Abafatanyabikorwa ba Kicukiro basabwe gukorera hamwe
Amakuru

Abafatanyabikorwa ba Kicukiro basabwe gukorera hamwe

NTAWITONDA JEAN CLAUDE

June 24, 2023

Ubuyobozi bw’Umujyi wa Kigali bwasabye abafatanyabikorwa bibumbiye muri JADF mu Karere ka Kicukiro, kwicara bakaganira maze bakarebera hamwe ibyo bahuriyeho kugira ngo babikore mu buryo bumwe mu Karere hose.

Byagarutsweho n’Umuyobozi w’Umujyi wa Kigali wungirije ushinzwe Imiturire n’Ibikorwa Remezo, Dr Mpabwanamaguru Merard, mu imurikabikorwa mu Karere ka Kicukiro ryabaye ku gicamunsi cyo ku wa Gatanu taliki ya 23 Kamena 2023 ku biro by’Akarere.

Umujyi wa Kigali wasabye abitabiriye imurikabikorwa kurushaho kunoza ibyo bakora no gusobanukirwa gahunda za Leta barushaho gukorana.

Yagize ati: “Abafite porogaramu zisa bicare baganire. […] bigaraga ko hari uburyo dukeneye kuba twabahuriza hamwe kugira ngo abafatanyabikorwa basobanukirwe umurongo mugari Igihugu cyashyizeho”.

Ubuyobozi bwa Kicukiro butangaza ko hari byinshi abafatanyabikorwa babafashamo mu guteza imbere umuturage.

Umuyobozi Nshingwabikorwa w’Akarere ka Kicukiro Mutsinzi Antoine, asobanura ko ku bijyanye na Mituweli, Akarere kari mu myanya itatu ya mbere, mu gihe umwaka ushize kari ku mwanya wa 29.

Mutsinzi agira ati: “Nta kindi cyatumye tubigeraho, ni ubufatanye n’abafatanyabikorwa. Twakoreye hamwe, ni wo musaruro twabonye ndetse urebye no muri EjoHeza Akarere ka Kicukiro ni aka kabiri. 

Na byo ni umusaruro waturutse mu guhuza imbaraga tugakorera hamwe n’abafatanyabikorwa”.

Ku bijyanye no kugabanya igwingira ry’abana, ubuyobozi bwa Kicukiro buvuga ko umwaka ushize Akarere kari kuri 17%, mu gihe uyu mwaka urimo urangira kari ku 10% mu kugabanya igwingira ry’abana.

Musuhuke Ben, Perezida wa Komisiyo y’imibereho myiza muri JADF Kicukiro, agaragaza ko hari byinshi abafatanyabikorwa bamaze kugeraho kuva umwaka wa 2022 – 2023 watangira.

Yagize ati: “Akarere ka Kicukiro dutangira umwaka, kari aka nyuma mu kwishyura Mituweli ariko hamwe n’abafatanyabikorwa dusoje umwaka turi aba gatatu ku rwego rw’Igihugu”.

Akomeza avuga ko Kicukiro iza ku isonga mu kurwanya imirire mibi ku rwego rw’Igihugu.

Bimwe mu byo abafatanyabikorwa bakoze, Musuhuke avuga ko hari abafashije abaturage mu bikorwa by’isanamitima, abana bahohotewe, gufasha abana babyariye mu ngo n’ibindi.

Avuga ko umwaka utaha w’ingengo y’imari abafatanyabikorwa ba Kicukiro bagiye gutangirana na gahunda nshya yo kudakomeza gufasha abaturage batishoboye.

Yagize ati: “Ahubwo tugiye kubaremera porogaramu izatuma batangira kwifasha ubwabo (Graduation Program). 

Ni porogaramu iri ku rwego rw’Igihugu ariko tugiye kubwira abafatanyabikorwa gukora igituma umuturage adakomeza gufashwa ahubwo akagira ubushobozi bwo kwifasha”. 

Kugeza ubu harabarurwa uruhare rungana na miliyari zisaga ebyiri zatanzwe n’abafatanyabikorwa mu guteza imbere Akarere ka Kicukiro. 

Akarere ka Kicukiro gafite abafatanyabikorwa 288 bakora mu nkingi zitandukanye zirimo ubukungu, imibereho myiza n’imiyoborere.

Dr. Merard Mpabwanamaguru yasabye JADF Kicukiro gukorera hamwe
Bamwe mu bafatanyabikorwa bitabiriye imurikabikorwa
Abafatanyabikorwa bitabiriye imurikabikorwa basobanuye ibyo bakora

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA