Abagenerwabikorwa ba VUP baravuga imyato Perezida Kagame
Amakuru

Abagenerwabikorwa ba VUP baravuga imyato Perezida Kagame

NTAWITONDA JEAN CLAUDE

February 22, 2022

Abaturage bo hirya no hino mu Gihugu bagezweho na gahunda za VUP barashimira Perezida wa Repubulika Paul Kagame wabatekerejeho, agashyiraho iriya gahunda yabahinduriye ubuzima bakiteza imbere bakaba bakataje mu gusezerera ubukene.

Gahunda ya VUP mu nkingi zayo zitandukanye yashyiriweho abaturage batishoboye, yatangijwe na Leta y’u Rwanda mu mwaka wa 2008 hagamijwe kuzamura imibereho n’iterambere ry’abaturage bari mu bukene bukabije. 

Inkingi zigize VUP zitandukanye abagenerwabikorwa batoranywa binyuze mu nteko z’abaturage, bigatuma bazamuka ntibakomeze gusigara inyuma mu rugamba rw’iterambere Igihugu cyiyemeje.

Umuyobozi Mukuru w’Ikigo Gishinzwe Ibikorwa by’Iterambere mu Nzego z’Ibanze (LODA), Madamu Nyinawagaga Claudine atangaza ko mu mwaka wa 2024, ubukene buzaba bugeze mu marembera.

Ati: “Turifuza ko muri 2024 tuzaba dusigaranye ikigero cy’ubukene kingana na zero n’ibice, mbese cyazaba kiri munsi ya 1%”.

Kuva VUP yatangira mu 2008, imibare itangazwa na LODA ni uko imaze kugera ku bagenerwabikorwa bakora imirimo y’maboko isanzwe bangana na 168 849 n’agaciro k’amafaranga y’u Rwanda 111, 376, 914, 463.

Abagenerwabikorwa b’imirimo y’amaboko yoroheje ni   58, 393 n’ amafaranga y’u Rwanda 6, 148, 137, 200.

Abahabwa inkunga y’ingoboka na bo umubare wabo ugenda wiyongera kuko bavuye ku 9,692 mu mwaka wa 2009 bakagera ku 119, 798 mu mpera z’umwaka ushize.

Hari abagenerwabikorwa ba VUP bashoboye kwiguriora amatungo

Abagenerwabikorwa bahawe inguzanyo ziciriritse bamaze guhabwa amafaranga y’u Rwanda agera kuri 14, 650, 579, 207.

Binyuze mu nkingi zitandukanye za VUP, iyi gahunda yagize uruhare mu kugabanya igipimo cy’ubukene kuko kuva mu 2000/2001 bwavuye kuri 60,9% bugera kuri 38,2% mu 2016/2017.

Ubukene bukabije bwo bwavuye kuri 40,0% mu 2000/2001 bugera kuri 16,0% mu 2016/2017. 

Imvaho Nshya yaganiriye kandi n’abagenerwabikorwa ba gahunda za VUP zitandukanye mu Kuboza 2021, ubwo Ikigo Gishinzwe Ibikorwa by’Iterambere mu Nzego z’Ibanze (LODA), ari na cyo gifite mu nshingano VUP basuraga abaturage, bagaragaza akabari ku mutima bashima Perezida Paul Kagame ubagejeje aheza.

Abagenerwabikorwa ba vup biyubakiye inzu

Nshimiyimana Jean d’Amour utuye mu Kagali ka Kabazungu mu Murenge wa Musanze, mu Karere ka Musanze ashimira Perezida Kagame kuba yaratekereje gahunda ya Vup yamufashije kwiyubakira icumbi.

Yagize ati: “Icyo nshimira VUP by’umwihariko, njye natangiye ndi umusore, ndi umuntu utagira aho kuba, najyaga ndangura igisinde, uko ukwezi gufpuye nyirigisinde nkamuha amafaranga. Aho ngiriye muri VUP niha intego yo kuvuga ngo ngiye kuhagura burundu, nahaguze amafaranga y’u Rwanda 300, 000. Munshimire Nyakubahwa Perediza wa Repubulika Paul Kagame wadutekerejeho ubu nanjye mfite aho ntuye”.

