rwanda Christian Children School.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA