Guverinoma y’u Rwanda yijeje Umushinjacyaha Mukuru w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT), Serge Brammertz ko itazahwema gushyigikira ibikorwa by’ibiro bye byo gukomeza iperereza no gukurikirana abakekwaho ibyaha bya Jenoside yakorewe Abatutsi mu 1994. 

Serge Brammertz yasoje uruzinduko rw’iminsi itatu yagiriraga mu Rwanda guhera ku wa 18-20 Gicurasi 2026, ari na rwo yahuriyemo n’abayobozi batandukanye muri Guverinoma no mu zindi nzego z’ubutabera, Abadipolomate  n’izishinzwe irangamimerere.

Urwo ruzinduko rushimangira uburyo Ibiro by’Ubushinjacyaha bwa UNIRMCT bikomeza kubaka ubutwererane n’abayobozi mu gukomeza gukora iperereza no kuburanisha abagize uruhare muri Jenoside yakorewe Abatutsi mu 1994.

Mu ntangiriro z’iki cyumweru, Brammetz yakiriwe na Minisitiri w’Ububanyi n’Amahanga n’Ubutwererane Amb Nduhungirehe Jean Patrick Olivier, bagirana ibiganiro byibanze ku bufatanye n’ibikorwa bigezweho hagati y’u Rwanda na UNIRMCT.

Mu bandi bayobozi bakuru bahuye na bo harimo Minisitiri w’Ubutabera akaba n’Intumwa Nkuru ya Leta, Dr. Ugirashebuja Emanuel ndetse n’Umushinjacyaha Mukuru, Angélique Habyarimana hamwe n’Umuyobozi Mukuru w’Ikigo cy’Igihugu gishinzwe Indangamuntu (NIDA), Josephine Mukesha.

U Rwanda rugaragaza ko hakiri abasaga 1000 bakekwaho Jenoside yakorewe Abatutsi mu 1994 bihishe mu bihugu bitandukanye cyane cyane ibyo muri Afurika, bakeneye gukorwaho iperereza ndetse bakanagezwa imbere y’ubutabera.

Umushinjacyaha Brammertz yahamirijwe ko u Rwanda rumwitezeho gukomeza kubakurikirana mu bihe by’ahazaza, na we ashima uburyo u Rwanda rubafasha mu kubatungira agatoki ahacyihishe abakwaho Jenoside yakorewe Abatutsi mu 1994, no kubunganira mu gukora iperereza n’ubundi bufasha bujyanye no gufasha inzego z’ubutabera z’ibindi bihugu kubona amakuru yizewe ku bakekwa.  

Mu bindi Brammertz yaganiriye n’abo bayobozi, harimo kureba uko hakomeza kongerera ubutwererane mu kongera abagezwa imbere y’ubutabera bakekwaho kugira uruhare muri Jenoside yakorewe Abatutsi mu 1994, no guha ubutabera busesuye abishwe ndetse n’abayirokotse.

Umushinjacyaha Brammertz n’Umushinjacyaha Mukuru w’u Rwanda Habyarimana, bemeranyije gushyiraho amatsinda ya tekiniki agamije kwiga ku buryo bwo gukomeza gukorana bya hafi hagati y’ibiro byombi by’ubushinjacyaha hagamijwe kugeza mu butabera abakibukwepa. 

Muri uru ruzinduko kandi, Brammertz yanahuye n’Abadipolomate bahagrariye inyungu z’ibihugu bitandukanye mu Rwanda. 

Ba uwa mbere mu kumenya amakuru agezweho!!!