Abagore bakorera umushahara bahembwa 20% munsi y’uw’abagabo
Amakuru

Abagore bakorera umushahara bahembwa 20% munsi y’uw’abagabo

ZIGAMA THEONESTE

March 12, 2024

Imibare yashyizwe ahagaragara n’Isoko ry’Imari n’Imigabane mu Rwanda (RSE) igaragaza ko abagore bari mu kazi ku Isi bahembwa imishahara iri munsi y’iy’abagabo ku kugero cya 20%.

RSE itangaza ko mu kuziba icyo cyuho  ibigo by’abikorera bikwiye guha abagore amahirwe ahagije yo kugera ku mari mu buryo bworoshye.

Bayagarutsweho kuri uyu wa Kabiri tariki ya 12 Werurwe 2024, ubwo RSE ku bufatanye n’abandi bafatabikorwa Mpuzamahanga batandukanye bakoze ubukangurambaga bwo gushikariza ibigo by’imari n’abikorera kwimakaza uburingare mu kubona imari.

Umuyobozi Mukuru wa RSE, Rwabukumba Pierre Célèstin, yavuze ko ubwo bukangurambaga bwakozwe mu rwego rwo  kwita ku iterambere ry’umugore ndetse no kwita ku buringanire mu bijyanye n’imari.

RSE yatangaje ko umuntu umwe mu bantu 10 b’abagore  ku Isi ari mu bukene bukabije, aho usanga abagore 60% mu bihugu bitandukanye abagore bakora ubucuruzi buciriritse, mu gihe mu bihugu bikennye ho 90% by’abagore bakora imirimo iciriritse.

Rwabukumba ashingiye kuri iyo mibare yavuze ko bafite intego yo gukomeza gukurikirana no kwimakaza uburinganire  mu bijyane n’imari bigamije kuziba icyuho cy’abagore bakiri hasi.

Yagize ati: “Iyo habaye ikibazo haba hari n’uburyo bwo kugikemura, hari gahunda zo kuzamura abagore zitandukanye UN Women, AFC twese turashaka gufatanya kugira ngo dufashe abagore kugira ngo biteza imbere mu buryo bwo kugera ku mafaranga .

Twe uko tubikora dushyiraho amategeko atuma icyo cyuho kigabanyuka kugira ngo nyine ntihagire uhezwa mu kazi.”

Muri  iki gikorwa cyakozweho cy’ubukangurambaga  bwo kwimakaza kubona imari himakazwa uburinganire, havuzwa inzogera, byakozwe ku nshuro ya 10.

Rwabukumba asobanura ko gukangurira abantu korohereza abagore kubona imari byatangiye ku Isi yose mu ntangiriro za Werurwe 2024, dore ko muri uko kwezi ari na ho hizizwamo Umunsi Mpuzamahanga wahariwe Umugore.

Ni ibikorwa byakozwe n’Amasoko y’imari n’imigabane 121 yo mu bihugu bitandukanye ku Isi, yose akaba  arimo gukora icyo gikorwa.

Rwabukumba ati: “Kuvuza iyo nzongera […], murabizi ko ahari amafaranga ku Isi hose baba bahahanze amasomo, rero tuba tugira ngo dutange ubukangurambaga natwe dushyireho itafari ryacu natwe dushake icyo gukorwa cyo guteza imbere uburinganire mu miryango, mu kazi no mu masoko aho dukorera.”

Rose Lumbasi wari uhagarariye AFC yavuze ko mu byo bashyize imbere ari ugukangurira ibigo by’abikorera guteza imbere abagore, biborohereza kubona amafaranga abageza ku itarambere.

Ati: “Hari icyuho mu guha abagore uburyo bwo kubona amafaranga, imibare mwayibonye. AFC turabizi ko abagore bakeneye kubakirwa ubushobozi. Twe rero tubaha amahugurwa, benshi bakamenya aho gushora imari ha nyaho. Icya kabiri dutera inkunga abagore bari mu bushabitsi bityo bigatuma batera imbere.”

Uwo Muyobozi yakomeje avuga ko urugendo rwo gukomeza korehereza abagore kubona imari  rukomeje, akahamya ko bitazateza imbere imiryango itandukanye kuko usanga abana yewe n’umuryango muri rusange baba bategeye amaboko umugore.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA