Perezida wa Repubulika, Paul Kagame ari mu bayobozi ba Komisiyo Mpuzamahanga ishinzwe guteza imbere ikoreshwa ry’ikoranabuhanga ry’ubwenge buhangano (AI) itangirizwa ku mugaragaro mu Nama Mpuzamahanga yiga ku ikoreshwa rya AI mu iterambere, iteraniye i Geneva mu Busuwisi. 

Iyo Nama mpuzamahanga y’iminsi ine yitabiriwe na Minisitiri w’Ikoranabuhanga na Inovasiyo Ingabire Musoni Paula, ari kumwe na Ambasaderi w’u Rwanda i Geneva mu Busuwisi Urujeni Bakuramutsa, ikaba yahereye kuri uyu wa Kabiri tariki ya 7 kugeza ku itariki 10 Nyakanga 2026. 

Biteganyijwe ko Komisiyo Perezida Kagame ayoboranye na Marc Benioff ukuriye Ikigo Salesforce, bakaba bungirijwe n’Umunyamabanga Mukuru w’Ikigo Mpuzamahanga cya cy’Itumanaho (ITU) Doreen Bogdan-Martin, ifungurwa ku mugagarago kuri uyu wa Gatatu tariki ya 8 Nyakanga 2026. 

Ni Komisiyo ihuriwemo n’abayobozi 40 barimo Abakuru b’Ibihugu, abayobozi bakuru b’ibigo n’inganda, abayobozi b’Amashami ya Loni, n’abandi bayobozi bo ku rwego rwo hejuru biyemeje gushyiraho inzira zifatika zigamije kongerera imbaraga icyizere  rubanda ifitiye AI, kongera inzego ikoreshwamo ndetse no kwagura amahirwe n’ibisubizo itanga mu gukemura ibibazo Isi ihanganye na byo ku muvuduko w’Ikoranabuhanga ukenewe. 

Perezida Kagame avuga ko ikoranabuhanga rikwiye guhora ari inbaraga zo gukora ibyiza, ndetse asaba ubutwererane mpuzamahanga mu kugabanya ubusumbane no guharanira ko abaturage benshi barushaho kugerwaho n’udushya tuyobowe na AI. 

Ati: “Ikintu kimwe cyo ni ukuri: ikoranabuhanga rikwiye kuba imbaraga y’icyiza, kandi dufite inshingano zo kurikoresha mu byiza gusa. Reka turusheho gukorana mu kugabanya ubusumbane no gukomeza gufasha abaturage kubona inyungu AI ishobora kutugezaho twese.”

Benioff bafatanyije kuyobora iyi Komisiyo Mpuzamahanga, yavuze ko AI yagaragaje amahirwe mwnshi y’iterambere ry’ubukungu anashimangira ko icyizere cy’abaturage kuri iri koranabuhanga rizahora ari ingenzi kugira ngo amahirwe ritanga abyazwe umusaruro mu buryo bwuzuye.

Iyi Komisiyo ishyize imbere guharanira ko abasaga miliyari 2,2 bataragerwaho na interineti bayibona, by’umwihariko mu bihugu bikiri mu nzira y’amajyambere byiganjemo ibya Afurika, nk’imwe mu ntambwe zo kuziba icyuho mu ikoreshwa ry’ikoranabuhanga. 

Mu guhuriza hamwe absyobozi batanga umusanzu ukomeye mu kubaka ikoranabuhanga, kuribyaza umusarueo, gushyiraho Politiki irigenga ndetse no gufasha rubanda kuribyaza umusaruro, iyo Komisiyo izafasha gutegura ibisubizo bya AI mu nzego zitandukanye no kwagura imipaka bikajyana no guharanira ko ritanga umusaruro ukenewe mu bihugu bikiri mu nzira y’Amajyambere.

Inama iteraniye i Geneva, yahurije hamwe abayobozi mu nzego zirimo n’iza Politiki ndetse n’abahanga udushya tw’ikoranabuhanga baganira ku ngamba zikenewe mu guteza imbere ikoranabuhanga n’ubwenge buhangano by’umwihariko.

Abayobozi b’u Rwanda banahagarariye igihugu cyabo mu nzama ebyiri zabanje ari zo Inama Mpuzamahanga yiga ku ikoreshwa rya AI mu miyoborere, n’Inama Mpuzamahanga yiga ku isankazamakuru (WSIS Forum 2026). Izo nama zateguwe na ITU ifatanyije n’Umuryango w’Abibumbye ndetse n’abafatanyabikorwa batandukanye.

Ba uwa mbere mu kumenya amakuru agezweho!!!