Nyiranguweneza utuye mu Mudugudgu wa Musekera, Akagari ka Zivu, mu Murenge wa Save, mu Karere ka Gisagara afite byinshi ashima muri Gahunda ya VUP.

Ati: “Ndashima Umubyeyi wacu Nyakubahwa Perezida Kagame, ubuyobozi bwiza bwa Leta butureberera kandi ijisho ry’Umuyobozi Mukuru rikaturebera ibikwiye aho twari turi hatari heza none ubu tukaba dufite aho tugeze”.

Yongeyeho ati: “Nari umuntu w’umukene none nkora mu mirimo rusange no mu materasi. Nari umukene ntafite aho mpinga nta n’ifumbire none ubu nkodesha imirima 3, nahawe itungo rigufi rimfasha kubona ifumbire, nari mfite inzu ifite ikibazo ku ibaraza ryendaga kugwa ariko ubu nararikoze mbikesha VUP”.

Ndayisaba André utuye mu Kagali ka Shango, mu Murenge wa Nduba, mu Karere ka Gasabo ahamya ko atarabona inkunga yari umukene cyane, atuye mu manegeka, ariko amaze gushyirwa muri gahunda ya VUP, yibumbira mu matsinda yo kwizigama atandukanye maze bimufasha kwikura mu bukene, anubaka inzu nziza abamo n’umuryango we.

Ati: “Mu matsinda ni ho nakuye amafaranga yo kuvugurura inzu mbamo”.

Ndayisaba André yiyubakiye inzu abikesha gahunda za VUP zamufashije kwizigama mu matsinda

Niyomugabo Jean Pierre utuye mu Mudugudu Akadogo, Akagari ka Mpinga, mu Murenge wa Kigembe mu Karere ka Gisagara avuga ko mbere yo guhabwa akazi muri VUP babaga ahantu hadatunganye ariko nyuma amafaranga bahembwe abaha aho kuba.

Yagize ati: “Ndashima Ubuyobozi Bukuru bwatuzirikanye. Amafaranga duhembwa muri VUP yaduhaye aho kuba, ako gahene tukakagura kakabyara tukabona ifumbire, inkoko, inkwavu bikatwunganira. Turimo turazamuka kubera VUP iyo duhembwe tubasha kwambara, VUP yaratuzamuye”.

Abahawe inguzanyo ziciriritse barashima byimazeyo

Ahimana Aimable utuye mu Kagari ka Cyabagarura, mu Murenge wa Musanze, mu Karere ka Musanze yavuze ko nk’Umujyanama w’Imibereho myiza n’Iterambere bafasha abaturage gusobanukirwa uburyo bwo kwiteganyiriza.

Yagize ati: “Umukuru w’Igihugu atekereza neza namwe mukagera mu kirenge cye. Umurenge Sacco baradufashe batuguriza 100, 000, maze kubibonamo mpita nguramo inka ubu ifite ikimasa. Ndashimia Leta y’u Rwanda yadutekerejeho n’ubungubu ikaba idutekerezaho mukomeze mudusunike igihe nikigera muducutse”.

Yongeyeho ko kubera VUP yaguze telefone ikaba imufasha kumenya amakuru.  Ati: “Ndashima Kagame waduhaye iyo nkunga y’ibitekerezo byiza”.

Ingo Mbonezamikurire zabaye igisubizo ku bana n’ababyeyi

Uwiringira Marie Chantal wo mu Murenge wa Gitoki mu Karere ka Gatsibo ashimira Perezida Kagame kuba kuva hashyirwaho ingo mbonezamikurirezishamikiye kuri VUP abana bitaweho kandi bafite ubuzima bwiza.

Urubyiruko rwigishijwe imyuga ruhabwa n’ibikoresho, uyu ni Alice Niyogena wo mu Karere ka Musanze

Yagize ati: “Ndashimira Perezida Paul Kagame, ndashima kubera bariya bana, ndamushimira ko yaduhaye irerero mu Mudugugu ku buryo mbere basigaraga ku gasozi bagasigara birukanka ariko aho amaretero yaziye baba bari mu irerero barimo biga dusanga nta kibazo bagize, bahawe ubumenyi, bize kwambara neza, biga gukaraba, amasomo yo kubazamura mu bwenge”. 

