Guverinoma y’u Rwanda n’iy’u Burusiya byiyemeje kongerera imbaraga ubufatanye mu guteza imbere ikoreshwa ry’ingufu za Nikeleyeri hagamijwe kurushaho gushyigikira iterambere rirambye ry’ibihugu byombi.

Ni ibyaganiriweho mu biganiro Minisitiri w’Ububanyi n’Amahanga n’Ubutwererane Olivier Jean Patrick Nduhungirehe yagiranye na Minisitiri w’Ububanyi n’Amahanga w’u Burusiya, Sergey Viktorovich Lavrov. Abo bayobozi bombi bahuriye mu Nama y’iminsi ibiri ya Antalya yiga kuri Dipolomasi, yabereye muri Turikiya guhera ku wa Gatandatu tariki ya 18 Mata 2026.

Uretse ibiganiro ku gukoresha ingufu za Nikeleyeri mu rugendo rwo kwihutisha iterambere rirambye, abayobozi bombi banaganiriye ku kurushaho guteza imbere ubucuruzi, uburezi ndetse no kubaka ubushobozi.

Ambasade y’u Rwanda mu Burusiya yakomeje igira iti: “Impande zombi zaniyemeje kurushaho kwimakaza ubufatanye mu mahuriro mpuzamahanga, harimo n’Umuryango w’Abibumbye, mu gushakira ibisubizo ingorane zo mu Karere na mpuzamahanga.”

Ibiganiro bigamije kwimakaza ikoreshwa ry’ingufu za Nikeleyeri byabaye mu gihe Leta y’u Rwanda yiteguye kwakira Inama yiga ku mikoreshereze y’Ingufu za Nikileyeri muri Afurika hagati ya tariki 18 na 21 Gicurasi 2026, ku nsanganyamatsiko igira iti: “Kubaka ahazaza ha Afurika binyuze mu kubyaza umusaruro ishoramari rishingiye ku Ngufu za Nikeleyeri.”

Ni mu gihe kandi u Rwanda ruteganya kuzaba rufite uruganda ruto rutanga ingufu za Nikeleyeri bitarenze nibura mu mwaka wa 2030, mu rwego rwo kongera amashanyarazi mu Gihugu.

Ni kenshi Perezida wa Repubulika y’u Rwanda Paul Kagame agaragaza ko ingufu za Nikeleyeri zifatiye runini ahazaza h‘u Rwanda n’Umugabane wa Afurika muri rusange kuko izo ngufu zitanga igisubizo kirambye iyo zikoreshejwe mu buryo bwubahiriza amabwiriza y’ubuziranenge ku rwego mpuzamahanga.

Perezida Kagame yagaragaje ko ingufu za Nikeleyeri zitanga amashanyarazi yizewe, kandi zikeneye kubyazwa umusaruro byihuse mu gihe amashanyarazi Isi ikeneye azaba yarikubye inshuro zigera kuri eshatu bitarenze mu mwaka wa 2050.

U Rwanda rwasanze ari ngombwa kubaka inganda nto zitunganya ingufu za Nikeleyeri kuko ari zo zitwara ubutaka buto, zitangije ikirere kandi zigatanga ingufu nyinshi. Isesengura ryakozwe ryagaragaje ko kubaka uruganda rutunganya ingufu za Nikeleyeri bizatwara u Rwanda amafaranga ari hagati ya miliyari 5 na 6 z’Amadolari y’Amerika.

Ba uwa mbere mu kumenya amakuru agezweho!!!