Mukeshimana Delphine na we yavuze uburyo kuba umwana we w’imyaka 3 yaragiye mu irerero bituma akora imirimo ye atuje kandi abona byamufashije kujijuka.

Aremeza ko byakemuye ikibazo cyo kuba barabaga basa nabi biriwe bizirinze mu cyondo, babaga bari mu muhanda cyangwa ukajya guhinga ukajyana na bo, wajya gucuruza ukamujyana n’uwo uhetse. 

Yagize ati: “Ndashima ko Leta yakuye abana mu muhanda ikabashyira mu irerero, nta mubyeyi ukivunika ajyana n’umwana mu murima, babona igikoma n’ibiryo ku gihe, nta kibazo rwose Leta yarakoze”.

VUP ni yo yishyura abarimu bigisha muri aya marerero, ndetse na bo bemeza ko yababereye igisubizo.

Mukantagara Drocella yagize ati: “Ni gahunda nziza kandi ifasha buri wese yaba umuturage usanzwe cyangwa se uwa VUP. Nk’ubu mbere umuntu yashakaga kujya mu kazi akabura aho asiga umwana, hari n’ababacumbikishaga mu baturanyi, ariko aho amarerero yaziye yadufashije kwita ku mirimo yacu, abana tugira aho tubasiga kandi hizewe bagahabwa n’uburere buzima”.

Umwe mu babyeyi wemeye ko iwe hagirwa urugo mbonezamikurirewitwa Niragire Annonciata yavuze ko kuba abaturage baramutoranyije, bakamugirira icyizere nta kibazo.

Yagize ati: “Ndashimira Leta ntako itagize, ni umubyeyi yaraturebye inadutekerezaho ubungubu”.

Abana bari mu marerero bitabwaho mu mirire bakagira ubuzima bwiza

Yakomeje avuga ko imibereho y’abana yahindutse ikaba myiza. atanga urugero rw’abana babiri baje bafite ikibazo ariko kigakemuka.

Yagize ati: “Harimo uw’imfubyi bashyize ku muntu na we utishoboye, ariko uwo mwana yaje atavuga atanagenda ariko ubu ni inkumi. Haje undi wari warabyimbye amatama ariko ubungubu rwose umwana yabaye muzima, Leta iduha amata tugaha abo bana, bakaduka ifu y’igikoma, urumva ko nk’umwana wahuraga n’ikibazo, ubu iyo ashyitse aha nimugoroba aryama avuga ati: Mugitondo ndibujye ku ishuri ndiburye, umwana agataha ubona anezerewe”.

Mukarwego Pierrine utuye mu Mudugudu wa Gahabo, mu Kagari Nyamirama mu Murenge wa Gitoki yavuze ko mbere umubyeyi yajyaga mu murima wasigaga umwana mu rugo agasanga bateranye amabuye.

Ati: “Abana bacu bamaze kunguka ubwenge baca imigani, akakuririmbira indirimbo bize, hari n’abamaze kumenya kubara. Abana ntibakinyanyagiye mu Midugudu, ubu ugera muri karitsiye ntugire umwana ubona atamba.

Ndashimira Ubuyobozi Bukuru kuko abana bafite ubuzima bwiza, mu irerero abana bararya, bakanywa igikoma cyiza, bakabona amata, bakabona amagi, abana bacu bafashwe neza rwose”.

Abagenerwabikorwa barasizwe barinogereza

Abagenerwabikorwa ba VUP bavuga ko gukoramo byabubakiye ubushobozi, kuko ubonye ubushobozi buke buke abukesha imirimo akora muri gahunda ya VUP bumufasha kuva mu bukene, na we agashyiraho ake akaba ari ko kwinogereza.

Ndarwemeye Joseph ni umuturage wo mu Mudugudu wa Kayenzi, Akagari ka    Gatare, Umurenge wa    Macuba mu Karere ka Nyamasheke yatangarije Imvaho Nshya ko gahunda ya ‘Nsiga Ninogereze’ yatumye hari byinshi ageraho birimo kubaka inzu no kwizigama no guteganyiriza amasaziro.

Yagize ati: “Gukora muri VUP byaramfashije kuko nubatse inzu nubwo hari aho nkiyikorera amasuku neza, ariko nyirimo n’abana banjye. Nagendaga nkora muri VUP nkagenda nkagura agafuka ka sima ngahemba n’umukozi uzana umucanga. Ikindi VUP yatumye tujya muri gahunda ya ‘Ejo Heza’ nteganya ko nzagira amasaziro meza”.

Ubuyobozi bwiyemeje guherekeza abagenerwabikorwa

Umunyamabanga wa Leta muri Minisiteri y’Ubutegetsi MINALOC, Madamu Ingabire Assumpta avuga ko uko iminsi igenda iza abaturage bagiye kuba abafatanyabikorwa ubuyobozi bukazajya bukomeza kubaba hafi.

Ikindi ni uko intego ari ukugera kuri 0% y’ubukene bukabije mu 2024, bikaba bisaba ko bamwe mu baturage bishoboye bazakomeza gukora nk’abafatanyabikorwa ku baturage Leta itabasha kugeraho bose.

Umuyobozi w’Akarere ka Nyamasheke Mukamasabo Appolonie asobanura uburyo gahunda za VUP zafashije abaturage kwikura mu bukene

Umuyobozi w’Akarere ka Nyamasheke, Mukamasabo Appolonie, avuga ko kuva gahunda ya VUP yatangira abagenerwabikorwa ba VUP bubakirwa ubushobozi bubafasha kwikura mu bukene.

Yasobanuye ko ari yo mpamvu bashyizeho gahunda zitandukanye zirimo ‘Nsiga ninogereze’ yo kugura amatungo magufi, iya ‘Sasa neza’ ifasha abaturage kurara heza, ‘Ndi urugero’ aho abakora muri VUP bibumbira mu matsinda kugira ngo birinde umwanda, ndetse n’iyiswe ‘Inkoko ya Mama, Igi rya bebe’ igamije kurandura ibibazo by’imirire mibi n’ingaruka zabyo.

Kuri iyi ngingo, Umuyobozi wungirije w’Akarere ka Gisagara ushinzwe iterambere ry’ubukungu, Habineza Jean Paul we yagize ati: “Abakora barahembwa bigira umumaro, haba ari ibikorwa remezo kandi burya iyo abantu bakorana bagirana ubusabane”.

Naho Umuyobozi w’Akarere ka Gatsibo Wungirije ushinzwe imibereho myiza y’abaturage, Mukamana Marcelline yemeza ko iyi gahunda y’ingo mbonezamikurire zishamikiye kuri VUP izakomeza gushyigikirwa, kandi abaturage bakarushaho kuyitabira no kuyigiramo uruhare.

Umuyobozi ushinzwe gahunda zo kurengera abatishoboye muri LODA, Bwana Gatsinzi Justine, yemeza ko gahunda ya VUP yagize umumaro ukomeye kuko ubu isigaye igera kuri benshi bashoboka.

Mu baturage bagezweho n’iyi gahunda, uyu muyobozi avuga ko harimo abavuga ko bafite aho bageze.

Ati: “Mu baturage dufite bakora muri VUP harimo abavuga ngo si ngombwa ko dukomeza gufashwa, mfite aho ngeze”.

Gahunda zifasha abaturage kwigira ni nyinshi

Uretse kwiyubakira inzu, kwita ku bana no guhabwa inguzanyo ziciriritse, abagerwabikorwa ba VUP bikuye mu bukene, hari ababonye ubushobozi bwo kurihira abana amashuri, abahuguwe mu myuga banahabwa ibikoresho, abiguriye amatungo, abibumbiye mu matsinda yo kugurizanya no kwizigama, kwishyura ubwisungane mu kwivuza n’ibindi.

Mu ngo mbonezamikurire, abana bahabwa amata bigatuma bagira ubuzima bwiza

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA